୨୦୧୯-୨୦ ଶିକ୍ଷାବର୍ଷ ଶେଷ ବେଳକୁ କୋଭିଡ୍-୧୯ ପ୍ରଭାବ ରାଜ୍ୟରେ ଅନୁଭୂତ ହୋଇଥିଲା। ଆଜି ପର୍ଯ୍ୟନ୍ତ ଶିକ୍ଷାଦାନ ଓ କ୍ଲାସ୍ରୁମ୍ ବ୍ୟବସ୍ଥା ଠିକ୍ ଭାବରେ ହୋଇପାରିନାହିଁ, ଯାହାକୁ ନେଇ ସମସ୍ତେ ଚିନ୍ତିତ। ବିଶ୍ୱସ୍ତରୀୟ ବୈଷୟିକ ଶିକ୍ଷାନୁଷ୍ଠାନ ହୋଇଥିବାରୁ ଆମ ପାଖରେ ସବୁ ପ୍ରକାର ସୁବିଧା ଓ ଅତ୍ୟାଧୁନିକ ବ୍ୟବସ୍ଥା ଉପଲବ୍ଧ। ମହାମାରୀ ପିଲାଙ୍କ ପଢ଼ାକୁ ସେତେଟା ପ୍ରଭାବିତ କରି ପାରି ନ ଥିଲେ ମଧ୍ୟ ଶିକ୍ଷାର ମାନ ଓ ଛାତ୍ରୀଛାତ୍ରଙ୍କ ମାନସିକତା ଉପରେ ବେଶ୍ ପ୍ରଭାବ ପକାଇଛି। ଏହି ସମୟରେ ଅନ୍ଲାଇନ୍ ଜରିଆରେ ଯଥାସମ୍ଭବ ସମାଧାନ ପାଇଁ ଆମେ ଉଦ୍ୟମ କରିଥିଲୁ ବୋଲି ଧରିତ୍ରୀକୁ ସାକ୍ଷାତ୍କାର ଦେବାବେଳେ କହନ୍ତି ରାଜଧାନୀର ପ୍ରତିଷ୍ଠିତ ବୈଷୟିକ ଶିକ୍ଷାନୁଷ୍ଠାନ ସି.ଭି.ରମଣ ଗ୍ରୁପ୍ ପ୍ରତିଷ୍ଠାତା ତଥା ନିର୍ଦ୍ଦେଶକ ସଞ୍ଜୀବ ରାଉତ ।
୨୦୨୧-୨୨ ଶିକ୍ଷାବର୍ଷ
ପାଇଁ ଯୋଜନା କ’ଣ?
ଚଳିତ ଶିକ୍ଷାବର୍ଷରେ ଶିକ୍ଷା ବ୍ୟବସ୍ଥାକୁ ଆହୁରି ଅତ୍ୟାଧୁନିକ କରାଯିବ। ସି.ଭି.ରମଣ ଗ୍ଲୋବାଲ ୟୁନିଭର୍ସିଟି ଦ୍ୱାରା ବିଶ୍ୱସ୍ତରୀୟ ଶିକ୍ଷା ପ୍ରଦାନ ନେଇ ଅନେକ ଯୋଜନା କରାଯାଇଛି। ୧୭ ଦେଶର ଛାତ୍ରୀଛାତ୍ର ଆମ ସହ ଜଡ଼ିତ ଅଛନ୍ତି। ବିଭିନ୍ନ ଦେଶର ବିଶିଷ୍ଟ ଶିକ୍ଷାବିତ୍ମାନେ ଏଠାରେ ଶିକ୍ଷାଦାନ କରିବାକୁ ସହମତି ପ୍ରକାଶ କରିଛନ୍ତି। ଶିକ୍ଷା କେବଳ ଚାକିରି ପାଇଁ ନୁହେଁ, ଶିକ୍ଷାର ଅନ୍ୟ ନାମ ସମାଜ ଗଠନ। ଏଥିପାଇଁ ଭଲ ମଣିଷ ଆବଶ୍ୟକ। ଭଲ ମଣିଷ ଗଢ଼ିବା ହେଉଛି ଆମର ମୂଳଲକ୍ଷ୍ୟ। ଅଭିଭାବକଙ୍କ ଭରସା ଓ ଭଲ ପାଇବା ରହିଛି।
ମହାମାରୀ ବେଳେ ଅନୁଷ୍ଠାନର
କର୍ମଚାରୀ କିଭଳି ପ୍ରଭାବିତ ହୋଇଥିଲେ?
ମହାମାରୀ ସିକ୍ୟୁରିଟି ଗାର୍ଡରୁ ସୁପରିଟେଣ୍ଡେଣ୍ଟଙ୍କ ପର୍ଯ୍ୟନ୍ତ ସମସ୍ତଙ୍କ ମନରେ ଆଶଙ୍କା ଓ ଭୟ ସୃଷ୍ଟି କରିଥିଲା। କାହାକୁ ଛଟେଇ କରାଯିବ ନାହିଁ ବୋଲି ସେମାନଙ୍କୁ ଆଶ୍ୱାସନା ଦେଇଥିଲି। ସମୟକୁ ଅପେକ୍ଷା କରିବା ସହ ଅନୁଷ୍ଠାନର ଅଭିବୃଦ୍ଧି ପାଇଁ ଦିନରାତି ଏକ କରିବାର ଆହ୍ବାନ ରହିଥିଲା। ମହାମାରୀର ପ୍ରଭାବ ବିଶେଷ ଅନୁଭବ ହୋଇ ନ ଥିଲେ ମଧ୍ୟ କିଛି ମାସ ପାଇଁ ଦୂରତା ବଢ଼ିଯାଇଥିଲା, ଯାହା ଏବେ ଧୀରେ ଧୀରେ ଫେରିଆସୁଛି।
ଚଳିତ ବଜେଟରେ
ଶିକ୍ଷା ପାଇଁ କ’ଣ ଅଛି?
୨୦୨୧-୨୨ ସାଧାରଣ ବଜେଟ ଏକ ବହୁମୁଖୀ ବଜେଟ। ଏହା ଶିକ୍ଷା ବ୍ୟବସ୍ଥାକୁ ଆହୁରି ଶକ୍ତିଶାଳୀ କରିବ। ସରକାର ଦେଶର ଶିକ୍ଷା ସମେତ ଅର୍ଥ ବ୍ୟବସ୍ଥାକୁ ସଜାଡ଼ିବା ପାଇଁ ବ୍ୟବସାୟ ଓ ବଜାର ଚାହିଦାକୁ ପୂରଣ କରିବା ଉଦ୍ଦେଶ୍ୟରେ ଏହି ମହତକାଂକ୍ଷୀ ବଜେଟ ଉପସ୍ଥାପନ କରାଯାଇଛି।
ଭୁବନେଶ୍ୱରରେ ଥିବା ବୈଷୟିକ
ଶିକ୍ଷାନୁଷ୍ଟାନଗୁଡ଼ିକୁ କିପରି ଦେଖୁଛନ୍ତି?
ଶିକ୍ଷାନୁଷ୍ଠାନର ବିକାଶ ପାଇଁ ମାନସିକତାରେ ପରିବର୍ତ୍ତନ ଜରୁରୀ। କାହାକୁ ଗାଳି ନ ଦେଇ ନିଜକୁ ଶ୍ରେଷ୍ଠ କରି ଗଢ଼ିତୋଳିବା ଉପରେ ଧ୍ୟାନ ଦେବା ଭଲ। ଯେଉଁ ଶିକ୍ଷାନୁଷ୍ଠାନ ସମାଜ ମଙ୍ଗଳ ପାଇଁ ଛାତ୍ରୀଛାତ୍ରଙ୍କ ଶକ୍ତିର ସଦୁପଯୋଗ କରିପାରୁଛି ସଫଳତା ତା’ର ପଦ ଚୁମ୍ବନ କରିବ।
ସି.ଭି.ରମଣର ସଫଳତାର ଶ୍ରେୟ କାହାକୁ ଦେବେ?
ସି.ଭି.ରମଣର ଆରମ୍ଭ ପଛରେ ମୋତେ ସହଯୋଗ କରିଥିବା ଶୁଭେଚ୍ଛୁଙ୍କ ହାତ ଓ ଭଗବାନଙ୍କ ଆଶୀର୍ବାଦ ରହିଛି। ପରିବାରର ଭଲ ପାଇବା ଓ ଭରସା ସହିତ ଅନୁଷ୍ଠାନ କର୍ମଚାରୀଙ୍କ ନିଷ୍ଠାପରତା ଏବଂ ଅଭିଭାବକଙ୍କ ସହଯୋଗକୁ ମଧ୍ୟ ସଫଳତାର ଶ୍ରେୟ ଦିଆଯିବ। ମୋ ପ୍ରତିଦ୍ୱନ୍ଦ୍ୱୀ ଓ ଶୁଭଚିନ୍ତକଙ୍କ ପାଇଁ ଆଜି ସଫଳ ହୋଇପାରିଛି। କଠିନ ପରିଶ୍ରମ ଓ ଦୃଢ଼ ମାନସିକତା ସହିତ ଲୋକସମ୍ପର୍କ ମଧ୍ୟ ସଫଳତାର ଅନ୍ୟ କାରଣ ମଧ୍ୟରେ ରହିଛି।
