ଛତ୍ରପୁର,୨୩।୫(ଡି.ଏନ୍.ଏ.): ଛତ୍ରପୁର ସହରର ଅଧିଷ୍ଠାତ୍ରୀ ଦେବୀ ମା’ ରାମାୟାଣାମ୍ମା ଯାତ୍ରା ନେଇ ଉତ୍ସବ ମୁଖର ହୋଇଉଠିଛି। ମାସେ ଧରି ଚାଲିବାକୁ ଥିବା ଏହି ଯାତ୍ରାର ୧୭ତମ ଦିବସ ରବିବାର ଅସ୍ଥାୟୀ ପୀଠରେ ସନ୍ଧ୍ୟାରେ ମା’ଙ୍କ ଆଳତୀ ଦେଖିବାକୁ ଶ୍ରଦ୍ଧାଳୁଙ୍କ ପ୍ରବଳ ଭିଡ ହୋଇଥିଲା। ପରେ ମା’ଙ୍କ ଘଟ ବିରାଟ ପଟୁଆରରେ ସହରର କୋର୍ଟ ଷ୍ଟେଶନ ସାହି, ସିନେମାହଲ ସାହି, କପିଳ ସାହି ଓ ନୀଳକଣ୍ଠ ସାହି ପରିକ୍ରମା କରି ବିଳମ୍ବିତ ରାତିରେ ଅସ୍ଥାୟୀ ମଣ୍ଡପକୁ ଫେରିଥିଲା। ଏହାପରେ ଆଳତୀ ହୋଇ ଦ୍ୱାର ବନ୍ଦ କରାଯାଇଥିଲା। ପ୍ରତି ଦୁଇବର୍ଷକୁ ଥରେ ଅନୁଷ୍ଠିତ ହେଉଥିବା ଏହି ଯାତ୍ରା ଗତବର୍ଷ କରୋନା ଯୋଗୁ ଆୟୋଜନ ହୋଇପାରି ନ ଥିଲା। ଚଳିତବର୍ଷ ଯାତ୍ରା ହେଉଥିବାରୁ ଛତ୍ରପୁର ସହର ଓ ଆଖପାଖ ଅଞ୍ଚଳର ଲୋକଙ୍କ ଭିଡ ପରିଲକ୍ଷିତ ହେଉଛି। ପରମ୍ପରା ନୀତି ଅନୁସାରେ ଠାକୁରାଣୀ ମନ୍ଦିରରୁ ତଥା ଶାଶୁଘରୁ ମା’ ନିଜ ମାଙ୍କ ଘରକୁ ଆସିଥାନ୍ତି। ଏହି ସମୟରେ ଛତ୍ରପୁର ସହରରେ ଥିବା ନିଜ ମା’ଙ୍କ ଘରକୁ ଝିଅମାନେ ଆସିବା ପରମ୍ପରା ରହିଛି। ତେଣୁ ସହରରେ ପ୍ରତି ଘରେ ଘରେ ବନ୍ଧୁ ପରିଜନ ଆସିଥାନ୍ତି। ଠାକୁରାଣୀ ମନ୍ଦିରରୁ ଆଜ୍ଞାମାଳ ଅଣାଯାଇ ମା’ଙ୍କୁ ବିରାଟ ପଟୁଆରରେ ସହର ପରିକ୍ରମା କରାଯାଇ ଅସ୍ଥାୟୀ ମଣ୍ଡପ ତଥା ବାପ ଘରକୁ ଅଣାଯାଇଥାଏ। ଗୋଟିଏ ଦିନର ବିଶ୍ରାମ ପରେ ସହରରେ ମା’ଙ୍କ ଘଟ ପରିକ୍ରମା ଆରମ୍ଭ ହୋଇଥାଏ। ଘଟ ପରିକ୍ରମା ବେଳେ କାଳୀ ପ୍ରତିମା, କାଳୀ ରଣପା, ଆନ୍ଧ୍ର କାଳୀ ଏବଂ ବିଭିନ୍ନ ବେଶଧାରୀ ଦେବାଦେବୀଙ୍କ ବେଶ ସାମିଲ ହୋଇଥାନ୍ତି। ୯ ଜଣ ମହିଳା ମା’ଙ୍କ ପ୍ରତିମା ହାଣ୍ଡି ମୁଣ୍ଡରେ ଧରି ସହର ପରିକ୍ରମା କରିଥାନ୍ତି। ଏମାନେ ସମସ୍ତେ ରେଡ୍ଡୀ ସମ୍ପଦ୍ରାୟର। ଅସ୍ଥାୟୀ ମଣ୍ଡପରେ ୯ଟି ହାଣ୍ଡିରେ ମହାକାଳୀ, ତାରାଦେବୀ, ଷୋଡଷୀ, ଭୁବନେଶ୍ୱରୀ, ଛିନ୍ନମସ୍ତା, ଭୈରବୀ, ଧୂମାବତୀ, ବଗଳାମୁଖୀ, ମାତଙ୍ଗୀ, ଓ ଏକ ଫୁଲ ଚାଙ୍ଗୁଡା ସହ ଘଟସ୍ଥଳରେ ଏକ କାଳିକା ମୁଖା ପୂଜାର୍ଚ୍ଚନା ପାଉଛନ୍ତି। ଯାତ୍ରା ନେଇ ବିଭିନ୍ନ ସ୍ଥାନରେ ଆକର୍ଷଣୀୟ କଳାକୁଞ୍ଜ ସ୍ଥାପନ ହୋଇଛି। ଗତ ୬ ତାରିଖରୁ ଏହି ଯାତ୍ରା ଆରମ୍ଭ ହୋଇଥିବା ବେଳେ ଜୁନ୍ ୭ ତାରିଖରେ ଏହା ସରିବ ବୋଲି ସୂଚନା ଦିଆଯାଇଛି।
