ତେଲଙ୍ଗାନା ପ୍ରଦୂଷଣ ନିୟନ୍ତ୍ରଣ ବୋର୍ଡର ମେମ୍ବର ସେକ୍ରେଟାରି ତଥା ଆଇଏଏସ୍ ଅଧିକାରୀ ନୀତୁ କୁମାରୀ ପ୍ରସାଦଙ୍କ ପାଇଁ ଅଡୁଆ ବଢିଛି। ତାଙ୍କୁ ପଦବୀରୁ ହଟାଇବା ଲାଗି ରାଜ୍ୟ ସରକାରଙ୍କୁ ନିର୍ଦ୍ଦେଶ ଦେବା ସକାଶେ ଜଣେ ସାମାଜିକ କର୍ମୀ ତେଲଙ୍ଗାନା ଉଚ୍ଚନ୍ୟାୟାଳୟରେ ପିଟିଶନ ଦାଏର କରିଛନ୍ତି। କୋର୍ଟର ଏକ ଡିଭିଜନାଲ ବେଞ୍ଚ୍ ମଧ୍ୟ ଏହି ପିଟିଶନର ଶୁଣାଣି କରିବାକୁ ଗ୍ରହଣ କରିଛନ୍ତି। ସୁପ୍ରିମକୋର୍ଟଙ୍କ ଅନୁଯାୟୀ,ଏହି ପଦବୀ ଲାଗି ପରିବେଶ, ଜଙ୍ଗଲ ଏବଂ ବିଜ୍ଞାନ ବିଷୟରେ ବାଧ୍ୟତାମୂଳକ ଯୋଗ୍ୟତା ଏକ ବୈଧାନିକ ଆବଶ୍ୟକତା। ହେଲେ ପ୍ରସାଦ ତାହା ହାସଲ କରିନାହାନ୍ତି ବୋଲି ସମାଜସେବୀ ଜଣକ ଅଭିଯୋଗ କରିଛନ୍ତି। ପ୍ରାରମ୍ଭରୁ ବୋର୍ଡର ମେମ୍ବର ସେକ୍ରେଟାରି ଓ ଅଧ୍ୟକ୍ଷ ପଦବୀରେ ନିଯୁକ୍ତି ପାଇଁ ପ୍ରାର୍ଥୀ ଚୟନ ସକାଶେ ସ୍ଥିରୀକୃତ ଗାଇଡ୍ଲାଇନ୍ର ବୈଧତା ଉପରେ ପ୍ରଶ୍ନ ଉଠାଇ ରାଜ୍ୟ ଉଚ୍ଚନ୍ୟାୟାଳୟରେ ସମାନ ପ୍ରକାରର ଜନସ୍ବାର୍ଥ ମାମଲା ଦାଏର କରାଯାଇଥିଲା। ଏହାର ବିଚାର କରି ଉଚ୍ଚନ୍ୟାୟାଳୟ ନିର୍ଦ୍ଦେଶ ଦେଇଥିଲେ ଯେ, ଏହି ପଦବୀ ଲାଗି ରାଜ୍ୟ ସରକାର କେବଳ ଆଇଏଏସ୍ ଓ ଆଇଏଫ୍ଏସ୍ରୁ ଚୟନ କରିପାରିବେ ନାହିଁ। ପୁନଶ୍ଚ କୋର୍ଟ ମଧ୍ୟ ସୂଚାଇ ଦେଇଥିଲେ ଯେ, ଆଇଏଏସ୍ ଏବଂ ଆଇଏଫ୍ଏସ୍ଙ୍କ ନିଯୁକ୍ତି ବୋର୍ଡର କାର୍ଯ୍ୟକଳାପକୁ ପ୍ରଭାବିତ କରିବ। ମେମ୍ବର ସେକ୍ରେଟାରି ପଦବୀରେ ସର୍ବନିମ୍ନ କାର୍ଯ୍ୟକାଳ ଦୁଇରୁ ତିନି ବର୍ଷ ରହିବାର ଆବଶ୍ୟକତା ଥିବାବେଳେ ଯେହେତୁ ସରକାର ଏହି ଅଧିକାରୀମାନଙ୍କୁ ଲଗାତର ବଦଳି କରୁଛନ୍ତି ସେଥିପାଇଁ ବୋର୍ଡ କାର୍ଯ୍ୟରେ ବାଧା ଉପୁଜିବ ବୋଲି କୋର୍ଟ ଦର୍ଶାଇଥିଲେ। ଏ ଦୃଷ୍ଟିରୁ ଏବେ ପ୍ରସାଦଙ୍କ ନିଯୁକ୍ତିକୁ ନେଇ ଦାଏର ହୋଇଥିବା ପିଟିଶନ ଉପରେ କିଛି ଭିନ୍ନ ପରିଣାମ ଆସିବାର ସମ୍ଭାବନା ନାହଁି।
