ମୁମ୍ବାଇ,୨୨।୪: କରୋନା ପାଇଁ ଦେଶ ମଧ୍ୟରେ ଆର୍ଥତ୍କ କାର୍ଯ୍ୟକଳାପ ପ୍ରଭାବିତ ହୋଇଛି। ଏହାକୁ ଧ୍ୟାନରେ ରଖି କେୟାର ରେଟିଂ ପକ୍ଷରୁ ୨୦୨୧-୨୨ ଲାଗି ଭାରତର ଜିଡିପି ଅଭିବୃଦ୍ଧି ଆକଳନକୁ ୧୦.୨% ଖସାଯାଇଛି। ଭାରତ ଏହି ଅବଧିରେ ୧୦.୭ରୁ ୧୦.୯% ହାରରେ ଅଭିବୃଦ୍ଧି କରିବ ବୋଲି ଏହି ଏଜେନ୍ସି ପୂର୍ବରୁ କହିଥିଲା। ଗତ ଗୋଟିଏ ମାସ ମଧ୍ୟରେ ଏହି ଏଜେନ୍ସି ତୃତୀୟ ଥର ଲାଗି ଆକଳନରେ ପରିବର୍ତ୍ତନ କରିଛି। ଚଳିତ ବର୍ଷ ମାର୍ଚ୍ଚରେ ଏହା ପ୍ରଥମେ ଜିଡିପି ଆକଳନ କରି କହିଥିଲା ଅଭିବୃଦ୍ଧି ଜିଭିଏରେ ୧୧-୧୧.୨% ରହିବ। କରୋନା ସଂକ୍ରମଣ ବଢ଼ିବାରୁ ମହାରାଷ୍ଟ୍ର ସମେତ ଦେଶର ଅନ୍ୟ ରାଜ୍ୟଗୁଡ଼ିକରେ କରୋନା କଟକଣା କଡ଼ାକଡ଼ି ହୋଇଛି। ଲକ୍ଡାଉନ ଯୋଗୁ କ୍ଷତି ଆଶଙ୍କା କରି ଏପ୍ରିଲ ୫ରେ ଏହା କହିଥିଲା ଜିଡିପି ୧୦.୭ରୁ ୧୦.୯% ସ୍ତରରେ ରହିବ। ବର୍ତ୍ତମାନ ପୁଣିଥରେ ଏହାର ଆକଳନକୁ କମ୍ କରିଛି। ଚଳିତ ବର୍ଷ ଲକ୍ଡାଉନ ଯୋଗୁ ଜିଡିପି ବେଶି ପ୍ରଭାବିତ ହେବନାହିଁ ବୋଲି ଏହି ଏଜେନ୍ସି କହିଛି।
