ବାଲିଆପାଳରେ ପିଲାଚୋର ଆତଙ୍କ
8:54 pmOctober 7, 2022October 7, 2022 / 09

ଲଙ୍ଗଳେଶ୍ୱର,୬।୧୦(ଡି.ଏନ.ଏ.)- ବାଲେଶ୍ୱର ଜିଲା ଦକ୍ଷିଣ ବାଲିଆପାଳ ଅଞ୍ଚଳରେ ଗତ କିଛିଦିନ ହେବ ପିଲାଚୋର ଆତଙ୍କ ଦେଖାଦେଇଛି। ବିଶେଷକରି ୩ବର୍ଷରୁ ୧୧ବର୍ଷ ବୟସ୍କ ପିଲାମାନଙ୍କୁ ଚୋରମାନେ ଟାର୍ଗେଟ କରୁଥିବା ବେଶ ଚର୍ଚ୍ଚାର ବିଷୟ ପାଲଟିଛି।
ସୂଚନା ଅନୁଯୟୀ, ବର୍ତ୍ତମାନ ପାର୍ବଣ ଋତୁ ଚାଲୁଥିବାରୁ ଏହାର ସୁଯୋଗରେ କେତେଜଣ ଅଣଓଡ଼ିଆ ମହିଳା ଓ ପୁରୁଷ ବାଲିଆପାଳ ଅଞ୍ଚଳରେ ପିଲାଚୋରିର ଆତଙ୍କ ସୃଷ୍ଟି କରୁଛନ୍ତି। ଗତ ସପ୍ତାହରେ ଜଗାଇ ପଞ୍ଚାୟତର ବଡ଼ାଶରେ ଦିନ ଦ୍ୱିପହରରେ ପିଲାଚୋରି କରି ଜଣେ ଧରା ପଡ଼ିଥିଲା ବେଳେ ଗତ ଗୁରୁବାର ନୂଆଗାଁ ମାର୍କେଟରୁ ସନ୍ଧ୍ୟା ସମୟରେ ଜଣେ ଦୁର୍ବୁତ୍ତ ଛୋଟ ପିଲାଙ୍କୁ ଚକୋଲେଟ୍‌ ଦେଉଥିବା ଦେଖି ଲୋକେ ତାଙ୍କୁ କାବୁ କରିଥିଲେ। ଠିକଣା ପଚାରିବାରୁ ସେ ପ୍ରଥମେ କଟକ ପରେ ମୁମ୍ବାଇ ଓ ହାଇଦ୍ରାବାଦ ଆଦି କହିବାରୁ ସନ୍ଦେହ ଅଧିକ ହୋଇଥିଲା। ପରେ ତାଙ୍କ ବ୍ୟାଗରୁ କିଛି ମାସ୍କ, ସ୍ପ୍ରେ, ବ୍ଲେଡ଼, ଛୁଞ୍ଚତ୍ ଆଦି ଜିନିଷ ମିଳିଥିଲା। ପିଲାଚୋର ସନ୍ଦେହରେ ଲୋକେ ତାଙ୍କୁ ବାଲିଆପାଳ ପୋଲିସରେ ଜିମା ଦେଇଥିଲେ। ଠିକ୍‌ ସମାନ ଧରଣର ଘଟଣା ଶୁକ୍ରବାର ମଧ୍ୟ ଘଟିଛି ଜଗତିପୁର ପଞ୍ଚାୟତର ଅଦଭୂତିଆ ମାର୍କେଟରେ। ସେଠାରେ ମଧ୍ୟ ଜଣେ ଅଣଓଡ଼ିଆ ମହିଳାଙ୍କୁ ପିଲାଚୋର ସନ୍ଦେହରେ ଲୋକେ ଅଟକ ରଖିଥିଲେ। ଏନେଇ ସେଠାରେ କିଛି ସମୟ ପାଇଁ ଚାପା ଉତ୍ତେଜନା ପ୍ରକାଶ ପାଇଥିଲା। ପୋଲିସ ପ୍ରଶାସନ ଏ ଦିଗରେ ପଦକ୍ଷେପ ଗ୍ରହଣ କରିବାକୁ ଦାବି ହେଉଛି।