ରପ୍ତାନି ଟାର୍ଗେଟ୍
ଭାରତର ଦୁର୍ବଳ ରପ୍ତାନି ସ୍ଥିତିକୁ ସୁଧାରିବା ଲାଗି ବାଣିଜ୍ୟ ମନ୍ତ୍ରଣାଳୟର ପୁନର୍ଗଠନ ଆବଶ୍ୟକ। ଜଣାପଡ଼ିଛି ଯେ, ନିକଟରେ ବରିଷ୍ଠ ଅଧିକାରୀଙ୍କ ସହ ଆୟୋଜିତ ବୈଠକରେ ବାଣିଜ୍ୟ ମନ୍ତ୍ରୀ ପୀୟୂଷ ଗୋଏଲ ମନ୍ତ୍ରଣାଳୟ ପୁନର୍ଗଠନର ଆବଶ୍ୟକତା ଉପରେ ଅଧିକ ଗୁରୁତ୍ୱ ଦେଇଛନ୍ତି। ବିଶ୍ୱ ବାଣିଜ୍ୟରେ ରହିଥିବା ସୁବିଧା ସୁଯୋଗରୁ ଲାଭ ଉଠାଇବା ପାଇଁ ମନ୍ତ୍ରଣାଳୟର ପୁନର୍ଗଠନ ଦରକାର ବୋଲି ଗୋଏଲ ଜୋର୍ ଦେଇଛନ୍ତି। ସେ ବାଣିଜ୍ୟ ମନ୍ତ୍ରଣାଳୟ ସଚିବ ବି.ଭି .ଆର୍.ସୁବ୍ରମଣ୍ୟମ ଏବଂ ତାଙ୍କ ଟିମ୍ଙ୍କୁ ୨୦୨୭ ସୁଦ୍ଧା ରପ୍ତାନିକୁ ଆଗକୁ ବଢ଼ାଇବା ସହ ୨ ବିଲିୟନ୍ ଡଲାରର ଟାର୍ଗେଟ ହାସଲ କରିବାକୁ କହିଛନ୍ତି। ଯେଉଁମାନେ ଏହିସବୁ ନୂତନ ବିଚାର ଉପରେ ଅବଗତ ସେମାନେ କହନ୍ତି ଯେ, ନିବେଶ ଓ ବାଣିଜ୍ୟକୁ ପ୍ରୋତ୍ସାହିତ କରୁଥିବା ତଥା ମନ୍ତ୍ରଣାଳୟ ଅଧୀନସ୍ଥ ଡାଇରେକ୍ଟୋରେଟ୍ ଜେନେରାଲ ଅଫ୍ ଫରେନ୍ ଟ୍ରେଡ୍ ଏବଂ ଅନ୍ୟ ସଂସ୍ଥାଗୁଡ଼ିକର ପୁନର୍ଗଠନ ପରେ ସେଗୁଡ଼ିକୁ ରପ୍ତାନି ଟାର୍ଗେଟ ହାସଲ କରିବା ଲାଗି ଫ୍ରି ହ୍ୟାଣ୍ଡ୍ ଦେବା ଉଚିତ। ବୈଠକରେ ଗୋଏଲ ମଧ୍ୟ ସୂଚାଇ ଦେଇଥିଲେ ଯେ, ଏଥିପାଇଁ କାର୍ଯ୍ୟ କରିବା ଲାଗି ବିଶେଷଜ୍ଞମାନଙ୍କୁ ନେଇ ଏକ ଟ୍ରେଡ୍ ରେମିଡିଜ୍ ରିଭ୍ୟୁ କମିଟି ଗଠନ କରାଯିବ । କମିଟିର ଅନୁଧ୍ୟାନଭିତ୍ତିକ ପରିଣାମକୁ ନିଶ୍ଚିତ କରିବା ପାଇଁ ଅର୍ଥ ମନ୍ତ୍ରଣାଳୟ ଏବଂ ଏହାସହ କାର୍ଯ୍ୟ କରୁଥିବା ଅନ୍ୟ ମନ୍ତ୍ରଣାଳୟଗୁଡ଼ିକୁ ମଧ୍ୟ ସାମିଲ କରାଯିବ। ତେବେ ବ୍ରାଣ୍ଡ୍ ଇଣ୍ଡିଆକୁ ମଜଭୁତ କରିବା ଏବଂ ସୁବ୍ରମଣ୍ୟମ ଓ ତାଙ୍କ ସାଥୀମାନଙ୍କ ଦାୟିତ୍ୱ କମ୍ କରିବା ଲାଗି ଏହା ଆଉ ଏକ ପଦକ୍ଷେପ ବୋଲି ସ୍ପଷ୍ଟ ହୋଇଛି।
ପୋଲିସ ଅଧିକାରୀଙ୍କୁ ଅଙ୍କୁଶ
ନିକଟରେ ଗୁଜରାଟରେ ବ୍ୟାପକ ଘୋଟାଲା ସାମ୍ନାକୁ ଆସିଛି ଓ ଏହାକୁ ନେଇ ରାଜ୍ୟ ମୁଖ୍ୟମନ୍ତ୍ରୀ ଭୂପିନ୍ଦ୍ର ପଟେଲ ସମସ୍ୟାର ସମ୍ମୁଖୀନ ହୋଇଛନ୍ତି। କିଛିଦିନ ହେଲା ପୋଲିସ ଅଧିକାରୀଙ୍କ ବିରୋଧରେ ବହୁ ଲାଞ୍ଚ ଓ ଦୁର୍ନୀତି ଅଭିଯୋଗ ଆସିବାରେ ଲାଗିଛି। ଖୁବ୍ ନିକଟରେ ରାଜକୋଟ ପୋଲିସ କମିଶନର ମନୋଜ ଅଗ୍ରଓ୍ବାଲଙ୍କ ବିରୋଧରେ ଲାଞ୍ଚ ଅଭିଯୋଗଗୁଡ଼ିକ ଆସିଛି। ଜଣେ ଭାଜପା ବିଧାୟକ ବି ଅଭିଯୋଗ ଆଣିଛନ୍ତି, ଯାହାକୁ ଅଣଦେଖା କରାଯାଇପାରିବ ନାହିଁ। ସୂତ୍ରରୁ ଜଣାପଡ଼ିଛି ଯେ, ପୋଲିସ ଅଧିକାରୀମାନେ ଜବରଦସ୍ତ ଅର୍ଥ ଆଦାୟ ଏବଂ ଜମି ଅଧିଗ୍ରହଣ ଆଇନର ଅପବ୍ୟବହାର ସଂକ୍ରାନ୍ତୀୟ ଅନେକ ଅଭିଯୋଗ ପଟେଲ ସରକାର ଗ୍ରହଣ କରିଛନ୍ତି । କେବଳ ରାଜକୋଟରେ ନୁହେଁ ସାରା ରାଜ୍ୟରେ ଏହା ଏକ ଗମ୍ଭୀର ପ୍ରସଙ୍ଗ ହେବାକୁ ଯାଉଛି। ସରକାର ପୋଲିସ ଅଧିକାରୀଙ୍କ ଉପରେ ଅଙ୍କୁଶ ଲଗାଇବାକୁ ଯାଉଛନ୍ତି। ଜମି କିଣାବିକା ମାମଲାରୁ ସେମାନଙ୍କୁ ଦୂରେଇ ରଖିବା ଲାଗି ସରକାର ମାର୍ଗଦର୍ଶିକା ପ୍ରସ୍ତୁତ କରୁଥିବା ବିଶ୍ୱାସ କରାଯାଉଛି। ସରକାରଙ୍କ ବିନା ଅନୁମତିରେ ଜମିଜମା ସଂକ୍ରାନ୍ତୀୟ ମମଲାରେ ପୋଲିସ ଅଧିକାରୀମାନେ ତଦନ୍ତ କରିପାରିବେ ନାହିଁ ବୋଲି ନୂଆ ନିୟମରେ ଏକ ନିର୍ଦ୍ଦେଶ ରହିବ ବୋଲି କୁହାଯାଉଛି। ବରିଷ୍ଠ ଆଇପିଏସ୍ ଏବଂ ଆଇଏଏସ୍ ଅଧିକାରୀମାନଙ୍କ ବିରୋଧରେ ଥିବା ସବୁ ବଡ଼ଧରଣର ଜମିଜମା ଦୁର୍ନୀତି ଉପରେ ତଦନ୍ତ କରିବା ଲାଗି ସରକାର ଏକ ଉଚ୍ଚ କ୍ଷମତାସମ୍ପନ୍ନ କମିଟି ଗଠନ କରିବା ଲାଗି ମଧ୍ୟ ଯୋଜନା କରୁଛନ୍ତି।
Email: dilipcherian@gmail.com
