ଅନୁଗୋଳ ଅଫିସ, ୨୨।୧୨ ଅନୁଗୋଳ ଜିଲା ମୁଖ୍ୟ ଚିକିତ୍ସାଳୟରେ ସରକାରଙ୍କ ନିର୍ଦ୍ଦେଶକୁ ଠିକ୍ ଭାବେ କାର୍ଯ୍ୟକାରୀ କରାଯାଉ ନାହିଁ। କେତେବେଳେ ବଦଳି ନିର୍ଦ୍ଦେଶର ପାଳନ ହେଉ ନାହିଁ ତ ପୁଣି କେବେ ବଦଳି ନ କରିବାକୁ ଚିଠି ଆସିଥିବା ସତ୍ତ୍ୱେ ତାହାକୁ ଅମାନ୍ୟ କରି ବଦଳି କରାଯାଉଛି। ଅଭିଯୋଗ ଅନୁଯାୟୀ, ରାଜ୍ୟ ସରକାରଙ୍କ ପକ୍ଷରୁ ଗତ ଜାନୁୟାରୀ ୨୫ ତାରିଖରେ ଅନୁଗୋଳ ଜିଲା ମୁଖ୍ୟ ଚିକିତ୍ସା ଅଧିକାରୀ (ସିଡିଏମ୍ଓ)ଙ୍କ ନିକଟକୁ ଚିଠି (ନଂ ୨୧୮୫) ଆସିଥିଲା। ବିଭିନ୍ନ ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରରେ ଏନ୍ଏଚ୍ଏମ୍ ଏବଂ ଅନ୍ୟ ସ୍କିମ୍ରେ ଚାକିରି କରିଥିବା କର୍ମଚାରୀମାନଙ୍କୁ ସ୍ଥାୟୀ ପାରାମେଡିକାଲ ଷ୍ଟାଫ ଭାବେ ଥଇଥାନ କରାଯିବ ବୋଲି କୁହାଯାଇଥିଲା। ଏପରି କି ସେମାନଙ୍କୁ ବଦଳି କରିବାକୁ ସରକାରଙ୍କ ପକ୍ଷରୁ ଚିଠିରେ ବାରଣ କରାଯାଇଥିଲା। ତଦନୁଯାୟୀ ଜିଲାର ବିଭିନ୍ନ ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରରେ କାର୍ଯ୍ୟରତ ୨୮ ଜଣ କର୍ମଚାରୀଙ୍କ ଚାକିରି ସ୍ଥାୟୀ ହୋଇଗଲା। ମାତ୍ର ବଦଳି ନ କରିବାକୁ ସ୍ପଷ୍ଟ ନିର୍ଦ୍ଦେଶ ରହିଥିବା ସତ୍ତ୍ୱେ ୬ ମାସ ପର୍ଯ୍ୟନ୍ତ ଚିଠି ଚପାଇ ରଖିଥିବା କର୍ତ୍ତୃପକ୍ଷ ଜୁନ୍ ୪ ତାରିଖରେ ସିଡିଏମ୍ଓଙ୍କ କାର୍ଯ୍ୟାଳୟରୁ ଚିଠି ନଂ- ୧୦୭୫ରେ ମାତ୍ର ୪/୫ଜଣଙ୍କୁ ବାଦଦେଇ ଅନ୍ୟମାନଙ୍କ ବଦଳି କରିଦେଲେ। ସିଡିଏମ୍ଓଙ୍କ କାର୍ଯ୍ୟାଳୟର ଜଣେ ବରିଷ୍ଠ କର୍ମଚାରୀ ଏପରି ବେଆଇନ କାର୍ଯ୍ୟ କରିଥିବା କୁହାଯାଉଥିବା ବେଳେ ସରକାରୀ ନିର୍ଦ୍ଦେଶକୁ ସିଡିଏମ୍ଓ କିପରି ଉଲ୍ଲଂଘନ କରି ଚିଠିରେ ଦସ୍ତଖତ କଲେ ତାହା ଚର୍ଚ୍ଚାର ବିଷୟ ହୋଇଛି। ସିଡିଏମ୍ ତ୍ରିଲୋଚନ ପ୍ରଧାନଙ୍କ ସହ ଯୋଗାଯୋଗ ହୋଇ ନ ପାରିବାରୁ ମତାମତ ମିଳିପାରି ନାହିଁ। ଏ ସମ୍ପର୍କରେ ଜିଲା ପ୍ରଶାସନର ଜଣେ ବରିଷ୍ଠ ଅଧିକାରୀ କହିଛନ୍ତି, ଘଟଣାର ଅନୁଧ୍ୟାନ କରାଯାଇ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ।
