ଭୁବନେଶ୍ୱର, ୧।୯(ବ୍ୟୁରୋ): ଦଶମ ଟର୍ମ-୧ ଓ ଟର୍ମ ୨ର ମୂଲ୍ୟାୟନ ୫୦:୫୦ ପ୍ରତିଶତ ଆଧାରରେ କରିବା ପାଇଁ ଦିଲ୍ଲୀ ହାଇକୋର୍ଟ ସିବିଏସ୍ଇକୁ ନିର୍ଦ୍ଦେଶ ଦେଇଛନ୍ତି। ତେଣୁ ସିବିଏସ୍ଇ ନିଜ ତରଫରୁ ସମସ୍ତ ଛାତ୍ରୀଛାତ୍ରଙ୍କୁ ଏହି ସୁବିଧା ଦେବା ପାଇଁ ଓଡ଼ିଶା ଅଭିଭାବକ ମହାସଂଘ ଦାବି କରିଛି। ଅଭିଭାବକମାନେ ନ୍ୟାୟାଳୟରୁ ନିର୍ଦ୍ଦେଶ କାହିଁକି ଆଣିବେ, କାହିଁକି ଅର୍ଥ ଖର୍ଚ୍ଚ କରିବେ, ସିବିଏସ୍ଇ ନିଜ ତରଫରୁ ଏପରି ମୂଲ୍ୟାୟନ କରିଦେଲେ ଦେଶର ଲକ୍ଷାଧିକ ଛାତ୍ରୀଛାତ୍ର ଉପକୃତ ହେବେ। ଓଡ଼ିଶାରେ ଦଶମରେ ପ୍ରାୟ ୧୮ହଜାରରୁ ଊର୍ଦ୍ଧ୍ୱ ଓ ୧୨ହଜାରରୁ ଊର୍ଦ୍ଧ୍ୱ ଦ୍ୱାଦଶ ଶ୍ରେଣୀ ଛାତ୍ରୀଛାତ୍ର ରହିଛନ୍ତି। ତେଣୁ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଏହି ପ୍ରସଙ୍ଗ ପ୍ରଧାନମନ୍ତ୍ରୀ ଓ କେନ୍ଦ୍ର ଶିକ୍ଷାମନ୍ତ୍ରୀଙ୍କ ଦୃଷ୍ଟିକୁ ନେବା ସହିତ ଚିଠି ଲେଖି ରାଜ୍ୟର ୩୦ହଜାର ଛାତ୍ରୀଛାତ୍ରଙ୍କୁ ସୁରକ୍ଷା ଦେବା ପାଇଁ ଦାୟିତ୍ୱ ନିଅନ୍ତୁ ବୋଲି ମହାସଂଘ ଅଧ୍ୟକ୍ଷ ବାସୁଦେବ ଭଟ୍ଟ କହିଛନ୍ତି।
ସୂଚନାଯୋଗ୍ୟ, କରୋନା ପାଇଁ ଚଳିତ ବର୍ଷର ସିବିଏସ୍ଇ ପରୀକ୍ଷା ଦୁଇଟି ପର୍ଯ୍ୟାୟରେ (ଟର୍ମ-୧ ଓ ଟର୍ମ-୨) ହୋଇଥିଲା। ଉଭୟ ପରୀକ୍ଷାର ଥିଓରି ଓ ପ୍ରାକ୍ଟିକାଲର ୫୦%-୫୦% ମାର୍କକୁ ନେଇ ଫଳାଫଳ ପ୍ରକାଶ ପାଇବ ବୋଲି ଗତବର୍ଷ ଜୁଲାଇ ୫ରେ ସିବିଏସ୍ଇ ଘୋଷଣା କରିଥିଲା। ଦୁଇ ଟର୍ମର ରେଜଲ୍ଟ ବାହାରିବା ପରେ ଗତ ଜୁଲାଇ ୨୨ରେ ବୋର୍ଡ କର୍ତ୍ତୃପକ୍ଷ କହିଛନ୍ତି ଯେ, ମୂଲ୍ୟାୟନ ପାଇଁ ପୂର୍ବରୁ ଏକ ବିଶେଷଜ୍ଞ କମିଟି ଗଠନ କରିଥିଲେ। କମିଟିର ପରାମର୍ଶ ଅନୁସାରେ ଟର୍ମ-୧ର ଥିଓରିର ୩୦% ଓ ଟର୍ମ-୨ ଥିଓରିର ୭୦% ମାର୍କ ଏବଂ ଦୁଇଟି ଟର୍ମର ପ୍ରାକ୍ଟିକାଲ ପରୀକ୍ଷା ୫୦%-୫୦% ଆଧାରରେ ମୂଲ୍ୟାୟନ ହୋଇଛି। ଏହା ଜାଣିବା ପରେ ଛାତ୍ରୀଛାତ୍ର ଓ ଅଭିଭାବକ ଚିନ୍ତାରେ ପଡିଯାଇଛନ୍ତି। ଏହାକୁ ବିରୋଧ କରି ମହାସଂଘ ପକ୍ଷରୁ ହାଇକୋର୍ଟରେ ଏକ ଜନସ୍ବାର୍ଥ ମାମଲା ରୁଜୁ ହୋଇଥିଲା। ହାଇକୋର୍ଟଙ୍କ ନିର୍ଦ୍ଦେଶକ୍ରମେ ଅସନ୍ତୁଷ୍ଟ ଛାତ୍ରୀଛାତ୍ରଙ୍କ ତାଲିକା ପ୍ରସ୍ତୁତ କରୁଛି ମହାସଂଘ। ତେବେ ସମାନ ଘଟଣାରେ ଦିଲ୍ଲୀ ହାଇକୋର୍ଟ ଛାତ୍ରୀ ଦେବଶ୍ରୀ ବାଲିଙ୍କ ମାମଲାର ଶୁଣାଣି କରି ୫୦%-୫୦% ଆଧାରରେ ମାର୍କ ଦେବା ପାଇଁ ସିବିଏସ୍ଇକୁ ନିର୍ଦ୍ଦେଶ ଦେଇଛନ୍ତି। ଏସବୁକୁ ଦୃଷ୍ଟିରେ ରଖି ଓଡ଼ିଶାର ଛାତ୍ରୀଛାତ୍ରଙ୍କ ସ୍ବାର୍ଥକୁ ଦୃଷ୍ଟିରେ ରଖି ମୁଖ୍ୟମନ୍ତ୍ରୀ ଏ ଦିଗରେ ପଦକ୍ଷେପ ନେବା ପାଇଁ ମହାସଂଘ ଦାବି କରିଛି।
