ଯୋଡ଼ା,୩୧ା୫(ଡି.ଏନ.ଏ.) କେନ୍ଦୁଝର ଜିଲା ଯୋଡ଼ା ବ୍ଲକର କାନପୁରଠାରେ ବୈତରଣୀ ନଦୀ ଉପରେ ନିର୍ମାଣାଧୀନ ଓଡ଼ିଶାର ଦ୍ୱିତୀୟ ବୃହତ୍ତମ ନଦୀବନ୍ଧ ଯୋଜନା ଦ୍ବାରା ବିସ୍ଥାପିତଙ୍କ ସମସ୍ୟା ଉପରେ ଅବଗତ ହେବା ପାଇଁ ଦିଲ୍ଲୀରୁ ଫ୍ୟାକ୍ଟ ଫାଇଣ୍ଡିଂ କମିଟି ସୋମବାର ଅଞ୍ଚଳ ପରିଦର୍ଶନ କରିଛି। ଏହି ପରିଦର୍ଶନରେ କମିଟିରେ ୩ଜଣିଆ ଦଳରେ ପୋଲାଭରମ ପ୍ରକଳ୍ପରେ ଲୋକଙ୍କ ପାଇଁ କାମ କରିଥିବା ଏନ୍ଜିଓ ଶକ୍ତିର ନିର୍ଦ୍ଦେଶକ ଶିବରାମ କ୍ରିଷ୍ଣନ, ନ୍ୟାଶନାଲ ଏସ୍ଟି କମିଶନଙ୍କ ଆଞ୍ଚଳିକ ନିର୍ଦ୍ଦେଶକ ଭି ଅଶୋକ ବର୍ଦ୍ଧନ ଏବଂ ଆଇନଜୀବୀ ରାଧାକାନ୍ତ ତ୍ରିପାଠୀ ପ୍ରମୁଖ ସାମିଲ ଥିଲେ। ଏହି କମିଟି ଧୋବାକୁଚୁଡ଼ା ଅଙ୍ଗୁଳିଆ, ଶଙ୍କରପୁର, ଗୋବିନ୍ଦପୁର ପ୍ରଭୃତି ଗ୍ରାମ ଗୁଡ଼ିକୁ ପରିଦର୍ଶନରେ ଯାଇ ବିସ୍ଥାପିତଙ୍କର ଥଇଥାନ ସମ୍ପର୍କିତ ତଥ୍ୟ ବିଷୟରେ ସଂଗ୍ରହ କରିଥିଲେ। ବିଶେଷ କରି ଏହି କମିଟି ବିସ୍ଥାପିତ ଅଞ୍ଚଳର ଜନଜାତିଙ୍କ ବିସ୍ଥାପନ ସମସ୍ୟା ନେଇ ଅଧିକ ସମ୍ବେଦନଶୀଳ ଥିଲା। ଏହାକୁ କେନ୍ଦ୍ର କରି ଅନ୍ୟ ଜାତିର ବିସ୍ଥାପିତମାନେ ଉକ୍ତ କମିଟି ସମ୍ମୁଖରେ ତର୍କ କରିଥିଲେ।
ଏ ସମ୍ପର୍କରେ ଯୋଡ଼ା ବ୍ଲକ ପୂର୍ବତନ ଅଧ୍ୟକ୍ଷ ପୂର୍ଣ୍ଣଚନ୍ଦ୍ର ନାଏକ କହିଛନ୍ତି ଯେ, ଶଙ୍କରପୁର ଗ୍ରାମରେ ଏହି କମିଟି ବିସ୍ଥାପିତଙ୍କର ସମସ୍ୟା ସମ୍ପର୍କରେ ପଚାରି ବୁଝୁଥିବାବେଳେ ଅନସୁଚିତ ଜାତିର ଜଣେ ବ୍ୟକ୍ତି ନିଜର ସମସ୍ୟା ସମ୍ପର୍କରେ ଜଣାଇବା ବେଳେ ତାଙ୍କୁ କମିଟି ବର୍ଣ୍ଣ ବୈଷମ୍ୟ ବିଭେଦ କରିବାରୁ ସେଠାରେ ଉପସ୍ଥିତ ଥିବା ମହିଳାପୁରୁଷମାନେ ଅସନ୍ତୋଷ ପ୍ରକାଶ କରିଥିଲେ। କେବଳ ଗୋଟିଏ ସମ୍ପ୍ରଦାୟ ଉପରେ କାହିଁକି କମିଟି ଗୁରୁତ୍ୱ ଦେଉଛି ବୋଲି ନାଏକ ଅଭିଯୋଗ କରିଥିଲେ। କେନ୍ଦ୍ରରୁ ଆସିଥିବା ଏହି କମିଟି ପୂର୍ବରୁ କାହିଁକି ବିସ୍ଥାପିତଙ୍କ ସମସ୍ୟାକୁ ଗୁରୁତ୍ୱ ଦେଉ ନ ଥିଲେ ବୋଲି ମହିଳାମାନେ ପ୍ରଶ୍ନ କରିଥିଲେ। ଏ ସମ୍ପର୍କରେ ଏହି କମିଟିରେ ସାମିଲ ଥିବା ଆଇନଜୀବୀ ରାଧାକାନ୍ତ ତ୍ରିପାଠୀ କହିଛନ୍ତି ଯେ, ଏହି କମିଟି କାନପୁର ପ୍ରକଳ୍ପରେ ବିସ୍ଥାପିତ ହେଉଥିବା ଆଦିବାସୀଙ୍କର ବିସ୍ଥାପନ ସମସ୍ୟା ସମ୍ପର୍କରେ ସବିଶେଷ ରିପୋର୍ଟ ପ୍ରସ୍ତୁତ କରି ଏସ୍ଟି କମିଶନଙ୍କୁ ହସ୍ତାନ୍ତର କରିବ। ସୂଚନାଯୋଗ୍ୟ , କାନପୁର ଡ୍ୟାମ ପ୍ରକଳ୍ପର ସମୁଦାୟ ୧୬ଗୋଟି ଗ୍ରାମ ବୁଡ଼ି ଅଞ୍ଚଳ ଭାବେ ଚିହ୍ନଟ ହୋଇଛି। ଏହି ବିସ୍ଥାପିତ ଗ୍ରାମର ୪୩୫୩ ଜଣ ବିସ୍ଥାପିତ ଥିବାବେଳେ ତନ୍ମଧ୍ୟରୁ ୨୭୮୫ଜଣ ଅନୁସୂଚିତ ଜନଜାତି ଅଛନ୍ତି।
