ଭୁବନେଶ୍ୱର,୧୩।୫(ବ୍ୟୁରୋ):ଦୀର୍ଘ ୨୨ବର୍ଷ ତଳର ଅଞ୍ଜନା ମିଶ୍ର ଗଣବଳାତ୍କାର ମାମଲାର ମୁଖ୍ୟ ଅଭିଯୁକ୍ତ ବିବନ ବିଶ୍ୱାଳଙ୍କ ବିରୋଧରେ ସିବିଆଇ ବୁଧବାର ଚାର୍ଜଶିଟ ଦାଖଲ କରିଛି। ସ୍ବତନ୍ତ୍ର ମୁଖ୍ୟ ବିଚାର ବିଭାଗୀୟ ମାଜିଷ୍ଟ୍ରେଟ(ସିଜେଏମ୍) କୋର୍ଟରେ ତଦନ୍ତକାରୀ ଟିମ୍ ୨୬ପୃଷ୍ଠାର ସପ୍ଲିମେଣ୍ଟାରି ଚାର୍ଜଶିଟ୍ ଦାଖଲ କରିଛି। ଏଥିସହିତ ସିବିଆଇ ଗଣବଳାତ୍କାର ମାମଲାର ତଦନ୍ତ ଶେଷ କରିଛି। ଏହି ଘଟଣାରେ ସମ୍ପୃକ୍ତ ଅନ୍ୟ ୨ ଅଭିଯୁକ୍ତ ପ୍ରଦୀପ ସାହୁ ଓ ଧୀରେନ୍ଦ୍ର ମହାନ୍ତିଙ୍କ ବିରୋଧରେ କୋର୍ଟରେ ପୂର୍ବରୁ ଚାର୍ଜଶିଟ ଦାଖଲ କରାଯାଇଥିବାବେଳେ ମୁଖ୍ୟ ଅଭିଯୁକ୍ତ ବିବନ ଫେରାର ଥିବାରୁ ତାଙ୍କ ବିରୋଧରେ ଚାର୍ଜଶିଟ ଦାଖଲ ହୋଇପାରି ନ ଥିଲା। ଅନ୍ୟପକ୍ଷରେ ଯେଉଁ ଷଡ଼ଯନ୍ତ୍ରକାରୀଙ୍କ ପ୍ରରୋଚନାରେ ଅଭିଯୁକ୍ତମାନେ ତାଙ୍କୁ ବଳାତ୍କାର କରିଥିଲେ ସେମାନଙ୍କ ନାମ ସିବିଆଇ ଚାର୍ଜଶିଟରେ ଉଲ୍ଲେଖ କରିଥିବା ଆବଶ୍ୟକ ବୋଲି ଅଞ୍ଜନା କହିଛନ୍ତି। ଯଦି ଷଡ଼ଯନ୍ତ୍ରକାରୀଙ୍କ ନାମ ଚାର୍ଜଶିଟ୍ରେ ଉଲ୍ଲେଖ ନ ଥିବ ତେବେ ତାଙ୍କୁ ପ୍ରକୃତ ନ୍ୟାୟ ମିଳିପାରିବ ନାହିଁ ବୋଲି ସେ କହିଛନ୍ତି।
ପ୍ରକାଶ ଯେ, ଦୀର୍ଘ ୨୨ବର୍ଷ ଧରି ଫେରାର ଥିବା ବିବନଙ୍କୁ ଗତ ଫେବୃୟାରୀ ୨୨ରେ କମିଶନରେଟ ପୋଲିସ ଅପରେଶନ୍ ‘ସାଇଲେଣ୍ଟ-ଭାଇପର’ ମାଧ୍ୟମରେ ପୁଣେର ଆମ୍ବିଭ୍ୟାଲିରୁ ଗିରଫ କରି ସିବିଆଇକୁ ହସ୍ତାନ୍ତର କରିଥିଲା। ବିବନଙ୍କୁ ନିଜ ହେପାଜତକୁ ନେବା ପରେ ସିବିଆଇ ଘଟଣାର ତଦନ୍ତ କରିଥିଲା। ଏପରି କି ବିବନଙ୍କୁ ଗିରଫ କରାଯାଇଥିବା ଆମ୍ବିଭ୍ୟାଲି ଯାଇ ସେଠାରେ ତାଙ୍କ ବିରୋଧରେ ପ୍ରମାଣ ଯୋଗାଡ଼ କରିଥିଲା। ମାର୍ଚ୍ଚ ୩ରେ ଝାରପଡ଼ା ଜେଲରେ ବିବନଙ୍କ ଟିଆଇ ପରେଡ୍ କରାଯାଇଥିଲା। ୧୦ଜଣ ଅଭିଯୁକ୍ତଙ୍କ ମଧ୍ୟରୁ ପୀଡ଼ିତା ଅଞ୍ଜନା ଓ ଘଟଣା ଦିନ ତାଙ୍କ ସହ ଯାଉଥିବା ଡ୍ରାଇଭର ବିବନଙ୍କୁ ଚିହ୍ନଟ କରିଥିଲେ। ପରେ ବିବନଙ୍କୁ ସିବିଆଇ ୨ଦିନିଆ ରିମାଣ୍ଡରେ ନେଇ ୨୨ବର୍ଷ ତଳର ଘଟଣାର ଟିକ୍ନିଖ୍ ଖୋଳତାଡ଼ କରିବା ସହ କ୍ରାଇମ୍ସିନ ରିକ୍ରିଏଟ୍ କରିବା ପାଇଁ ଅଞ୍ଜନାଙ୍କୁ ଯେଉଁସ୍ଥାନରେ ବଳାତ୍କାର କରାଯାଇଥିଲା ସେଠାକୁ ବିବନଙ୍କୁ ନିଆଯାଇଥିଲା। ପରବର୍ତ୍ତୀ ସମୟରେ ସିବିଆଇ ଅଞ୍ଜନାଙ୍କ ପାଖରେ ଥିବା ତଥ୍ୟ ନେବା ସହ ବିବନଙ୍କ ଘର ଲୋକଙ୍କୁ ମଧ୍ୟ ପଚରାଉଚରା କରିଥିଲା। ସମସ୍ତ ତଥ୍ୟ ପ୍ରମାଣ ଯୋଗାଡ଼ ସରିବା ପରେ ବୁଧବାର ସିବିଆଇ ଚାର୍ଜଶିଟ୍ ଦାଖଲ କରିଛି। ୧୯୯୯ ଜାନୁୟାରୀ ୯ରେ ଅଞ୍ଜନାଙ୍କୁ ଗଣ ବଳାତ୍କାର କରାଯିବା ଘଟଣାରେ ସିବିଆଇ ତଦନ୍ତ ଭାର ନେଇଥିଲା। ଏହି ଘଟଣାରେ ପୋଲିସ ଅଭିଯୁକ୍ତ ପ୍ରଦୀପ ଏବଂ ଧୀରେନ୍ଦ୍ରଙ୍କୁ ଗିରଫ କରି ୧୯୯୯ ମେ ୫ରେ ଉଭୟଙ୍କ ବିରୋଧରେ ଚାର୍ଜଶିଟ ଦାଖଲ କରିଥିଲା। ପରେ ୨୦୦୨ରେ ଖୋର୍ଦ୍ଧା ଜିଲା ଜଜ୍ ପ୍ରଦୀପ ଏବଂ ଧୀରେନ୍ଦ୍ରଙ୍କୁ ଆଜୀବନ କାରାଦଣ୍ଡାଦେଶ ଦେଇଥିଲେ।
