ମାଥିଲି,୩୧ା୧୨(ସୁବାସ ଚନ୍ଦ୍ର ଖୁଡୁପିଆ)ଛତିଶଗଡ଼ ମୁହାଁ ଓଡ଼ିଶା ଧାନ। ଟୋକନ ଅଛି କିନ୍ତୁ ମଣ୍ଡିକୁ ଚାଷୀ ଆଣୁନାହାନ୍ତି ଧାନ। ମାଥିଲି ବ୍ଲକର ଧାନମଣ୍ଡି ଏବେ ଖାଁ ଖାଁ। ପ୍ରତିବର୍ଷ ମଣ୍ଡିରେ ଧାନ ରଖିବାକୁ ଜାଗା ମିଳୁ ନ ଥାଏ। ତେବେ ଚଳିତ ବର୍ଷ ମାଥିଲି ବ୍ଲକ ସଦର ମହକୁମାଠାରେ ଥିବା ଆର୍ଏମ୍ସିର ୨୦୦୦କୁଇଣ୍ଟାଲ ଧାନ କ୍ରୟ କରିବାକୁ ସ୍ଥିର ହୋଇଥିବା ବେଳେ ଏ ପଟେ ଚାଷୀଙ୍କ ଭିଡ଼ ନାହିଁ। କାରଣ ଓଡ଼ିଶାରେ ଧାନର ସହାୟକ ମୂଲ୍ୟ ୨୧୮୩ରୁ ୨୨୦୩ଟଙ୍କା ହୋଇ ଥିବାବେଳେ ପଡ଼ୋଶୀ ଛତିଶଗଡ଼ରେ ୩୧୦୦ଶହ ଟଙ୍କାରେ କୁଇଣ୍ଟାଲ ଦରରେ ଧାନ କିଣୁଛନ୍ତି ସରକାର। ଆଉ ଛତିଶଗଡ଼ରେ ଦଲାଲମାନେ ଓଡ଼ିଶା ଚାଷୀଙ୍କ ଘରକୁ ଆସି ୨୨୦୦ କିମ୍ବା ୨୩୦୦ଟଙ୍କାରେ ଧାନ କିଣି ନେଉଛନ୍ତି । ସେହିପରି ମଣ୍ଡି ବିଳମ୍ବରେ ଆରମ୍ଭ ହେଉଥିବାରୁ ଚାଷୀମାନେ ବିଲରୁ ହିଁ ଧାନ ବିକିବା ଆରମ୍ଭ କରିଛନ୍ତି । ଗତବର୍ଷ ଡିସେମ୍ବର ୧୪ ତୁଳନାରେ ଚଳିତ ବର୍ଷ ଡିସେମ୍ବର ୨୦ରେ ଆରମ୍ଭ ହୋଇଛି । ଏହା ପୂର୍ବରୁ ଧାନ ବିକ୍ରିକରି ଦେଇଛନ୍ତି ଚାଷୀ। ରାମାଗୁଡା ମଣ୍ଡିରେ ପ୍ରତି ସପ୍ତାହରେ ୧୫୦୦କୁଇଣ୍ଟାଲ ଧାନ କିଣିବା ଯୋଜନା ରହିଥିବା ବେଳେ ପ୍ରଥମ ସପ୍ତାହରେ ୯୦୦କୁଇଣ୍ଟାଲ, ଦ୍ୱିତୀୟ ସପ୍ତାହରେ ୭୦୦କୁଇଣ୍ଟାଲ ଧାନ କ୍ରୟ ହୋଇଛି। ସେହିପରି ସମଗ୍ର ଜିଲାରେ ଟାର୍ଗେଟଠାରୁ ୪୦ପ୍ରତିଶତ କମ୍ ବୋଲି ଜଣାପଡିଛି l ସରକାରୀ ମଣ୍ଡିରୁ ମୁହଁ ଫେରାଇ ନେଉଛନ୍ତି ଚାଷୀ। ବିଳମ୍ବରେ ମଣ୍ଡି ଆରମ୍ଭ ସାଙ୍ଗକୁ ଏପଟେ କଟ୍ନି ଛଟ୍ନି। ତେଣୁ ପଡ଼ୋଶୀ ରାଜ୍ୟର ଦଲାଲମାନଙ୍କୁ ଚଢା ଦରରେ ଧାନ ବିକ୍ରି କରୁଛନ୍ତି ଚାଷୀ।
