ନୂଆଦିଲ୍ଲୀ,୨୦।୧୧: ବିଲ୍ ମଞ୍ଜୁରୀ ପ୍ରସଙ୍ଗରେ ସୁପ୍ରିମକୋର୍ଟ ଆଜି ଏକ ଗୁରୁତ୍ୱପୂର୍ଣ୍ଣ ସ୍ପଷ୍ଟୀକରଣ ଦେଇଛନ୍ତି। ଶୀର୍ଷ ଅଦାଲତ କହିଛନ୍ତି ଯେ, ବିଲ୍ଗୁଡ଼ିକୁ ଅନୁମୋଦନ କରିବା ପାଇଁ ରାଜ୍ୟପାଳ କିମ୍ବା ରାଷ୍ଟ୍ରପତିଙ୍କ ଉପରେ କୌଣସି ସମୟସୀମା ଧାର୍ଯ୍ୟ କରାଯାଇପାରିବ ନାହିଁ।
ପାଞ୍ଚଜଣିଆ ସାମ୍ବିଧାନିକ ଖଣ୍ଡପୀଠ ଜୋର ଦେଇ କହିଛନ୍ତି ଯେ, ରାଷ୍ଟ୍ରପତି କିମ୍ବା ରାଜ୍ୟପାଳଙ୍କ କାର୍ଯ୍ୟ “ବିଚାର ଯୋଗ୍ୟ ନୁହେଁ” ଏବଂ କୌଣସି ବିଲ୍ ଆଇନରେ ପରିଣତ ହେବା ପରେ ହିଁ ନ୍ୟାୟିକ ସମୀକ୍ଷା କରାଯାଇପାରିବ।
ଭାରତର ପ୍ରଧାନ ବିଚାରପତି (CJI) ବି.ଆର୍. ଗାଭାଇଙ୍କ ନେତୃତ୍ୱରେ ଗଠିତ ଖଣ୍ଡପୀଠ କହିଛନ୍ତି ଯେ, ସମୟସୀମା ଲାଗୁ କରିବା ସମ୍ବିଧାନର ସମ୍ପୂର୍ଣ୍ଣ ବିରୋଧୀ ଅଟେ।
ତାମିଲନାଡୁ ରାଜ୍ୟପାଳଙ୍କ ମାମଲାରେ ପୂର୍ବରୁ ଦୁଇ ଜଣିଆ ଖଣ୍ଡପୀଠଙ୍କ ଦ୍ୱାରା ‘ସମ୍ମତି ପ୍ରାପ୍ତ ବୋଲି ଧରାଯିବା’ ନେଇ ଦିଆଯାଇଥିବା ରାୟକୁ କୋର୍ଟ ଖାରଜ କରିଛନ୍ତି। ଅଦାଲତ କହିଛନ୍ତି ଯେ, ଏକ ନିର୍ଦ୍ଧାରିତ ସମୟ ପରେ ‘ସମ୍ମତି ପ୍ରାପ୍ତ ବୋଲି ଧରିନେବା’ ହେଉଛି ନ୍ୟାୟପାଳିକା ଦ୍ୱାରା କାର୍ଯ୍ୟନିର୍ବାହୀ କାର୍ଯ୍ୟକୁ ଅକ୍ତିଆର କରିବା ଯାହା ସମ୍ବିଧାନର ପରିସର ମଧ୍ୟରେ ଅନୁମତିପ୍ରାପ୍ତ ନୁହେଁ।
ତେବେ, ଖଣ୍ଡପୀଠ ଏକ ସର୍ତ୍ତ ଯୋଡିଛନ୍ତି ଯେ, ରାଜ୍ୟପାଳଙ୍କ କାର୍ଯ୍ୟର ଯୋଗ୍ୟତା ଉପରେ ବିଚାର କରାଯାଇ ପାରିବ ନାହିଁ, କିନ୍ତୁ “ବିଳମ୍ବିତ, ଅସ୍ପଷ୍ଟ ଏବଂ ଅନିର୍ଦ୍ଦିଷ୍ଟ ନିଷ୍କ୍ରିୟତା” ନିଶ୍ଚିତ ଭାବରେ ସୀମିତ ନ୍ୟାୟିକ ଯାଞ୍ଚକୁ ଆମନ୍ତ୍ରଣ କରିବ।
ରାଷ୍ଟ୍ରପତି ଦ୍ରୌପଦୀ ମୁର୍ମୁ, ସମ୍ବିଧାନର ଧାରା ୧୪୩ ଅନୁଯାୟୀ, ତାମିଲନାଡୁ ମାମଲାର ରାୟ ପରେ ଶୀର୍ଷ ଅଦାଲତଙ୍କ ମତାମତ ଲୋଡ଼ିଥିଲେ। ସେ ମୁଖ୍ୟତଃ ପଚାରିଥିଲେ ଯେ, ସାମ୍ବିଧାନିକ ସମୟସୀମା ଅଭାବରେ, ଧାରା ୨୦୦ ଅନୁଯାୟୀ ରାଜ୍ୟପାଳଙ୍କ କ୍ଷମତା ପ୍ରୟୋଗ ଉପରେ କ’ଣ ନ୍ୟାୟିକ ଆଦେଶ ମାଧ୍ୟମରେ ସମୟସୀମା ଧାର୍ଯ୍ୟ କରାଯାଇପାରିବ?
ରାଜ୍ୟପାଳ କ’ଣ ମନ୍ତ୍ରୀ ପରିଷଦର ସହାୟତା ଏବଂ ପରାମର୍ଶ ଦ୍ୱାରା ବାଧ୍ୟ ଅଟନ୍ତି? ପ୍ରିମକୋର୍ଟଙ୍କ ଏହି ନିଷ୍ପତ୍ତି କେନ୍ଦ୍ର ସରକାରଙ୍କ ପାଇଁ ଏକ ବଡ଼ ବିଜୟ ବୋଲି ଧରାଯାଉଛି।
