ଜେରୁଜେଲମ, ୨।୨: ପ୍ରତିବର୍ଷ ମାଂସ ପାଇଁ ପୃଥିବୀରେ ୭୦୦ କୋଟିରୁ ଅଧିକ ଅଣ୍ଡିରା ଚିଆଁଙ୍କୁ ମାରି ଦିଆଯାଇଥାଏ। ମାଈ ଚିଆଁ ବଡ଼ ହୋଇ ଅଣ୍ଡା ଦେଇଥାଏ। ପରେ ଏହା ଅଣ୍ଡାଦେବା ବନ୍ଦ କରିଲେ ତାକୁ ମାଂସ ଲାଗି ହତ୍ୟା କରାଯାଇଥାଏ। ତେଣୁ ମାଈ ଚିଆଁ ପାଳନ କରିବା ଦ୍ୱାରା ଫାର୍ମ ମାଲିକ ଉପକୃତ ହୋଇଥାନ୍ତି। ସେମାନଙ୍କୁ ଅଣ୍ଡା ସହିତ ମାଂସ ମଧ୍ୟ ମିଳେ। ତେବେ ଅଣ୍ଡିଆ ଚିଆଁ ପାଳନ କଲେ କେବଳ ମାଂସ ହିଁ ମିଳିଥାଏ। ଏହା ମାଲିକମାନଙ୍କ ପାଇଁ ବ୍ୟୟ ବହୁଳ ହୋଇଥାଏ। ଫଳରେ ବ୍ରିଟେନରେ କେତେକ ଫାର୍ମରେ ଅଣ୍ଡିରା ଚିଆଁଙ୍କୁ ଶ୍ରେଡିଂ ମେସିନ୍ ଦ୍ୱାରା ହତ୍ୟା କରାଯାଇଥାଏ। କେତେକ ଫାର୍ମ ଏଥିପାଇଁ ଗ୍ୟାସ୍ର ବ୍ୟବହାର ମଧ୍ୟ କରାଯାଇଥାଏ। ଏହାକୁ ଦୃଷ୍ଟିରେ ରଖି ଇସ୍ରାଏଲ୍ର ଏକ ଷ୍ଟାର୍ଟଅପ୍ କମ୍ପାନୀ ସୋସ୍ ଟେକ୍ନୋଲୋଜି ପକ୍ଷରୁ ଅଣ୍ଡା ଭିତରେ ଚିଆଁଙ୍କର ଲିଙ୍ଗ ପରିବର୍ତ୍ତନ କରି ହେଉଥିବା ଜ୍ଞାନକୌଶଳ ଉପରେ ଗୁରୁତ୍ୱାରୋପ କରାଯାଇଛି। ଏନେଇ ଷ୍ଟାର୍ଟଅପ୍ ପକ୍ଷରୁ ଶବ୍ଦ ତରଙ୍ଗ ମାଧ୍ୟମରେ ଅଣ୍ଡା ଭିତରେ ଲିଙ୍ଗ ପରିବର୍ତ୍ତନ କାର୍ଯ୍ୟ କରାଯିବା ଲାଗି ଯୋଜନା କରାଯାଇଥିବା କମ୍ପାନୀର ସିଇଓ ୟାଏଲ୍ ଅଲଟର ସୂଚନା ଦେଇଛନ୍ତି। ସମ୍ପ୍ରତି ହୋଇଥିବା ଗବେଷଣାରେ ୬୦ ପ୍ରତିଶତ ମାଈ ଚିଆଁ ସୃଷ୍ଟି ହୋଇଥିବା ସେ କହିଛନ୍ତି। ଆଗାମୀ ଦିନରେ ଏହି ସଂଖ୍ୟାକୁ ବୃଦ୍ଧି କରିବା ଲାଗି ଉଦ୍ୟମ ଜାରି ରହିଥିବା ସେ କହିଛନ୍ତି। ଏବେ ଏହି ଜ୍ଞାନକୌଶଳକୁ ଇସ୍ରାଏଲ୍, ଆମେରିକା ଏବଂ ଇଟାଲୀରେ ପ୍ରୟୋଗ କରାଯାଉଛି। ୨୦୨୧ ସୁଦ୍ଧା ଫ୍ରାନ୍ସରେ ଅଣ୍ଡିରା ଚିଆଁ ଆଉ ସୃଷ୍ଟି ନ କରିବାକୁ ଯୋଜନା ପ୍ରସ୍ତୁତ ହୋଇଛି। ମାତ୍ର ଏହି ଜ୍ଞାନକୌଶଳ ନେଇ ବୈଜ୍ଞାନିକମାନଙ୍କକ ମଧ୍ୟରେ ମତ ପାର୍ଥକ୍ୟ ରହିଛି। ଏନେଇ ଜାପାନର କୟୋଟା ବିଶ୍ୱବିଦ୍ୟାଳୟର ଗବେଷକ ପ୍ରଫେସର ମାସାହିରୋ କୁମେତା କହିଛନ୍ତି ଯେ, ଶବ୍ଦ ତରଙ୍ଗ ବ୍ୟବହାର ଦ୍ୱାରା ଜନ୍ମ ହେଉଥିବା ଚିଆଁର ଗୁଣସୂତ୍ର ଦୁର୍ବଳ ହୋଇପଡୁଛି। ଏହି ଜ୍ଞାନକୌଶଳକୁ ବିଶ୍ୱସ୍ତରରେ ମାନ୍ୟତା ପ୍ରାପ୍ତ ହୋଇ ନ ଥିବା ସେ କହିଛନ୍ତି।
