ଭୁବନେଶ୍ୱର,୧୯ା୧(ବ୍ୟୁରୋ): ଜଳବାୟୁ ପରିବର୍ତ୍ତନ ସହ ବର୍ଦ୍ଧିତ ଜନସଂଖ୍ୟାକୁ ଖାଦ୍ୟଶସ୍ୟ ଯୋଗାଇବା ଏକ ବଡ଼ ଚ୍ୟାଲେଞ୍ଜ ହୋଇଛି। ସଅଳ ଓ ଅଧିକ ଉତ୍ପାଦନକ୍ଷମ ବିହନ ଉପରେ ଚାଷୀମାନେ ଗୁରୁତ୍ୱ ଦେଉଛନ୍ତି। ମାତ୍ର କେନ୍ଦ୍ର ସରକାର ନୂତନ କିସମ ବିହନ ପାଇଁ ଯୋଗାଇ ଦେଉଥିବା ପ୍ରୋତ୍ସାହନ ରାଶି ବନ୍ଦ କରି ଦେଇଛନ୍ତି। ଫଳରେ ରାଜ୍ୟରେ ନୂତନ କିସମର ଧାନ ବିହନ ଉତ୍ପାଦନ ଓ ବ୍ୟବହାର ହ୍ରାସପାଇବା ଆଶଙ୍କା ଦେଖାଦେଇଛି। ଦୀର୍ଘ ବର୍ଷ ଧରି ପୁରୁଣା କିସମ ଧାନ ବିହନ ବଦଳରେ ଅଧିକ ଅମଳକ୍ଷମ ଓ ବିପର୍ଯ୍ୟୟକୁ ସହିପାରୁଥିବା ନୂତନ କିସମର ଧାନ ବିହନ ଉତ୍ପାଦନ ପାଇଁ କେନ୍ଦ୍ର ସରକାର ୨୦୧୨-୧୩ରୁ ପ୍ରୋତ୍ସାହନ ରାଶି ଯୋଗାଇ ଆସୁଥିଲେ। ଏ ବାବଦରେ ରାଜ୍ୟକୁ ବାର୍ଷିକ ପ୍ରାୟ ୯ କୋଟି ଟଙ୍କା ମିଳୁଥିଲା। ଏହି ରାଶିର ୭୫ ଭାଗ ବିହନ ଉତ୍ପାଦନ କରୁଥିବା ଚାଷୀ ଏବଂ ୨୫ ପ୍ରତିଶତ ଅର୍ଥ ବିହନ ଯୋଗାଣ ଦାୟିତ୍ୱରେ ଥିବା ଓଡ଼ିଶା ରାଜ୍ୟ ବିହନ ନିଗମକୁ ମିଳୁଥିଲା। ତେବେ ୨୦୨୨-୨୩ ଆର୍ଥିକ ବର୍ଷରୁ କେନ୍ଦ୍ର ସରକାର ଏହି ପ୍ରୋତ୍ସାହନ ରାଶି ବନ୍ଦକରି ଦେଇଛନ୍ତି। ଏଥିଯୋଗୁ ରାଜ୍ୟରେ ନୂତନ କିସମ ବିହନ ଉତ୍ପାଦନ କରୁଥିବା ପ୍ରାୟ ୧୦ ହଜାର ଚାଷୀ ଆଉ ନୂତନ କିସମର ଧାନ ବିହନ ଚାଷ କରିବା ପାଇଁ ଆଗ୍ରହ ଦେଖାଉନାହାନ୍ତି। କମ୍ ସମୟରେ ଅଧିକ ଅମଳ ଦେଉଥିବା ନୂତନ କିସମର ଧାନ ବିହନ ପ୍ରତି ରାଜ୍ୟରେ ଚାଷୀମାନଙ୍କ ଆଗ୍ରହ ବଢ଼ିବାରେ ଲାଗିଛି। ଚାଷୀମାନଙ୍କୁ ପ୍ରୋତ୍ସାହନ ରାଶି ମିଳିବା ପରେ ସେମାନେ ଅଧିକରୁ ଅଧିକ ନୂତନ ଧାନ ଉତ୍ପାଦନ କରୁଥିଲେ। ଫଳରେ ରାଜ୍ୟର ପ୍ରାୟ ୭୦ ପ୍ରତିଶତ ଚାଷୀଙ୍କ ନିକଟରେ ନୂତନ କିସମ ଧାନ ବିହନ ପହଞ୍ଚିପାରୁଛି। ଏଥିଯୋଗୁ ରାଜ୍ୟରେ ଧାନ ଉତ୍ପାଦନ ମଧ୍ୟ ବୃଦ୍ଧି ପାଇଛି।
