ଚଣ୍ଡିଗଡ଼,୨୦।୯: ଚଣ୍ଡିଗଡ଼ ବିଶ୍ୱବିଦ୍ୟାଳୟ ହଷ୍ଟେଲ ଓ୍ବାଶ୍ରୁମ୍ରୁ ଛାତ୍ରୀଙ୍କ ଆପତ୍ତିଜନକ ଭିଡିଓ ଭାଇରାଲ ହେବା ଅଭିଯୋଗର ତଦନ୍ତ ପାଇଁ ପଞ୍ଜାବ ପୋଲିସ ୩ ଜଣିଆ ସ୍ବତନ୍ତ୍ର ତଦନ୍ତକାରୀ ଟିମ୍ (ଏସ୍ଆଇଟି) ଗଠନ କରିଛି। ବରିଷ୍ଠ ଆଇପିଏସ୍ ଅଫିସର ଗୁରପ୍ରୀତ୍ କୌର ଦେଓଙ୍କ ତତ୍ତ୍ୱାବଧାନରେ ଗଠିତ ଟିମ୍ରେ ସମସ୍ତ ସଦସ୍ୟ ମହିଳା ଅଛନ୍ତି। ଭିଡିଓ ଭାଇରାଲ ଘଟଣାରେ ସମ୍ପୃକ୍ତ କୌଣସି ବ୍ୟକ୍ତିଙ୍କୁ ଛଡ଼ାଯିବ ନାହିଁ ବୋଲି ପଞ୍ଜାବ ପୋଲିସ ଡିଜି ଗୌରବ ଯାଦବ କହିଛନ୍ତି। ଅନ୍ୟପକ୍ଷେ ଏହି ଘଟଣାରେ ବିଦେଶୀ ଲିଙ୍କ୍ ଥିବା ଅଭିଯୋଗ ହୋଇଛି। ଜଣେ ଛାତ୍ରୀ ଅଭିଯୋଗ କରିଛନ୍ତି ଯେ, ତାଙ୍କୁ ଜଣେ ବିଦେଶରୁ ଫୋନ୍ କରି ଚୁପ୍ ରହିବାକୁ ଧମକ ଦେଇଥିଲେ। ଯଦି ଏଭଳି ନ କର ତେବେ ତୁମର ବି ଭିଡ଼ିଓ ଭାଇରାଲ କରାଯିବ ବୋଲି ଧମକ ଦେଇଥିଲେ। ତେବେ ଏହି ତଥ୍ୟ ସାମ୍ନାକୁ ଆସିବ ପରେ ପୋଲିସ ଏହି ମାମଲାରେ ବିଦେଶୀ ଲିଙ୍କ୍ ନେଇ ମଧ୍ୟ ଖୋଳତାଡ଼ କରିବ।
ଅନ୍ୟପକ୍ଷେ ଭିଡିଓ ଲିକ୍ ପରେ ୟୁନିଭର୍ସିଟିର ଛାତ୍ରୀମାନେ ଓ୍ବାଶ୍ରୁମ୍ ବ୍ୟବହାର କରିବାକୁ ଭୟ କରୁଛନ୍ତି। ଅନେକ ଛାତ୍ରୀ ହଷ୍ଟେଲ ଛାଡ଼ି ଘରକୁ ପଳାଇଛନ୍ତି।
ଆପତ୍ତିଜନକ ଭିଡିଓ ଭାଇରାଲ ଏବଂ କେତେଜଣ ଛାତ୍ରୀ ଆତ୍ମହତ୍ୟା କରିବା ଖବର ପ୍ରକାଶ ପରେ ଶନିବାର ରାତିରେ ୟୁନିଭର୍ସିଟି କ୍ୟାମ୍ପ୍ରେ ବିକ୍ଷୋଭ ପ୍ରଦର୍ଶନ କରାଯାଇଥିଲା। ଉତ୍ତେଜନା ଲାଗିରହିଥିବାରୁ ବିଶ୍ୱବିଦ୍ୟାଳୟକୁ ୨୪ ତାରିଖ ପର୍ଯ୍ୟନ୍ତ ବନ୍ଦ ରଖାଯାଇଛି। ଭିଡିଓ ଭାଇରାଲ କରିଥିବା ଛାତ୍ରୀଙ୍କ ସମେତ ୩ ଜଣଙ୍କୁ ଗିରଫ କରାଯିବା ପରେ ଅଧିକ ପଚରାଉଚରା ପାଇଁ ସେମାନଙ୍କୁ ୭ ଦିନ ପାଇଁ ପୋଲିସ ହାଜତକୁ ପଠାଇ ଦିଆଯାଇଛି।
