ଭବାନୀପାଟଣା,୨।୩(ସ୍ବ.ପ୍ର.): ଆସନ୍ତା ୫ ତାରିଖରେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ କଳାହାଣ୍ଡି ଗସ୍ତ କରିବେ। ୧୮୨ କୋଟି ବ୍ୟୟ ଅଟକଳରେ ନିର୍ମିତ ୪ ଲାଇନ ବିଶିଷ୍ଟ ବିଜୁ ଏକ୍ସପ୍ରେସୱେ ଉଦଘାଟନ କରିବେ। ଏହାସହ ପ୍ରାୟ ୩ କୋଟିରୁ ଊଦ୍ଧର୍ବ ଟଙ୍କାରେ ନିର୍ମିତ ଧର୍ମଗଡ଼ ସରକାରୀ ବସଷ୍ଟାଣ୍ଡ ଓ ୭ କୋଟି ୮୪ ଲକ୍ଷ ବ୍ୟୟରେ ନିର୍ମିତ ବିଜୁ ପଟ୍ଟନାୟକ ଇନ୍ଣ୍ଡୋର ଷ୍ଟାଡିୟମ ଲୋକାର୍ପଣ କରିବେ। ହେଲେ ମୁଖ୍ୟମନ୍ତ୍ରୀ ଆସିବେ ବୋଲି ରାସ୍ତା ନିର୍ମାଣକାରୀ ଠିକାଦାର, ରାଜନେତା ଓ ପ୍ରଶାସନିକ ଅଧିକାରୀମାନେ ରାତିଦିନ ଏକ କରିଦେଇଛନ୍ତି। ରାସ୍ତା ନିର୍ମାଣ କାମ ୫ ତାରିଖ ପୂର୍ବରୁ ସରାଇବା ପାଇଁ ଚାଲିଛି ପ୍ରାଣମୂର୍ଚ୍ଛା ଉଦ୍ୟମ। ପୂର୍ତ୍ତ ବିଭାଗ ଦିନ ରାତି ଏକ କରି ଯୁଦ୍ଧକାଳୀନ ଭିତ୍ତିରେ ରାସ୍ତା ନିର୍ମାଣ ଚାଲିଥିବା ବେଳେ ରାସ୍ତା କାମର ସ୍ଥାୟୀତ୍ୱ ନେଇ ଏବେ ପ୍ରଶ୍ନବାଚୀ ସୃଷ୍ଟି ହୋଇଛି। ରାଉରକେଲାଠାରୁ ଆମପାଣି ପର୍ଯ୍ୟନ୍ତ ୫୪୬ କି.ମି. ପର୍ଯ୍ୟନ୍ତ ୪ ଲାଇନ ବିଶିଷ୍ଟ ବିଜୁ ଏକ୍ସପ୍ରେସୱେ ନିର୍ମାଣ କରାଯାଉଛି। ରାସ୍ତା ନିର୍ମାଣ ଦିନଠାରୁ ଆଜି ପର୍ଯ୍ୟନ୍ତ କୌଣସି ଅଧିକାରୀ, ଜିଲାପାଳ, ଉପଜିଲାପାଳ କିମ୍ବା ମନ୍ତ୍ରୀ, ବିଧାୟକ, ଏମ୍ପି କେହି ମଧ୍ୟ ଦିନେ ହେଲେ ତଦାରଖ ପାଇଁ ଯାଇ ନାହାନ୍ତି। କେବଳ ଠିକାଦାରଙ୍କ ମନମାନୀରେ ଏହି କାମ ଚାଲୁଥିଲା। ବର୍ତ୍ତମାନ ରାଜ୍ୟ ମୁଖିଆ ଆସିବା ଜାଣି ପୂର୍ତ୍ତ ବିଭାଗ ଅଧିକାରୀ ଓ ଯନ୍ତ୍ରୀଙ୍କଠାରୁ ଆରମ୍ଭ କରି ସମସ୍ତେ ତଦାରଖ କରିବା ପାଇଁ ବାହାରିଛନ୍ତି। ଉଦଘାଟନକୁ ଆଉ କିଛି ଦିନ ବାକିଥିବା ବେଳେ ରାତିଦିନ ପ୍ରାଣମୂର୍ଚ୍ଛା ଉଦ୍ୟମ କରି ରାସ୍ତା ନିର୍ମାଣ କାମ ଚାଲିଛି। ହେଲେ ରହି ରାସ୍ତା ନିର୍ମାଣ ନିମ୍ନମାନର ହେଉଥିବା ଅଭିଯୋଗ ହୋଇଛି। ନିମ୍ନମାନର କାମ ଯୋଗୁ ଏହାର ସ୍ଥାୟିତ୍ୱ ନେଇ ପ୍ରଶ୍ନବାଚୀ ସୃଷ୍ଟି ହୋଇଛି। ଫଳରେ ଯେଉଁମାନେ ଏହି ରାସ୍ତାରେ ନିର୍ଭର କରନ୍ତି, ସେମାନଙ୍କ ପାଇଁ ଉଦବେଗ ଜନକ ସୃଷ୍ଟି ହୋଇଛି ।