ପୂର୍ବରୁ ୧୦ ବର୍ଷରୁ ଊର୍ଦ୍ଧ୍ୱ ସମୟ ଧରି ଉତ୍ପାଦନ ହେଉଥିବା ଧାନ ବିହନର ପରିବହନ ଓ ପ୍ରକ୍ରିୟାକରଣ ବାବଦରେ କେନ୍ଦ୍ର ସରକାର ଯୋଗାଇ ଦେଉଥିବା ଅର୍ଥକୁ ବନ୍ଦ କରି ଦେଇଛନ୍ତି। ଏହାପରେ ନୂତନ କିସମର ଅଧିକ ଅମଳକ୍ଷମ ଧାନ ବିହନ ଉତ୍ପାଦନ ପାଇଁ କେନ୍ଦ୍ର ସରକାର ପ୍ରୋତ୍ସାହନ ରାଶି ଯୋଗାଇ ଦେଉଥିଲେ। ୧ ହେକ୍ଟର ଜମିରେ ୫୦ କୁଇଣ୍ଟାଲ ପର୍ଯ୍ୟନ୍ତ ଧାନ ବିହନ ଉତ୍ପାଦନ କରୁଥିବା ଚାଷୀଙ୍କୁ ପ୍ରାୟ ୩୯ ହଜାର ଟଙ୍କାର ପ୍ରୋତ୍ସାହନ ରାଶି ମିଳୁଥିଲା। ଏଥିଯୋଗୁ ରାଜ୍ୟର ଚାଷୀମାନେ ଅଧିକ ନୂତନ କିସମର ଧାନ ବିହନ ଉତ୍ପାଦନ କରୁଥିବା ବେଳେ ଚାଷୀ ମଧ୍ୟ ନୂତନ ବିହନ ପାଇଁ ଆଗ୍ରହ ପ୍ରକାଶ କରୁଥିଲେ। ଏହାଦ୍ୱାରା କେବଳ ରାଜ୍ୟରେ ନୂତନ କିସମର ଧାନ ବିହନର ବ୍ୟବହାର ବଢ଼ି ନ ଥିଲା ବରଂ ରାଜ୍ୟ ବିହନ ନିଗମର ଆର୍ଥିକ ସ୍ଥିତିରେ ସୁଧାର ଆସିଥିଲା। ରାଜ୍ୟ କୃଷି ବ୍ୟବସ୍ଥାରେ ବିହନ ନିଗମ ବିହନ ବ୍ୟବସାୟ ଅର୍ଥ ଉପରେ ସମ୍ପୂର୍ଣ୍ଣ ନିର୍ଭରଶୀଳ। କେନ୍ଦ୍ର ସରକାରଙ୍କ ପ୍ରୋତ୍ସାହନ ରାଶି ବନ୍ଦ ଫଳରେ ନିଗମ ଗୁରୁତର ଆର୍ଥିକ ସମସ୍ୟାର ସମ୍ମୁଖୀନ ହେବା ନେଇ ଆଶଙ୍କା ଦେଖାଦେଇଛି।
ରାଜ୍ୟରେ ପ୍ରତ୍ୟେକ ବର୍ଷ ବନ୍ୟା, ବାତ୍ୟା, ମରୁଡ଼ି ଭଳି ପ୍ରାକୃତିକ ବିପର୍ଯ୍ୟୟ ଦେଖାଦେଉଛି। ଏଥିଯୋଗୁ ଚାଷୀମାନେ ବହୁ କ୍ଷତିର ସମ୍ମୁଖୀନ ହେଉଛନ୍ତି। ବିପର୍ଯ୍ୟୟ ସହନଶୀଳ ଏବଂ ଶୀଘ୍ର ଅମଳକ୍ଷମ ବିହନ ଉପରେ ଚାଷୀମାନେ ନିର୍ଭର କରୁଛନ୍ତି। ଏପରି ସ୍ଥଳେ କେନ୍ଦ୍ର ସରକାର ଏ ବାବଦରେ ଦେଉଥିବା ପ୍ରୋତ୍ସାହନରାଶିକୁ ବନ୍ଦ କରିଦେବା କୃଷି ବିଶେଷଜ୍ଞଙ୍କୁ ଆଶ୍ଚର୍ଯ୍ୟ କରିଛି। ଏହାଦ୍ୱାରା କେବଳ ନୂତନ କିସମର ବିହନ ଉତ୍ପାଦନ ବ୍ୟାହତ ହେବ ନାହିଁ, ରାଜ୍ୟର ଧାନ ଉତ୍ପାଦନ ଉପରେ ମଧ୍ୟ ଏହାର ପ୍ରତିକୂଳ ପ୍ରଭାବ ପଡ଼ିବ। କୃଷି ବିଭାଗର ଜଣେ ବରିଷ୍ଠ ଅଧିକାରୀଙ୍କ କହିବା କଥା ହେଲା, ରାଜ୍ୟ ସରକାର ୧୦ ବର୍ଷ ଭିତରେ ବିହନ ଉତ୍ପାଦନ, ପ୍ରକ୍ରିୟାକରଣ, ସାମ୍ପଲିଂ, ପ୍ୟାକିଂ, ଟ୍ୟାଗିଂ ଓ ପରିବହନ ଇତ୍ୟାଦି ବାବଦରେ ଖର୍ଚ୍ଚ କରିବା ବେଳେ କେନ୍ଦ୍ର ସରକାର ନୂତନ କିସମର ବିହନକୁ ପ୍ରୋତ୍ସାହନ ରାଶି ଯୋଗାଇ ଦେଉଥିଲେ। ଏହାକୁ ବନ୍ଦ କରିବା ଫଳରେ ରାଜ୍ୟ ବିହନ ନିଗମ ଉପରେ ଅଧିକ ଚାପ ପଡ଼ିବା ସହ ନୂତନ ବିହନ ଉତ୍ପାଦନ କ୍ଷେତ୍ରରେ ବାଧା ସୃଷ୍ଟି ହେବ।
