ନୂଆଦିଲ୍ଲୀ,୬।୧: ଗତ ବର୍ଷର ଶେଷ ମାସରେ ଭାରତୀୟ ଅଟୋ ବଜାରରେ ଗାଡ଼ି ବିକ୍ରି ମାନ୍ଦା ରହିଥିବା ସୂଚନା ମିଳିଛି। ଏପରିକି ୨୦୨୨ ଅକ୍ଟୋବର ଏବଂ ନଭେମ୍ବର ମାସରେ ଗାଡ଼ି ବିକ୍ରିରେ ସକାରାତ୍ମକ ପ୍ରଭାବ ପଡ଼ିଥିବା ବେଳେ, ଡିସେମ୍ବରରେ ଏହାର ସଂଖ୍ୟା ହ୍ରାସ ପାଇଥିବା ଜଣାପଡ଼ିଛି। ବିଶେଷ କରି ରିଟେଲ୍ ଅଟୋମୋବାଇଲ୍ ବିକ୍ରିରେ ୫% ହ୍ରାସ ଘଟିଥିବା ଫେଡେରେସନ ଅଫ୍ ଅଟୋମୋବାଇଲ୍ ଡିଲର୍ସ ଆସୋସିଏସନ୍ (ଫାଡା) ପକ୍ଷରୁ ସୂଚନା ଦିଆଯାଇଛି। ସେହିଭଳି ୨୦୨୨ ଡିସେମ୍ବରରେ ୧୧,୩୩,୧୩୮ ୟୁନିଟ୍ ୨ ଚକିଆ ଗାଡ଼ି ବିକ୍ରି ହୋଇଥିବା ବେଳେ ଏହି ସମୟରେ ୩ ଚକିଆ ୬୩,୬୫୫ ୟୁନିଟ୍ ଗାଡି ବିକ୍ରି ହୋଇଛି। ଏପରିକି ବାଣିଜ୍ୟଭିତ୍ତିକ ଗାଡ଼ି ୬୬,୯୪୫ ୟୁନିଟ୍ ବିକ୍ରି ହୋଇଥିବା ବେଳେ ପାସେଞ୍ଜର ଗାଡ଼ି ୨,୮୦,୦୧୬ ୟୁନିଟ୍ ବିକ୍ରି ରେକର୍ଡ କରିଛି। ସେହିପରି ଏହି ଅବଧି ମଧ୍ୟରେ ଟ୍ରାକ୍ଟର ୭୮,୫୬୩ ୟୁନିଟ୍ ଗାଡ଼ି ବିକ୍ରି ରେକର୍ଡ କରିଥିବା ଫାଡା ପକ୍ଷରୁ କୁହାଯାଇଛି। ଏ ସମ୍ପର୍କରେ ଫାଡା ସଭାପତି ରାଜ ସିଙ୍ଗାନିଆ କହିଛନ୍ତି, ଗତ ୨ ମାସର ଭଲ ବିକ୍ରି ପରେ ଡିସେମ୍ବରରେ କୋଭିଡ୍ ଆଶଙ୍କାରୁ ବିକ୍ରି କମିଥିବାବେଳେ ୨୦୨୨ରେ ