ଭୁବନେଶ୍ବର,୧୫୧୦(ବ୍ୟୁରୋ): ୧୫ ଜିଲା କେନ୍ଦ୍ର ସମବାୟ ବ୍ୟାଙ୍କ (ଡିସିସିବି)ରେ ୩୮୪ ବ୍ୟାଙ୍କିଂ ସହାୟକ ଯୋଗ ଦେଇଛନ୍ତି। ଏଥିସହ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ପ୍ରାଥମିକ କୃଷି ସମବାୟ ସମିତି (ପାକ୍ସ)ଗୁଡ଼ିକର କମ୍ପ୍ୟୁଟରୀକରଣର ଶୁକ୍ରବାର ଶୁଭାରମ୍ଭ କରିଛନ୍ତି। ଏହାଫଳରେ ୨୦୬୩ଟି ପ୍ୟାକ୍ସ କୋର୍ ବ୍ୟାଙ୍କିଂ ସଲ୍ୟୁସନ ପ୍ଲାଟଫର୍ମ ଅଧୀନକୁ ଆସିପାରିଛି। ସେହିପରି ଓଡ଼ିଶା ରାଜ୍ୟ ପଣ୍ୟାଗାର ନିଗମରେ ୨୮ ଅଧିକାରୀ ନିଯୁକ୍ତ ହୋଇଛନ୍ତି।
ଲୋକସେବା ଭବନର କନଭେନସନ ହଲରେ ଆୟୋଜିତ ନବନିଯୁକ୍ତ କର୍ମଚାରୀଙ୍କ ଦିଗଦର୍ଶନ ଏବଂ ପାକ୍ସ କମ୍ପ୍ୟୁଟରୀକରଣର ଶୁଭାରମ୍ଭ କାର୍ଯ୍ୟକ୍ରମରେ ଯୋଗଦେଇ ମୁଖ୍ୟମନ୍ତ୍ରୀ କହିଛନ୍ତି, ପାକ୍ସଗୁଡ଼ିକ କ୍ଷେତ୍ରରେ ଏହି ପଦେକ୍ଷପ ସମଗ୍ର ଦେଶରେ ପ୍ରଥମ। ସମବାୟ ସମିତିଗୁଡ଼ିକ ପାଇଁ ଏହାକୁ ଏକ ଐତିହାସିକ ମୁହୂର୍ତ୍ତ ଭାବେ ବର୍ଣ୍ଣନା କରିବା ସହ ଏହା ବ୍ୟାଙ୍କିଂ, ଋଣ ଏବଂ ଅନ୍ୟାନ୍ୟ କାର୍ଯ୍ୟ କ୍ଷେତ୍ରରେ ଦକ୍ଷ ଏବଂ ସ୍ବଚ୍ଛ ସେବା ବିତରଣ କରିବ। ରାଜ୍ୟରେ ସମବାୟ ବ୍ୟାଙ୍କ ଏବଂ ପାକ୍ସଗୁଡ଼ିକ ସମୁଦାୟ ଶସ୍ୟ ଋଣର ପ୍ରାୟ ୬୦ ପ୍ରତିଶତ ପ୍ରଦାନ କରୁଛନ୍ତି। ପାକ୍ସଗୁଡ଼ିକ ଦ୍ବାରା ସମ୍ପୂର୍ଣ୍ଣ ଧାନ ସଂଗ୍ରହ କାର୍ଯ୍ୟକୁ ମୁଖ୍ୟମନ୍ତ୍ରୀ ଏହି ଅବସରରେ ପ୍ରଶଂସା କରିଛନ୍ତି।
ନବନିଯୁକ୍ତ ବ୍ୟାଙ୍କିଂ ସହାୟକଙ୍କୁ ଅଭିନନ୍ଦନ ଜଣାଇବା ସହ ୫-ଟି ଉପକ୍ରମର ଅନୁପାଳନ କରିବାକୁ ମୁଖ୍ୟମନ୍ତ୍ରୀ ପରାମର୍ଶ ଦେଇଛନ୍ତି। ଓଡ଼ିଶା ରାଜ୍ୟ ପଣ୍ୟାଗାର ନିଗମ ସମ୍ପର୍କରେ ମୁଖ୍ୟମନ୍ତ୍ରୀ କହିଛନ୍ତି, ପିଡିଏସ୍ ଏବଂ ସରକାରଙ୍କ ଅନ୍ୟାନ୍ୟ କଲ୍ୟାଣମୂଳକ ଯୋଜନା ଅଧୀନରେ ଖାଦ୍ୟଶସ୍ୟ ବଣ୍ଟନ କ୍ଷେତ୍ରରେ ଲଜିଷ୍ଟିକ୍ ସହାୟତା ପ୍ରଦାନ କରିଥାଏ। ପଣ୍ୟାଗାର ନିଗମରେ ନବନିଯୁକ୍ତ ୨୮ ଅଧିକାରୀଙ୍କୁ ମୁଖ୍ୟମନ୍ତ୍ରୀ ଅଭିନନ୍ଦନ ଜଣାଇବା ସହ ଆନ୍ତରିକତା ଓ ଦକ୍ଷତାର ସହ ସେମାନେ କାର୍ଯ୍ୟ କରିବେ ବୋଲି ଆଶା ପ୍ରକାଶ କରିଛନ୍ତି।
ଏହି ଅବସରରେ ଓଏସଡବ୍ଲ୍ୟୁଏସ୍ ପକ୍ଷରୁ ସରକାରଙ୍କୁ ୩.୦୭ କୋଟି ଟଙ୍କା ଲାଭାଂଶ ପ୍ରଦାନ କରାଯାଇଛି। ସମବାୟ ମନ୍ତ୍ରୀ ଅତନୁ ସବ୍ୟସାଚୀ ନାୟକ ସମବାୟ କ୍ଷେତ୍ରକୁ ସୁଦୃଢ଼ କରିବା ପାଇଁ ବିଭାଗ ପକ୍ଷରୁ ନିଆଯାଇଥିବା ପଦେକ୍ଷପ ସମ୍ପର୍କରେ ସୂଚନା ଦେଇଛନ୍ତି। ତିନି ନବନିଯୁକ୍ତ କର୍ମଚାରୀ ଜୟଶ୍ରୀ ସୋରେନ, ବିରଞ୍ଚି ନାରାୟଣ, ସନ୍ଦୀପ ସୌରଭ ସେମାନଙ୍କ ଅଭିଜ୍ଞତା ବର୍ଣ୍ଣନା କରିଛନ୍ତି। ଏପିସି ସଞ୍ଜୀବ ଚୋପ୍ରା, ମୁଖ୍ୟମନ୍ତ୍ରୀଙ୍କ ସଚିବ (୫-ଟି) ଭି.କେ. ପାଣ୍ଡିଆନ ଉପସ୍ଥିତ ଥିଲେ। ସମବାୟ ସଚିବ ସଞ୍ଜୀବ ଚଢ଼ା ସ୍ବାଗତ ଭାଷଣ ପ୍ରଦାନ କରିଥିବାବେଳେ ଓଏସସିବି ଏମଡି ଧନ୍ୟବାଦ ଦେଇଛନ୍ତି।
