ଭାପୁର,୪ା ୮(ଡି.ଏନ.ଏ.): ନୟାଗଡ଼ ଜିଲା ଭାପୁର ବ୍ଲକରେ ଫେଲ ମାରିଛି କେନ୍ଦ୍ର ସରକାରଙ୍କ ସ୍ବଚ୍ଛ ପରିମଳ ଯୋଜନା। ପାଇଖାନା ନିର୍ମାଣ ନାମରେ ହୋଇଛି ଲକ୍ଷାଧିକ ଟଙ୍କା ହରିଲୁଟ । ପାଇଖାନା ନ ଥାଇ ବାହ୍ୟ ମଳମୁକ୍ତ ଅଞ୍ଚଳ ବୋଲି ଘୋଷଣା କରାଯାଇ ସବୁଆଡେ ଫଳକ ମରାଯାଇଛି । ଏକଥା ଦେଖିଲେ ଯେ କେହି ତାଜୁବ ହୋଇଯିବ । ଅଧିକାଂଶ ଗାଁରେ ପାଇଖାନା ନିର୍ମାଣ ହୋଇ ନ ଥିବା ବେଳେ କାଗଜ କଲମରେ ସବୁ କିଛି ଠିକ୍ ଚାଲିଥିବା ଦେଖିବାକୁ ମିଳିଛି ।
ମିଳିଥିବା ସୂଚନା ଅନୁଯାୟୀ, ଭାପୁର ବ୍ଲକରେ କେଉଁଠି ପାଇଖାନା ନିର୍ମାଣ ହୋଇ ନାହିଁ ତ ଆଉ କେଉଁଠି ଅଧାପନ୍ତରିଆ ଅବସ୍ଥାରେ ରହିଛି । ନିମ୍ନମାନର କାମ ଯୋଗୁ ବହୁ ପାଇଖାନା ମାଟିରେ ମିଶି ସାରିଛି । ଅଧିକାଂଶ ପାଇଖାନାରେ କବାଟ ନ ଥିବା ବେଳେ ଟାଙ୍କିରେ ଘୋଡଣୀ ପଡିନାହିଁ । ମହାତ୍ମା ଗାନ୍ଧୀଙ୍କ ସ୍ବପ୍ନ ସାକାର କରିବାକୁ ଯାଇ କେନ୍ଦ୍ର ସରକାର ସ୍ବଚ୍ଛ ପରିମଳ ଯୋଜନାରେ ସମସ୍ତ ପରିବାରକୁ ପାଇଖାନା ନିର୍ମାଣ କରିବାକୁ ଆର୍ଥିକ ସହାୟତା ଯୋଗାଇ ଦେଇଥିଲେ । ଏଥିପାଇଁ ହିତାଧିକାରୀଙ୍କୁ ୧୨ହଜାର ଟଙ୍କା ଲେଖାଏ ଦେବାକୁ ପ୍ରଶାସନ ପକ୍ଷରୁ ପ୍ରସ୍ତାବ ଦିଆଯାଇଥିଲା ା ଭାପୁର ବ୍ଲକର ୨୦ପଞ୍ଚାୟତର ୧୨୬ ଗାଁରେ ପାଇଖାନା ନିର୍ମାଣ ପାଇଁ ଲକ୍ଷ୍ୟ ରଖାଯାଇଥିଲା । ଏଥିପାଇଁ ଜଳ ଓ ପରିମଳ ବିଭାଗର ଯନ୍ତ୍ରୀ ଏବଂ କର୍ମଚାରୀମାନେ ଦାୟିତ୍ୱ ନେଇଥିଲେ । ଗାଁ ଗାଁ ବୁଲି ପାଇଖାନା କାର୍ଯ୍ୟର ତଦାରଖ କରିଥିଲେ ା ଅଦ୍ୟାବଧି ଅଧିକାଂଶ ପାଇଖାନା ନିର୍ମାଣ ଅଧାରେ ଅଟକିଛି । ଏପଟେ ସମସ୍ତ ହିତାଧିକାରୀଙ୍କ ପାଇଖାନା ନିର୍ମାଣ ଶେଷ ହୋଇଥିବା ଦର୍ଶାଇ ରିପୋର୍ଟ ପ୍ରଦାନ କରାଯାଇଛି । ଫଳରେ ସରକାର ସେହି ଗାଁକୁ ବାହ୍ୟ ମଳମୁକ୍ତ ଅଞ୍ଚଳ ଭାବେ ଘୋଷଣା କରି ବଡ଼ ବଡ଼ ହୋଡ଼ିଂ ମାରିଛନ୍ତି । ବିଜିପୁର ଓ ଧାନଚାଙ୍ଗଡା ପଞ୍ଚାୟତରେ ଠିକାଦାର ନିମ୍ନମାନର ପାଇଖାନା କରି ଟଙ୍କା ଉଠାଇ ନେଇଥିବା ଅଭିଯୋଗ ହୋଇଛି । କେଉଁଠି ପାଇଖାନା କବାଟ ଆଜି ପର୍ଯ୍ୟନ୍ତ ଲାଗି ନାହିଁ । ଟାଙ୍କିରେ ନନ୍ଦ ପଡିଛି ହେଲେ ଉପର ଘୋଡଣୀ ପଡିନାହିଁ । ପାଇଖାନା ଉପରେ ଆଜବେଷ୍ଟ ପଡିନାହିଁ । ହେଲେ ଠିକାଦାର ହିତାଧିକାରୀଙ୍କ ଫଟୋ ଉଠାଇ ଦସ୍ତଖତ ନେଇ ଟଙ୍କା ଉଠାଇ ନେଇଛନ୍ତି । ସୁନାଖଳା ଗ୍ରାମର ଅଗାଧୁ ବରାଡ, ସୁବଳ ବରାଡ, ଶତ୍ରୁଘନ ବରାଡଙ୍କ ପାଇଖାନା ଟାଙ୍କିରେ ଘୋଡଣୀ ନାହିଁ । ସେମାନେ ଠିକାଦାରଙ୍କୁ ଏ ସଂକ୍ରାନ୍ତରେ ବାରମ୍ବାର ଜଣାଇଥିଲେ ମଧ୍ୟ କୌଣସି କାର୍ଯ୍ୟାନୁଷ୍ଠାନ ଗ୍ରହଣ କରାଯାଉନାହିଁ । ଲୋକମାନେ ଘରେ ଥିବା ପାଇଖାନାକୁ ବ୍ୟବହାର ନ କରି ତା ଭିତରେ ଜାଳେଣି କାଠ ରଖୁଥିବା ଦେଖିବାକୁ ମିଳିଛି । ଲୋକମାନେ ରାସ୍ତା କଡରେ ମଳତ୍ୟାଗ କରୁଛନ୍ତି । ଏଥିପାଇଁ ବିଜିପୁର-ସୁନାଖଳା ରାସ୍ତାରେ ଯାତାୟତ କରିବା ସମ୍ଭବ ହୋଇନାହିଁ । ଏସଂକ୍ରାନ୍ତରେ ରେ ତଦନ୍ତ କରି କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ସାଧାରଣରେ ଦାବି ହୋଇଛି ା
