ନୂଆଦିଲ୍ଲୀ, ୭।୪ : ଏକ ବର୍ଷ ମଧ୍ୟରେ ରୋହିଙ୍ଗ୍ୟା ଏବଂ ବାଂଲାଦେଶୀ ଅନୁପ୍ରବେଶକାରୀଙ୍କ ସମେତ ସମସ୍ତ ବେଆଇନ ପ୍ରବାସୀଙ୍କୁ ସେମାନଙ୍କ ଦେଶକସ୍ୁ ପଠାଇବାକୁ ଆବେଦନ ଉପରେ ସୁପ୍ରିମକୋର୍ଟ କହିଛନ୍ତି ଯେ ଯଦି କେନ୍ଦ୍ର ସରକାର ଏହି ପ୍ରସଙ୍ଗରେ ଜବାବ ଦାଖଲ କରନ୍ତି, ତେବେ ଏହାର ଶୁଣାଣି କରିବାକୁ ଶୀର୍ଷକୋର୍ଟ ପ୍ରସ୍ତୁତ ଅଛନ୍ତି। କେନ୍ଦ୍ରର ଜବାବ ଦାଖଲ ହେବା ପରେ ଶୁଣାଣି ପାଇଁ ତାରିଖ ଦିଆଯିବ ବୋଲି ପ୍ରଧାନ ବିଚାରପତି (ସିଜେଆଇ )ଏନ.ଭି. ରମନା କହିଛନ୍ତି।
ଭାଜପା ନେତା ଅଶ୍ୱିନୀ ଉପାଧ୍ୟାୟ ଗତ ବର୍ଷ ଏକ ଜନସ୍ବାର୍ଥ ମାମଲା ଦାଖଲ କରିଥିଲେ। ଯେଉଁଥିରେ ଏକ ବର୍ଷ ମଧ୍ୟରେ ରୋହିଙ୍ଗ୍ୟା ଏବଂ ବାଂଲାଦେଶୀ ଅନୁପ୍ରବେଶକାରୀଙ୍କ ସମେତ ସମସ୍ତ ବେଆଇନ ପ୍ରବାସୀଙ୍କୁ ଅନୁସନ୍ଧାନ, ଅଟକାଇବା ଏବଂ ବିତାଡିତ କରିବା ପାଇଁ ଏହା କେନ୍ଦ୍ର ଏବଂ ସମସ୍ତ ରାଜ୍ୟକୁ ଏକ ନିର୍ଦ୍ଦେଶ ଦେବାକୁ ଆବେଦନ କରାଯାଇଥିଲା।
ଅଶ୍ୱିନୀ କୋର୍ଟଙ୍କୁ କହିଥିଲେ ଯେ ୨୦୨୧ ମାର୍ଚ୍ଚ ୨୭ ରେ ଏକ ବର୍ଷରୁ ଅଧିକ ସମୟ ପୂର୍ବରୁ ଏହି ବିଜ୍ଞପ୍ତି ଜାରି କରାଯାଇଥିଲା। କିନ୍ତୁ ଏହା ପରେ ଏହି ପ୍ରସଙ୍ଗରେ କୌଣସି ଅଗ୍ରଗତି ହୋଇନଥିଲା। ଅଶ୍ୱିନୀ ଯୁକ୍ତି କରିଛନ୍ତି ଯେ କୋଟି କୋଟି ଲୋକଙ୍କ ରୋଜଗାର ଅନୁପ୍ରବେଶକାରୀଙ୍କ କବଳରେ ରହିଛି। ସିଜେଆଇ ଏହି ପ୍ରସଙ୍ଗରେ କହିଛନ୍ତି ଯେ କେନ୍ଦ୍ରର ଉତ୍ତର ଦାଖଲ ହେବା ପରେ ମାମଲାର ଶୁଣାଣି ତାରିଖ ରଖାଯିବ। ପ୍ରାରମ୍ଭରେ, ଶୀଘ୍ର ଶୁଣାଣି ପାଇଁ ଅଶ୍ୱିନୀଙ୍କ ଅନୁରୋଧ ଗ୍ରହଣ କରିବାକୁ ସିଜେଆଇ ଅନିଚ୍ଛା ପ୍ରକାଶ କରିଥିଲେ।
ଅଶ୍ୱିନୀ କହିଛନ୍ତି ଯେ ୫ କୋଟି ରୋହିଙ୍ଗ୍ୟା ଭାରତରେ ବେଆଇନ ଭାବେ ବାସ କରୁଛନ୍ତି। ଆବାସ ଯୋଜନା ସମେତ ଅନ୍ୟ ସୁବିଧା ସେମାନଙ୍କୁ ମିଳୁଛି। ଏନେଇ କୋର୍ଟରେ ଉପସ୍ଥିତ ଥିବା ସୋଲିସିଟର ଜେନେରାଲ ତୁଷାର ମେହେଟ୍ଟାଙ୍କୁ ସିଜେଆଇ ପ୍ରଶ୍ନ ପଚାରିଥିଲେ ଯେ ଯଦି ଆପଣ ଜବାବ ସହିତ ପ୍ରସ୍ତୁତ ,ତେବେ ଆମେ ଏହି ମାମଲାକୁ ତାଲିକାଭୁକ୍ତ କରିବୁ।
