ନୂଆଦିଲ୍ଲୀ,୪ା୧୦(ପି.ଟି.): ଦେଶର ୧୦୭ ପାର୍ଲାମେଣ୍ଟ ସଦସ୍ୟ (ଏମ୍ପି) ଏବଂ ବିଧାୟକଙ୍କ ନାମରେ ଘୃଣା ମନ୍ତବ୍ୟ ମାମଲା ରୁଜୁ ହୋଇଛି। ସେହିପରି ଗତ ୫ ବର୍ଷ ମଧ୍ୟରେ ପ୍ରତିଦ୍ୱନ୍ଦ୍ୱିତା କରିଥିବା ୪୮୦ ଜଣ ପ୍ରାର୍ଥୀଙ୍କ ବିରୋଧରେ ମଧ୍ୟ ଅନୁରୂପ ମାମଲା ହୋଇଥିବା ନିର୍ବାଚନୀ ସଂସ୍କାର କ୍ଷେତ୍ରରେ କାର୍ଯ୍ୟରତ ଆସୋସିଏଶନ୍ ଫର୍ ଡେମୋକ୍ରାଟିକ୍ ରିଫମର୍ସ (ଏଡିଆର୍) ପକ୍ଷରୁ ସୂଚନା ଦିଆଯାଇଛି।
ଏବଂ ନ୍ୟାଶନାଲ ଇଲେକ୍ସନ ଓ୍ବାଚ୍ (ଏନ୍ଇଡବ୍ଲ୍ୟୁ) ମିଳିତ ଭାବେ ଏମ୍ପି ଏବଂ ବିଧାୟକମାନଙ୍କ ସତ୍ୟପାଠକୁ ବିଶ୍ଳେଷଣ କରାଯାଇଥିଲା। ୫ ବର୍ଷ ମଧ୍ୟରେ ନିର୍ବାଚନ ଲଢ଼ି ପରାସ୍ତ ହୋଇଥିବା ବିଧାନସଭା ଓ ଲୋକ ସଭା ପ୍ରାର୍ଥୀଙ୍କ ସତ୍ୟପାଠ ମଧ୍ୟ ଯାଞ୍ଚ କରାଯାଇଥିଲା। ଏଥିରୁ ଜଣାପଡ଼ିଛି ଯେ, ଏମ୍ପି, ବିଧାୟକଙ୍କ ମଧ୍ୟରୁ ଅଧିକାଂଶ ସେମାନଙ୍କ ବିରୋଧରେ ଥିବା ହେଟ୍ ସ୍ପିଚ୍ ମାମଲା ସମ୍ପର୍କରେ ସତ୍ୟପାଠରେ ଘୋଷଣା କରିଛନ୍ତି। ୩୩ ଏମ୍ପି ନିଜ ବିରୋଧରେ ଏପରି ମାମଲା ଥିବା ଉଲ୍ଲେଖ କରିଛନ୍ତି। ସେମାନଙ୍କ ମଧ୍ୟରେ ଉତ୍ତର ପ୍ରଦେଶର ୭, ତାମିଲନାଡୁର ୪, ବିହାର, କର୍ନାଟକ ଓ ତେଲଙ୍ଗାନାର ୩ ଜଣ ଲେଖାଏ, ଆସାମ, ଗୁଜରାଟ, ମହାରାଷ୍ଟ୍ର ଓ ପଶ୍ଚିମବଙ୍ଗର ୨ ଜଣ ଲେଖାଏ, ଝାଡ଼ଖଣ୍ଡ, ମଧ୍ୟପ୍ରଦେଶ, କେରଳ, ଓଡ଼ିଶା ଓ ପଞ୍ଜାବର ଜଣେ ଲେଖାଏ ଅଛନ୍ତି। ଘୃଣା ମନ୍ତବ୍ୟ ମାମଲାର ଅଭିଯୁକ୍ତ ଥିବା ସର୍ବାଧିକ ୨୨ ଏମ୍ପି ଭାଜପାର। ୨ ଜଣ କଂଗ୍ରେସର ହୋଇଥିବାବେଳେ ଏଏପି, ଏଆଇଏମ୍ଆଇଏମ୍, ଏଆଇୟୁଡିଏଫ୍, ଡିଏମ୍କେ, ଏମ୍ଡିଏମ୍କେ, ପିଏମ୍କେ, ଶିବସେନା(ୟୁବିଟି), ଭିସିକେର ଜଣେ ଲେଖାଏ ଅଛନ୍ତି। ଆଉ ଜଣେ ସ୍ବାଧୀନ ଏମ୍ପିଙ୍କ ନାମରେ ମଧ୍ୟ ଏପରି ମାମଲା ଚାଲିଛି। ଘୃଣା ମନ୍ତବ୍ୟ ମାମଲାର ଅଭିଯୁକ୍ତ ଥିବା ୭୪ ବିଧାୟକ ଏନେଇ ସତ୍ୟପାଠରେ ଘୋଷଣା କରିଛନ୍ତି। ସେମାନଙ୍କ ମଧ୍ୟରୁ ୯ ଜଣ ଲେଖାଏ ବିହାର ଓ ଉତ୍ତରପ୍ରଦେଶର। ଆନ୍ଧ୍ର ପ୍ରଦେଶ, ମହାରାଷ୍ଟ୍ର ଓ ତେଲଙ୍ଗାନାର ୬ ଜଣ ଲେଖାଏ ଥିବାବେଳେ ଆସାମ, ତାମିଲନାଡୁର ୫ ଜଣ ଲେଖାଏ ରହିଛନ୍ତି। ଦିଲ୍ଲୀ, ଗୁଜରାଟ, ପଶ୍ଚିମବଙ୍ଗର ୪ ଲେଖାଏ, ଝାଡ଼ଖଣ୍ଡ, ଉତ୍ତରାଖଣ୍ଡର ୩ ଜଣ ଲେଖାଏ ଏବଂ କର୍ନାଟକ, ପଞ୍ଜାବ, ରାଜସ୍ଥାନ ଓ ତ୍ରିପୁରାର ୨ ଜଣ ଲେଖାଏ ରହିଛନ୍ତି। ସେହିପରି ମଧ୍ୟପ୍ରଦେଶ ଓ ଓଡ଼ିଶାର ଜଣେ ଲେଖାଏ ବିଧାୟକଙ୍କ ବିରୋଧରେ ଏପରି ମାମଲା ବିଚାରାଧୀନ ରହିଛି। ବିଧାୟକଙ୍କ କଥା ଦେଖିଲେ ଭାଜପାର ସର୍ବାଧିକ ୨୦, କଂଗ୍ରେସ ୧୩, ଏଏପିର ୬ ଜଣଙ୍କ ନାମରେ ଘୃଣା ମନ୍ତବ୍ୟ ମାମଲା ଚାଲିଛି।
