ପୋର୍ଟେ (ପର୍ତ୍ତୁଗାଲ), ୩୧।୫(ଏପି)-ହାଇପ୍ରୋଫାଇଲ ଫୁଟ୍ବଲ ପ୍ରତିଯୋଗିତା ଚାମ୍ପିୟନ୍ସ ଲିଗ୍ରେ ଦ୍ୱିତୀୟଥର ପାଇଁ ଚେଲ୍ସି ଚାମ୍ପିୟନ ହେବାର ଗୌରବ ଅର୍ଜନ କରିଛି। ସ୍ଥାନୀୟ ଇଷ୍ଟାଡିଓ ଡୋ ଡ୍ରାଗାଓ ଷ୍ଟାଡିୟମରେ ଶନିବାର ଖେଳାଯାଇଥିବା ଲିଗ୍ର ଫାଇନାଲ ମ୍ୟାଚ୍ରେ ଚେଲ୍ସି ୧-୦ ଗୋଲରେ ମାଞ୍ଚେଷ୍ଟର ସିଟିକୁ ପରାସ୍ତ କରି ବାଜି ମାରିଛି। ପୂର୍ବରୁ ୯ ବର୍ଷ ତଳେ ଚେଲ୍ସି ଏହି ଟାଇଟଲ ହାସଲ କରିଥିଲା। କ୍ଲବରେ କୋଚ୍ ଥୋମାସ ଟୁଚେଲ ଯୋଗ ଦେବାର ଠିକ୍ ୧୨୩ ଦିନ ପରେ ଚେଲ୍ସିକୁ ଏହି ଐତିହାସିକ ସଫଳତା ମିଳିଛି। ୨୦୧୨ରେ ଚେଲ୍ସି ଏହି ଲିଗ୍ରେ ଚାମ୍ପିୟନ ହୋଇଥିଲା।
ପାଖାପାଖି ୧୪ ହଜାର ଦର୍ଶକଙ୍କ ସମ୍ମୁଖରେ ଅନୁଷ୍ଠିତ କଡ଼ା ସଂଘର୍ଷପୂର୍ଣ୍ଣ ଉକ୍ତ ମ୍ୟାଚ୍ରେ ଇଂଲଣ୍ଡର ଏହି ଦୁଇ କ୍ଲବ ମଧ୍ୟରେ ଜବରଦସ୍ତ ରୋମାଞ୍ଚ ଦେଖିବାକୁ ମିଳିଥିଲା। ଫାଇନାଲରେ ଚେଲ୍ସିର ୬ ହଜାର ଦର୍ଶକ ମଧ୍ୟ ଉପସ୍ଥିତ ଥିଲେ। ଜର୍ମାନୀ ଫରଓ୍ବାର୍ଡ କାଇ ହାଭେର୍ଜ ୪୨ତମ ମିନିଟ୍ରେ ଏହି ନିର୍ଣ୍ଣାୟକ ଗୋଲ ସ୍କୋର କରିଥିଲେ। ଏଥିସହିତ ମାଞ୍ଚେଷ୍ଟର ସିଟିର ଟାଇଟଲ ଆଶା ଧୂଳିସାତ୍ ହୋଇଛି। ମାଞ୍ଚେଷ୍ଟର ସିଟି ଟାଇଟଲ ଫେଭରାଇଟ ବିବେଚିତ ହେଉଥିଲେ ମଧ୍ୟ ଶେଷରେ ନିରାଶ ହୋଇଛି। ପ୍ରଥମେ ଏହି ଫାଇନାଲ ମ୍ୟାଚ୍ ତୁର୍କୀ ଇସ୍ତାନବୁଲ୍ରେ ଖେଳାଯିବାର କାର୍ଯ୍ୟକ୍ରମ ଥିଲା। କିନ୍ତୁ କୋଭିଡ୍-୧୯ ପାଇଁ ସେଠାରେ ଯାତ୍ରାଜନିତ କଟକଣା ଜାରି କରାଯାଇଥିବାରୁ ଶେଷରେ ଏହି ମ୍ୟାଚ ପୋର୍ଟୋରେ ଆୟୋଜନ କରିବାକୁ ନିଷ୍ପତ୍ତି ନିଆଯାଇଥିଲା।
ଏହାପୂର୍ବରୁ ସେମିଫାଇନାଲରେ ଚେଲ୍ସି ୧୩ଥର ଚାମ୍ପିୟନ୍ସ ଲିଗ୍ ସେମିଫାଇନାଲରେ ପ୍ରବେଶ କରିଥିବା ରିୟଲ ମାଡ୍ରିଡ୍କୁ ହରାଇ ଫାଇନାଲକୁ ଉଠିଥିଲା। ଅପରପକ୍ଷରେ ମାଞ୍ଚେଷ୍ଟର ସିଟି ସେମିଫାଇନାଲରେ ଗତ ସଂସ୍କରଣର ରନର୍ସଅପ୍ ପ୍ୟାରିସ ସେଣ୍ଟ ଜର୍ମାନ (ପିଏସ୍ଜି)କୁ ୨-୦ ଗୋଲରେ ହରାଇ ପ୍ରଥମଥର ଲିଗ୍ ଫାଇନାଲରେ ପ୍ରବେଶ କରିଥିଲା। ମାଞ୍ଚେଷ୍ଟର ସିଟି ମଧ୍ୟ ଇଂଲିଶ ପ୍ରିମିୟର ଲିଗ୍ ଚାମ୍ପିୟନ ରହିଛି। ମ୍ୟାଚ୍ରେ ଏକମାତ୍ର ଗୋଲ ସ୍କୋର କରିଥିବା ହାଭେର୍ଜ ନିଜ ପ୍ରଦର୍ଶନରେ ଖୁସି ଜାହିର କରିଛନ୍ତି। ସେହିପରି ଚେଲ୍ସି କୋଚ୍ ଟୁଚେଲ ମଧ୍ୟ ଖୁସି ବ୍ୟକ୍ତ କରିଛନ୍ତି। ବିଜୟ ପାଇଁ ସବୁବେଳେ ବ୍ୟଗ୍ର ରହିଥାଏ ଓ ଆଗାମୀ ସେସନରେ ମଧ୍ୟ ଆମେ ଟାଇଟଲ ହାସଲ କରିବୁ ବୋଲି ଟୁଚେଲ କହିଛନ୍ତି। ଏହି ବିଜୟ ଚେଲ୍ସି ପାଇଁ ଏକ ବଡ଼ ଉପଲବ୍ଧି ଆଣି ଦେଇଛି ବୋଲି ଅଧିନାୟକ ସିଜର ଅଜିପିଲିକୁଏଟା କହିଛନ୍ତି। ଆଗାମୀ ଦିନରେ ଏହି ସଫଳତା ଭଲ ପ୍ରଦର୍ଶନ କରିବାକୁ ପ୍ରେରଣା ଯୋଗାଇବ ବୋଲି ସେ କହିଛନ୍ତି।
