ବିମାନବନ୍ଦରରେ କେହି ଅତିରିକ୍ତ ବ୍ୟାଗେଜ୍ ଫି’ ଦେବାକୁ ଚାହାନ୍ତି ନାହିଁ। ହେଲେ ଏହି ଚାର୍ଜକୁ ଏଡ଼ାଇବାକୁ ଯାଇ ଚାଇନାର ୪ଜଣ ବ୍ୟକ୍ତି ଏଭଳି କିଛି କରିଛନ୍ତି, ଯାହାକୁ ବିଶ୍ୱାସ କରିବା କଷ୍ଟକର ହୋଇପାରେ। ଦକ୍ଷିଣ-ପଶ୍ଚିମ ଚାଇନାର ୟୁନାନ ପ୍ରଦେଶର କୁନମିଙ୍ଗର ଏକ ବିମାନବନ୍ଦରରେ ଉକ୍ତ ଯାତ୍ରୀମାନେ ୩୦ ମିନିଟ୍ ମଧ୍ୟରେ ୩୦ କିଲୋଗ୍ରାମ କମଳା ଖାଇ ଶେଷ କରିଦେଇଥିଲେ।
ଓ୍ବାଙ୍ଗ ନାମକ ଜଣେ ବ୍ୟକ୍ତି ନିଜର ସହକର୍ମୀଙ୍କ ସହ ବିଜ୍ନେସ୍ ଟ୍ରିପ୍ରେ ଯାଇଥିବା ବେଳେ ୫୬୪ ଟଙ୍କା ଦେଇ ୩୦ କିଲୋଗ୍ରାମ କମଳା ଭର୍ତ୍ତି ବାକ୍ସ କିଣିଥିଲେ। ସେ ବିମାନରେ ବସିବା ପାଇଁ ବିମାନବନ୍ଦରରେ ପହଞ୍ଚିବା ପରେ ସେଠାକାର କର୍ମଚାରୀମାନେ ତାଙ୍କୁ ପ୍ରତ୍ୟେକ କିଲୋ କମଳା ପାଇଁ ୧୦ ୟୁଆନ୍ ଅର୍ଥାତ ମୋଟ୍ ୩୦୦ ୟୁଆନ୍(୩,୩୮୪)ଟଙ୍କା ଦେବାକୁ ପଡ଼ିବ ବୋଲି କହିଥିଲେ। ଏହାଶୁଣି ଓ୍ବାଙ୍ଗ ଓ ତାଙ୍କ ସହକର୍ମୀମାନେ ଦେୟ ଦେବା ପରିବର୍ତ୍ତେ ବିମାନବନ୍ଦରରେ କମଳା ଖାଇ ଶେଷ କରିବାକୁ ନିଷ୍ପତ୍ତି ନେଇଥିଲେ।
ଯାତ୍ରୀମାନେ ବିମାନବନ୍ଦରରେ ଛିଡ଼ା ହୋଇ ସବୁତକ କମଳା ଖାଇଥିଲେ। ଏଥିପାଇଁ ପ୍ରାୟ ୨୦ରୁ ୩୦ ମିନିଟ୍ ସମୟ ଲାଗିଥିଲା। କମଳା ପାଇଁ ଏଭଳି ଅସୁବିଧା ହୋଇଥିବା ଯୋଗୁ ଆଉ କେବେ ହେଲେ ସେ ଏହାକୁ କିଣିବେ ନାହିଁ ବୋଲି କହିଛନ୍ତି। ଚାଇନାର ସୋସିଆଲ ମିଡିଆରେ ଏହି ଘଟଣା ବେଶ୍ ଭାଇରାଲ ହେବାରେ ଲାଗିଛି।
