ମହୀଶୂର,୨୫ା୧(ଆଇଏଏନ୍ଏସ୍): ବିଚାରପତି ନିଯୁକ୍ତି ଏବଂ ନ୍ୟାୟିକ ବ୍ୟବସ୍ଥାରେ କେନ୍ଦ୍ର ସରକାରଙ୍କ ହସ୍ତକ୍ଷେପ ଠିକ୍ ନୁହେଁ। ଏହା ବିପଜ୍ଜନକ ବୋଲି କର୍ନାଟକର ପୂର୍ବତନ ଲୋକାୟୁକ୍ତ ତଥା ସୁପ୍ରିମକୋର୍ଟର ଅବସରପ୍ରାପ୍ତ ବିଚାରପତି ଏନ୍. ସନ୍ତୋଷ ହେଗଡେ ମଙ୍ଗଳବାର କହିଛନ୍ତି। ଗଣମାଧ୍ୟମ ସହ ଏକ ଆଲୋଚନା କାର୍ଯ୍ୟକ୍ରମରେ ଜଷ୍ଟିସ୍ ହେଗ୍ଡ଼େ କହିଥିଲେ, ନ୍ୟାୟପାଳିକାରେ କାର୍ଯ୍ୟପାଳିକା ହସ୍ତକ୍ଷେପ କରିବା ଉଚିତ ନୁହେଁ। ଏଭଳି ହସ୍ତକ୍ଷେପ ବିପଜ୍ଜନକ ହେବ ବୋଲି ସେ ସତର୍କ କରାଇ ଦେଇଛନ୍ତି। ହେଗଡେ କହିଛନ୍ତି, ଲୋକାୟୁକ୍ତ ହେବା ପୂର୍ବରୁ ସମାଜ ସମ୍ପର୍କରେ ସେ ବିଶେଷ କିଛି ଜାଣି ନ ଥିଲେ। ଯେଉଁମାନେ ଧନୀ ସେମାନେ ସବୁ ସମ୍ମାନ ପାଆନ୍ତି। ଏପରିକି ଜେଲ୍ରୁ ବାହାରିଲେ ସେମାନଙ୍କୁ ଭବ୍ୟ ସ୍ବାଗତ କରାଯାଏ। ଧର୍ମ ଏବଂ ଭାଷାକୁ ନେଇ ମତଭେଦ ସୃଷ୍ଟି ହେବା ଦେଶ ପାଇଁ ବିପଦ ବୋଲି ପୂର୍ବତନ ଲୋକାୟୁକ୍ତ କହିଛନ୍ତି। ଦେଶରେ ଦୁର୍ନୀତି ନିୟନ୍ତ୍ରଣ ବାହାରେ। ଜନପ୍ରତିନିଧିମାନେ ନିଜକୁ ଜନତାଙ୍କ ମାଲିକ ଭାବୁଛନ୍ତି। ରାଜନେତାମାନେ ଦୁର୍ନୀତି ବିରୋଧରେ ବଡ଼ ବଡ଼ ଭାଷଣ ଦେଉଛନ୍ତି ଓ ପରସ୍ପର ବିରୋଧରେ ଅଭିଯୋଗ ଆଣୁଛନ୍ତି। ତେବେ ଦୁର୍ନୀତି ହଟାଇବା ଦିଗରେ କିଛି କରିବାକୁ ସେମାନେ ଚାହୁଁନାହାନ୍ତି ବୋଲି ଜଷ୍ଟିସ୍ ହେଗ୍ଡେ କହିଛନ୍ତି। ଏଭଳି ସ୍ଥିତି ଜାରି ରହିଲେ ଲୋକେ ଶାସନ ବ୍ୟବସ୍ଥା ବିରୋଧରେ ବିଦ୍ରୋହ କରିବେ। ଏଭଳି ସ୍ଥିତି କେବେ ଆସିବ, ତାହା ସେ ଜାଣନ୍ତି ନାହିଁ ବୋଲି ହେଗ୍ଡ଼େ କହିଛନ୍ତି।
