ତିରୁପତି,୧୧।୨:ଆନ୍ଧ୍ରପ୍ରଦେଶ ତିରୁମାଲା ତିରୁପତି ଦେବସ୍ଥାନମ୍(ଟିଟିଡି)ରେ ପ୍ରସ୍ତୁତ ଲଡୁରେ ବ୍ୟବହାର ହେଉଥିବା ଘିଅରେ ଅପମିଶ୍ରଣ କରାଯାଉଥିବା ଘଟଣାରେ ସିବିଆଇ ୪ଜଣଙ୍କୁ ଗିରଫ କରି କୋର୍ଟ ଚାଲାଣ କରିଛି। ଗିରଫ ବ୍ୟକ୍ତିମାନେ ହେଲେ ରୁର୍କିସ୍ଥିତ ଭୋଲେବାବା ଡାଏରୀ ଫାର୍ମର ପୂର୍ବତନ ନିର୍ଦ୍ଦେଶକ ପୋମିଲ ଜୈନ ଓ ବିପିନ ଜୈନ, ପୁନମ୍ବକମ୍ର ବୈଷ୍ଣବୀ ଡାଏରୀର ସିଇଓ ଅପୂର୍ବ ବିନୟକାନ୍ତ ଚାଓ୍ବଡା ଏବଂ ତାମିଲ୍ନାଡ଼ୁ ଦୁଣ୍ଡିଗାଲ୍ର ଏଆର୍ ଡାଏରୀ ପରିଚାଳନା ନିର୍ଦ୍ଦେଶକ ରାଜୁ ରାଜଶେଖରନ୍। ଲଡୁ ପାଇଁ ବ୍ୟବହୃତ ଘିଅରେ ପଶୁ ଚର୍ବି ମିଶ୍ରଣ ହେଉଥିବା ନମୁନାରୁ ଜଣାପଡ଼ିବା ପରେ ସିବିଆଇ ଘଟଣାର ତଦନ୍ତ କରି ୪ଜଣଙ୍କୁ ଗିରଫ କରିଛି।
ମିଳିଥିବା ସୂଚନାନୁସାରେ, ତିରୁପତି ଲଡୁରେ ଅପମିଶ୍ରଣ ଅଭିଯୋଗ ହେବା ପରେ ଏହାର ତଦନ୍ତ ପାଇଁ ସୁପ୍ରିମକୋର୍ଟ ସିବିଆଇକୁ ନିର୍ଦ୍ଦେଶ ଦେଇଥିଲେ। ସର୍ବୋଚ୍ଚ ଅଦାଲତଙ୍କ ନିର୍ଦ୍ଦେଶ ଆଧାରରେ ସିବିଆଇ ଏକ ସ୍ବତନ୍ତ୍ର ତଦନ୍ତକାରୀ ଟିମ୍ (ଏସ୍ଆଇଟି) ଗଠନ କରିଥିଲା। ଉକ୍ତ ଟିମ୍ରେ ୨ଜଣ ସିବିଆଇ ଅଧିକାରୀ, ଆନ୍ଧ୍ରପ୍ରଦେଶ ସରକାରଙ୍କ ୨ଜଣ ଅଧିକାରୀ, ଭାରତ ସରକାରଙ୍କ ଖାଦ୍ୟ ସୁରକ୍ଷା ଏବଂ ମାନକ କର୍ତ୍ତୃପକ୍ଷ(ଏଫ୍ଏସ୍ଏସ୍ଏଆଇ)ର ଜଣେ ପ୍ରତିନିଧି ରହିଛନ୍ତି। ଏସ୍ଆଇଟି ତଦନ୍ତ ସମୟରେ ଜାଣିବାକୁ ପାଇଥିଲା ଯେ, ଏଆର୍ ଡାଏରୀ ନାମରେ ବୈଷ୍ଣବୀ ଡାଏରୀ ଫାର୍ମ ଜାଲ୍ କାଗଜପତ୍ର, ସିଲ୍ ପ୍ରସ୍ତୁତ କରି ଟେଣ୍ଡର ହାସଲ କରିଥିଲା। ଏପରି କି ଜାଲ୍ ତଥ୍ୟ ପ୍ରସ୍ତୁତ କରି ବୈଷ୍ଣବୀ ଡାଏରୀ ଯୋଗାଉଥିବା ଘିଅ ରୁର୍କିସ୍ଥିତ ଭୋଲେବାବା ଡାଏରୀରେ ତିଆରି ହେଉଥିବା ନେଇ ମିଥ୍ୟା ତଥ୍ୟ ପ୍ରଦାନ କରିଥିଲା। ହେଲେ ଭୋଲେବାବା ଡାଏରୀରେ ଆବଶ୍ୟକ ପରିମାଣର ଘିଅ ଯୋଗାଇବା ପାଇଁ ବ୍ୟବସ୍ଥା ନ ଥିବା ତଦନ୍ତ ବେଳେ ଜଣାପଡ଼ିଥିଲା। ଅଭିଯୁକ୍ତମାନଙ୍କୁ ତିରୁପତିଠାରେ ୩ଦିନ ଜେରା କରିବା ସମୟରେ ସେମାନଙ୍କ ଦ୍ୱାରା ଦିଆଯାଇଥିବା ତଥ୍ୟ ଏବଂ କାଗଜାଦିରେ କୌଣସି ତାଳମେଳ ରହୁ ନ ଥିବା ଜଣାପଡ଼ିଥିଲା। ଏସ୍ଆଇଟି ତିରୁମାଲା, ତିରୁପତି ଏବଂ ତାମିଲନାଡ଼ୁରେ ଥିବା ଏଆର୍ ଡାଏରୀ ଫାର୍ମରେ ତଦନ୍ତ କରିଥିଲା। ତିରୁପତି ମନ୍ଦିରରେ ଲଡୁ ପ୍ରସ୍ତୁତ ପାଇଁ ଦୈନିକ ପ୍ରାୟ ୧୫ହଜାର କିଲୋ ଘିଅ ଟିଟିଡି ଆବଶ୍ୟକ କରିଥାଏ। ଏଆର୍ ଡାଏରୀ ଏହି ଘିଅକୁ କିଲୋ ପ୍ରତି ୩୨୦ଟଙ୍କାରେ ଯୋଗାଇଦେବାକୁ ଟେଣ୍ଡର ହାସଲ କରିଥିଲା। ଗତ ଜୁଲାଇ ୮ରେ ୮ଟି ଟ୍ୟାଙ୍କରରେ ଘିଅ ଟିଟିଡିକୁ ପ୍ରଦାନ କରାଯାଇଥିଲା। ସେଥିରୁ ୪ଟି ଟ୍ୟାଙ୍କରରୁ ଘିଅ ନମୁନା ପରୀକ୍ଷା ପାଇଁ ସଂଗ୍ରହ କରାଯାଇଥିଲା। ନ୍ୟାଶନାଲ ଡାଏରୀ ଡେଭ୍ଲପ୍ମେଣ୍ଟ ବୋର୍ଡ(ଏନ୍ଡିଡିବି) ଉକ୍ତ ନମୁନାର ପରୀକ୍ଷା କରିବା ପରେ ଘିଅ ଭେଜାଲ୍ ଥିବା ନେଇ ଜୁଲାଇ ୧୭ରେ ରିପୋର୍ଟ ପ୍ରଦାନ କରିଥିଲା। ଏହା ଜଣାପଡ଼ିବା ପରେ ରାଜନୈତିକ ବିବାଦ ସୃଷ୍ଟି ହୋଇଥିଲା। ଏଭଳି ଅନିୟମିତତା ଏବଂ ପଶୁ ଚର୍ବିରେ ପ୍ରସ୍ତୁତ ଘିଅରେ ଲଡୁ ତିଆରିକରାଯାଉଥିବାରୁ ଆନ୍ଧ୍ରପ୍ରଦେଶ ମୁଖ୍ୟମନ୍ତ୍ରୀ ଚନ୍ଦ୍ରାବାବୁ ନାଇଡୁ ପୂର୍ବତନ ଓ୍ବାଏସ୍ଆର୍ କଂଗ୍ରେସ ପାର୍ଟି ସରକାରଙ୍କ ଉପରେ ଦୋଷ ଲଦିଥିଲେ। ଏପରି କି ଏନ୍ଡିଏ ବିଧାୟକ ଦଳ ବୈଠକରେ ଚନ୍ଦ୍ରାବାବୁ ତିରୁପତି ମନ୍ଦିରରେ ପ୍ରସାଦ ଅପମିଶ୍ରଣ ପ୍ରସଙ୍ଗ ଉଠାଇ ଓ୍ବାଇଏସ୍ଆର୍ ସିପି ପ୍ରଶାସନକୁ ଦାୟୀ କରିଥିଲେ। ପରେ ଏହି ଘଟଣାକୁ ଭାଜପା ନେତା ସୁବ୍ରମଣ୍ୟମ୍ ସ୍ବାମୀ ସୁପ୍ରିମକୋର୍ଟ ନେଇ ଏହାର ସିବିଆଇ ତଦନ୍ତ ପାଇଁ ଆବେଦନ କରିଥିଲେ। ଗତ ଅକ୍ଟୋବର ୪ତାରିଖରେ ସୁପ୍ରିମକୋର୍ଟ ଏହି ଘଟଣାର ସିବିଆଇ ତଦନ୍ତ ନିର୍ଦ୍ଦେଶ ଦେବା ସହ ସିବିଆଇ ନିର୍ଦ୍ଦେଶକଙ୍କ ପ୍ରତ୍ୟକ୍ଷ ତତ୍ତ୍ୱାବଧାନରେ ତଦନ୍ତ କରିବାକୁ କହିଥିଲେ।
