ଭୁବନେଶ୍ୱର,୧୯।୧୦(ବ୍ୟୁରୋ): କିଛିଦିନର ନୀରବତା ପରେ ରାଜଧାନୀରେ ପୁଣି ଖଣ୍ଡା ବୁଲିଛି। ବିଶେଷକରି ବସ୍ତି ଅଞ୍ଚଳରେ ଅପରାଧୀମାନେ ଅଧିକ ସକ୍ରିୟ ହୋଇଉଠିଛନ୍ତି। ମଙ୍ଗଳବାର ସାରେ ମଞ୍ଚେଶ୍ୱର ଥାନା ଅନ୍ତର୍ଗତ ଚକେଇସିଆଣିରେ ଜଣେ ଫାଷ୍ଟଫୁଡ ଦୋକାନୀଙ୍କୁ ଦୁର୍ବୃତ୍ତମାନେ ଗୋଡ଼ାଇ ହାଣିଛନ୍ତି। ଆକ୍ରମଣର ଶିକାର ହୋଇଥିବା ବ୍ୟବସାୟୀ ହେଲେ ଏଠାରେ ରହୁଥିବା ନୟାଗଡ଼ ଜିଲା ଫତେଗଡ଼ ଥାନା ଅଞ୍ଚଳର ଜୀବନଜ୍ୟୋତି ମହାନ୍ତି (୨୫)। ଦୁର୍ବୃତ୍ତଙ୍କ ଖଣ୍ଡାଚୋଟରେ ତାଙ୍କ ଶରୀରର ବିଭିନ୍ନ ସ୍ଥାନରେ କ୍ଷତ ସୃଷ୍ଟି ହୋଇଛି। କ୍ୟାପିଟାଲ ହସ୍ପିଟାଲରେ ତାଙ୍କର ପ୍ରାଥମିକ ଚିକିତ୍ସା କରାଯିବା ପରେ ସେ ଥାନାରେ ଅଭିଯୋଗ କରିଛନ୍ତି। ଦୁର୍ବୃତ୍ତଙ୍କ ସହ ଜଣେ ପୋଲିସ ମିତ୍ରଙ୍କ ସମ୍ପୃକ୍ତି ଅଛି ବୋଲି କୁହାଯାଉଛି। ପୋଲିସ ଏନେଇ ଏକ ମାମଲା ରୁଜୁ କରି ତଦନ୍ତ ଆରମ୍ଭ କରିଛି। ତେବେ ଏହି ଘଟଣାକୁ ନେଇ ପୋଲିସର କାର୍ଯ୍ୟଧାରା ପ୍ରତି ପ୍ରଶ୍ନବାଚୀ ସୃଷ୍ଟି ହୋଇଛି।
ସୂଚନା ଅନୁଯାୟୀ, ଜୀବନଜ୍ୟୋତି ଦୀର୍ଘ ୧୦ବର୍ଷ ହେବ ଫାଷ୍ଟଫୁଡ ବ୍ୟବସାୟ କରିଆସୁଛନ୍ତି। ଗତ କିଛିଦିନ ହେଲା ସ୍ଥାନୀୟ ଅଞ୍ଚଳର ପ୍ରାୟ ୬ରୁ ୭ଜଣ ଯୁବକ ତାଙ୍କୁ ବଟି ମାଗିବା ସହ ଝଗଡ଼ା କରୁଥିଲେ। ମଙ୍ଗଳବାର ସାରେ ସେ ନିଜ ଦୋକାନ (ସାଇକୃପା ଫାଷ୍ଟଫୁଡ ଓ ଦମ୍ ବିରିୟାନୀ) ଖୋଲିଥିବାବେଳେ ୪ରୁ ୫ଜଣ ଯୁବକ ଆସି ତାଙ୍କୁ ଚାଓମିନ୍ ଖାଇବାକୁ ମାଗିଥିଲେ। ଏହି ସମୟରେ ଜୀବନଜ୍ୟୋତି ପରିବା କାଟୁଥିବାରୁ ଖାଦ୍ୟ ଦେବାରେ ବିଳମ୍ବ ହୋଇଥିଲା। ଏଥିରେ ଦୁର୍ବୃତ୍ତମାନେ ରାଗିଯାଇ ତାଙ୍କୁ ଗାଳିଗୁଲଜ କରିବା ସହ ଖଣ୍ଡାରେ ଆକ୍ରମଣ କରିଥିଲେ। ତାଙ୍କ ଚିତ୍କାର ଶୁଣି ସ୍ଥାନୀୟ ଲୋକଙ୍କ ହସ୍ତକ୍ଷେପ ପରେ ଜୀବନଜ୍ୟୋତି ଉଦ୍ଧାର ହୋଇଥିଲେ।
