ନୂଆଦିଲ୍ଲୀ: ଆଇସିଆଇସିଆଇ ବ୍ୟାଙ୍କ ଏବଂ ଭିଡିଓକନ ବେଆଇନ ଅର୍ଥ କାରବାର ମାମଲାରେ ବ୍ୟାଙ୍କର ପୂର୍ବତନ ସିଇଓ ଚନ୍ଦା କୋଚ୍ଚରଙ୍କୁ ଆଶ୍ୱସ୍ତି ମିଳିଛି। ବେଆଇନ ଅର୍ଥ କାରବାର ନିରୋଧୀ ଆଇନ(ପିଏମ୍ଏଲ୍ଏ)ର ସ୍ବତନ୍ତ୍ର କୋର୍ଟ ଚନ୍ଦାଙ୍କୁ ଶୁକ୍ରବାର ଜାମିନ ପ୍ରଦାନ କରିଥିବା ଜଣାପଡିଛି। ପ୍ରବର୍ତ୍ତନ ନିର୍ଦ୍ଦେଶାଳୟ(ଇଡି)ର ମାମଲାରେ ଚନ୍ଦା କୋଚ୍ଚର, ତାଙ୍କ ସ୍ବାମୀ ଦୀପକ କୋଚ୍ଚର, ଭିଡିଓକନ ଗ୍ରୁପ୍ ଅଫ୍ କମ୍ପାନୀର ପ୍ରମୋଟର ବେଣୁଗୋପାଳ ଧୂତଙ୍କୁ ପକ୍ଷଭୁକ୍ତ କରାଯାଇଥିଲା। ଚନ୍ଦା କୋଚ୍ଚର ତାଙ୍କ ଓକିଲ ବିଜୟ ଅଗ୍ରଓ୍ବାଲଙ୍କ ଦ୍ୱାରା ଏ.ଏ. ନନ୍ଦଗାଓଁକରଙ୍କ ନିକଟରେ ଜାମିନ ଲାଗି ଆବେଦନ କରିଥିଲେ। ୫ ଲକ୍ଷ ଟଙ୍କା ବଣ୍ଡ୍ରେ ଅଦାଲତ ତାଙ୍କୁ ଜାମିନ ଦେଇଛନ୍ତି। କୋଚ୍ଚର, ଧୂତ ଏବଂ ଅନ୍ୟ ବ୍ୟକ୍ତିବିଶେଷଙ୍କ ନାମରେ କେନ୍ଦ୍ରୀୟ ତଦନ୍ତ ବ୍ୟୁରୋ(ସିବିଆଇ) ଏଫ୍ଆଇଆର୍ ଦାୟର କରିଥିଲା। ଆପରାଧିକ ମାମଲା ଦାୟର ହେବା ପରେ ଇଡି ୨୦୨୦ ସେପ୍ଟେମ୍ବରରେ ଚନ୍ଦାଙ୍କୁ ଗିରଫ କରିଥିଲା। ସୂଚନାଯୋଗ୍ୟ, ଭିଡିଓକନ ଗ୍ରୁପ୍ ଋଣ ପ୍ରଦାନ ଦ୍ୱାରା ଚନ୍ଦାଙ୍କ ସ୍ବାମୀ ଦୀପକ କୋଚ୍ଚରଙ୍କ କମ୍ପାନୀ ନ୍ୟୁ ପାଓ୍ବାର ରିନୁଏବଲ ଲିମିଟେଡ୍ ଅନୁକମ୍ପା ଭାବେ ୬୪ କୋଟି ଟଙ୍କା ଲାଭ କରିଥିବା ତଦନ୍ତକାରୀ ଏଜେନ୍ସି ଅଭିଯୋଗ କରିଛନ୍ତି।
