ଭୁବନେଶ୍ୱର, ୨୨।୯(ବ୍ୟୁରୋ): ଆମ୍ବୁୁଲାନ୍ସ କର୍ମଚାରୀଙ୍କ ନିଃସ୍ବାର୍ଥପର ସେବା ଓ ଉପସ୍ଥିତ ବୁଦ୍ଧି ଯୋଗୁ ଅନେକ ସମୟରେ ବହୁ ଜୀବନ ରକ୍ଷା ପାଇଯାଉଛି। କେତେବେଳେ ରୋଗୀଙ୍କୁ ରକ୍ତ ଦେଇ ଜୀବନ ବଞ୍ଚାଉଛନ୍ତି ତ ଆଉ କେତେବେଳେ ନିଜ ଜୀବନକୁ ବାଜି ଲଗାଇ ମହାନତା ଦେଖାଉଛନ୍ତି। ଏମିତି ଆଉଏକ ଘଟଣା କେନ୍ଦୁଝର ଜିଲାରେ ଦେଖିବାକୁ ମିଳିଛି। ଆମ୍ବୁଲାନ୍ସ କର୍ମଚାରୀମାନେ ଉପାନ୍ତ ଅଞ୍ଚଳରୁ ରୋଗୀଙ୍କୁ ନିଜ କାନ୍ଧରେ ବୋହି ହସ୍ପିଟାଲରେ ପହଞ୍ଚାଇ ଅନ୍ୟମାନଙ୍କ ପାଇଁ ଉଦାହରଣ ସାଜିଛନ୍ତି। ମିଳିଥିବା ସୂଚନାନୁସାରେ, ରବରିଆ ଥାନା ଅନ୍ତର୍ଗତ ନିଆସଗଡ଼ିଆ ଗ୍ରାମରେ ଜଣେ ବ୍ୟକ୍ତି ଗୁରୁତର ଅସୁସ୍ଥ ହୋଇପଡିଥିଲେ। ଏ ନେଇ କଲ୍ ପାଇବା ପରେ ୧୦୮ ଆମ୍ବୁଲାନ୍ସ କର୍ମଚାରୀମାନେ ତୁରନ୍ତ ଉକ୍ତ ଗାଁ ଅଭିମୁଖେ ବାହାରିଥିଲେ। ମାତ୍ର ବାଟରେ ରାସ୍ତା ଅତ୍ୟନ୍ତ ଖରାପ ଥିବାରୁ ଆମ୍ବୁଲାନ୍ସଟି ଆଗକୁ ଯିବା ସମ୍ଭବ ନ ଥିଲା। ତେଣୁ କାଳ ବିଳମ୍ବ ନ କରି ଆମ୍ବୁଲାନ୍ସ କର୍ମଚାରୀମାନେ ନିଜେ ରୋଗୀଙ୍କ ନିକଟକୁ ଯାଇ ପ୍ରାୟ ଦେଢ଼କିମି କାନ୍ଧରେ ବୋହି ଆମ୍ବୁଲାନ୍ସ ନିକଟକୁ ଆଣିଥିଲେ। ଏହାପରେ ତାଙ୍କୁ ଚମ୍ପୁଆ ଡାକ୍ତରଖାନାରେ ଭର୍ତ୍ତି କରିଥିଲେ। ସେହିଭଳି ନିକଟରେ ୧୦୨ ଓ ୧୦୮ ଆମ୍ବୁଲାନ୍ସ କର୍ମଚାରୀଙ୍କ ପାଇଁ ବାଟରେ ପ୍ରସବ କରିଥିବା ବାଲେଶ୍ୱର ଜିଲା ଭୋଗରାଇ ବ୍ଲକ୍ ରାଉପୁର ଗ୍ରାମର ମହିଳା ଏବଂ ନବଜାତ ଶିଶୁଙ୍କ ଜୀବନ ବଞ୍ଚତ୍ୟାଇଥିଲା।
