ମୁମ୍ବାଇ: ଆଇସିଆଇସିଆଇ ବ୍ୟାଙ୍କ ଏବଂ ଭିଡିଓକନ ଋଣ ମାମଲାରେ ବ୍ୟାଙ୍କର ପୂର୍ବତନ ସିଇଓ ଚନ୍ଦା କୋଚ୍ଚର ଏବଂ ତାଙ୍କ ସ୍ବାମୀ ଦୀପକ କୋଚ୍ଚରଙ୍କ ବିରୋଧରେ ପ୍ରବର୍ତ୍ତନ ନିର୍ଦ୍ଦେଶାଳୟ(ଇଡି) ଚାର୍ଜଶିଟ କରିଛି। ଚାର୍ଜଶିଟରେ ଭିଡିଓକନ ଗ୍ରୁପ୍ ପ୍ରମୋଟର ବେଣୁଗୋପାଳ ଧୂତଙ୍କ ସମେତ ଅନ୍ୟ ୭ ଜଣକ ନାମ ରହିଛି। ଚାର୍ଜଶିଟ୍କୁ ଇଡି ଅଦାଲତରେ ଦାଖଲ କରିଛି। ଏହି ମାମଲାରେ ଦୀପକ କୋଚ୍ଚରଙ୍କୁ ଚଳିତ ବର୍ଷ ସେପ୍ଟେମ୍ବରରେ ଗିରଫ କରାଯାଇଥିଲା। କେନ୍ଦ୍ରୀୟ ତଦନ୍ତ ବ୍ୟୁରୋ (ସିବିଆଇ) ମାମଲା ଦାଏର କରିବା ପରେ ଇଡି ଏହି ମାମଲା ଉପରେ ଅଧିକ ଖୋଳତାଡ କରିବା ଲାଗି ପ୍ରକ୍ରିୟା ଜାରି ହୋଇଥିଲା। ଚନ୍ଦା କୋଚ୍ଚର, ଦୀପକ କୋଚ୍ଚରଙ୍କ ସମେତ ଅନ୍ୟମାନଙ୍କ ବିରୋଧରେ ଆପରାଧିକ ମାମଲା ମଧ୍ୟ ରୁଜୁ କରାଯାଇଥିଲା।
୧୧ ନଭେମ୍ବରରେ ଏହି ମାମଲାର ଶୁଣାଣି ହେବ ବୋଲି ଜଣାପଡିଛି। ସୂଚନାଯୋଗ୍ୟ, ଆଇସିଆଇସିଆଇ ବ୍ୟାଙ୍କ ଭିଡିଓକନ ଗ୍ରୁପ୍କୁ ୧୮୭୫ କୋଟି ଟଙ୍କାର ଋଣ ପ୍ରଦାନ କରିଛି। ୨୦୦୯ରୁ ୨୦୧୧ ମଧ୍ୟରେ ଏହି ଋଣ ଦିଆଯାଇଥିଲା। ବ୍ୟାଙ୍କ ପକ୍ଷରୁ ମୋଟ ୬ଟି ଋଣକୁ ମଞ୍ଜୁରୀ ଦିଆଯାଇଥିଲା। ଏହି ପ୍ରକ୍ରିୟାରେ ବିଭିନ୍ନ ପ୍ରସଙ୍ଗକୁ ଅଣଦେଖା କରାଯାଇଥିବା ପ୍ରକ୍ରିୟା ସହ ଜଡିତ ଜଣେ ଅଧିକାରୀ କହିଛନ୍ତି। ଏଭଳି ବିଭିନ୍ନ ପ୍ରମାଣ ଇଡି କୋର୍ଟଙ୍କ ସାମ୍ନାରେ ରଖିଛି। ଇଡି ବର୍ତ୍ତମାନ କୋଚ୍ଚରଙ୍କ ପରିବାରର ସମ୍ପତ୍ତିକୁ ଜବତ କରିଛି। ଚନ୍ଦା କୋଚ୍ଚର ସେହି ସମୟରେ ଋଣ ପ୍ରଦାନ କରୁଥିବା କମିଟିରେ ସାମିଲ ଥିଲେ। ଭିଡିଓକନ ଗ୍ରୁପ୍କୁ ଋଣ ପ୍ରଦାନ ଦ୍ୱାରା ଚନ୍ଦାଙ୍କ ସ୍ବାମୀ ଦୀପକ କୋଚ୍ଚରଙ୍କ କମ୍ପାନୀକୁ ଅର୍ଥ ରାଶି ମିଳିଥିବା ମଧ୍ୟ ତଦନ୍ତରୁ ସାମ୍ନାକୁ ଆସିଛି।
