ସାକ୍ଷୀଗୋପାଳ, ୧୬।୭ (କିଶୋର ମହାପାତ୍ର/ପ୍ରଶାନ୍ତ କୁମାର ବାରିକ): ସ୍ଥାନୀୟ ପ୍ରସିଦ୍ଧ ବକୁଳ ବନର ଅଧିଶ୍ୱର ଠାକୁର ଅଜା ଶ୍ରୀସିଦ୍ଧ ବଳରାମଦେବଙ୍କ ପବିତ୍ର ରଥଯାତ୍ରା ଗୁରୁବାର ଭକ୍ତିପୂତ ପରିବେଶରେ ଅନୁଷ୍ଠିତ ହୋଇଯାଇଛି। ଦୈନନ୍ଦିନ ଦେବନୀତି ଅନୁଯାୟୀ ପ୍ରାତଃ ସମୟରେ ମଙ୍ଗଳ ଆଳତୀ, ଅବକାଶ ଓ ବାଳ ଭୋଗ ଶେଷ ହେବା ପରେ ମଧ୍ୟାହ୍ନରେ ମହାପ୍ରଭୁଙ୍କ ଚକା ଛାଡ଼ ଖେଚୁଡ଼ି ଭୋଗ ସମ୍ପନ୍ନ ହୋଇଥିଲା।
ଏହାପରେ ପାରମ୍ପରିକ ଛେରା ପହଁରା ନୀତି ସରିବା ପରେ ଘଣ୍ଟ, ଘଣ୍ଟି, କାହାଳୀ ଓ ମୃଦଙ୍ଗ ବାଦ୍ୟର ଗଗନପବନ କମ୍ପା ଅଧ୍ୟାତ୍ମିକ ଧ୍ୱନି ମଧ୍ୟରେ ଠାକୁରଙ୍କ ପହଣ୍ଡି ନୀତି ଆରମ୍ଭ ହୋଇଥିଲା। ଠାକୁରଙ୍କୁ ସୁସଜ୍ଜିତ ରଥରେ ଆରୂଢ଼ କରାଯାଇ ଟାହିଆ ଲାଗି ଓ ମଙ୍ଗଳାର୍ପଣ କରାଯିବା ପରେ ଶ୍ରଦ୍ଧାଳୁ ତଥା ଛୋଟ ଛୋଟ ପିଲାମାନେ ହର୍ଷୋଲ୍ଲାସର ସହ ରଥକୁ ଟାଣି ନେଇଥିଲେ। ଚନ୍ଦନ ପୋଖରୀ ଚନ୍ଦନ ଚକଡାରେ ଠାକୁର ବିରାଜମାନ କରିଛନ୍ତି। ଆଗାମୀ ନଅ ଦିନ ପର୍ଯ୍ୟନ୍ତ ମହାପ୍ରଭୁ ଏହି ପୀଠରେ ଅବସ୍ଥାନ କରିବେ।
ସାକ୍ଷୀଗୋପାଳ ମନ୍ଦିର ପ୍ରଶାସନ ତରଫରୁ ରଥଟିକୁ ରଙ୍ଗବେରଙ୍ଗର ଫୁଲମାଳରେ ଅତି ସୁନ୍ଦର ଭାବେ ସଜାଯାଇଥିଲା। ଏହି ଅବସରରେ ରାଜ୍ୟ ସଂସ୍କୃତି ବିଭାଗର କଳାକାରମାନଙ୍କ ଦ୍ୱାରା ପାରମ୍ପରିକ ଘଣ୍ଟ ମର୍ଦ୍ଦଳ, ସଂକୀର୍ତ୍ତନ ଏବଂ ଯୋଡ଼ି ଶଙ୍ଖ ବାଦ୍ୟ ସହ ନୃତ୍ୟ ପରିବେଷଣ କରାଯାଇ ପରିବେଶକୁ ଅଧିକ ଆଧ୍ୟାତ୍ମିକ ସରସ କରିଦିଆଯାଇଥିଲା। ମହାପ୍ରଭୁଙ୍କ ଏହି ଯାତ୍ରା ସମୟରେ ତାଙ୍କର ଅତି ପ୍ରିୟ ‘ପାଚିଲା ପଣସ’ ଭୋଗ ଲଗାଯାଇଥିଲା।
ମହାପ୍ରଭୁଙ୍କ ସମସ୍ତ ଦେବନୀତି ସେବାୟତ ସୋମନାଥ ମହାପାତ୍ର, ଲୋକନାଥ ମହାପାତ୍ର, ରାଧାନାଥ ମହାପାତ୍ର, ଚନ୍ଦ୍ରଶେଖର ମହାପାତ୍ର, ଓମ୍ ପ୍ରକାଶ ମହାପାତ୍ର, ରାକେଶ ମହାପାତ୍ର ଏବଂ ଦେବଶକ୍ତି ମହାପାତ୍ରଙ୍କ ସମେତ ଅନ୍ୟାନ୍ୟ ପ୍ରମୁଖ ସେବାୟତମାନଙ୍କ ଦ୍ୱାରା ସୁଚାରୁରୂପେ ସମ୍ପାଦିତ ହୋଇଥିଲା।
ଏହାସହିତ ମନ୍ଦିର ସୁପରଭାଇଜର ବିଶ୍ୱନାଥ ମହାପାତ୍ର, ମନୋରଞ୍ଜନ ମହାନ୍ତି, କର୍ମଚାରୀ ଶିବ ପ୍ରସାଦ ସାହୁ, ସଞ୍ଜୀବ କୁମାର ବିଶ୍ୱାଳ, ନାରାୟଣ ମିଶ୍ରଙ୍କ ସମେତ ବିଶ୍ୱକର୍ମା, ମଣ୍ଡଣି ସୁଆଁସିଆ, ବାଜାବାଲା ଓ ଭୋଇ ସେବାୟତମାନେ ରଥଚଳା କାର୍ଯ୍ୟରେ ସମ୍ପୂର୍ଣ୍ଣ ସହଯୋଗ କରିଥିଲେ। ସତ୍ୟବାଦୀ ପୋଲିସ ପକ୍ଷରୁ ଶାନ୍ତିଶୃଙ୍ଖଳା ରକ୍ଷା ପାଇଁ ବ୍ୟାପକ ସୁରକ୍ଷା ବଳ ମୁତୟନ କରାଯାଇଥିଲା।
ଅନୁରୂପ ଭାବେ ଦାରୁ କ୍ଷେତ୍ର ରାୟଚକ୍ରଧରପୁର ଏବଂ ମୂଳ ଅଳସା ଗ୍ରାମରେ ମଧ୍ୟ ତିନି ଠାକୁରଙ୍କ ରଥଯାତ୍ରା ଅତ୍ୟନ୍ତ ଶାନ୍ତିଶୃଙ୍ଖଳାର ସହ ଅନୁଷ୍ଠିତ ହୋଇଯାଇଛି।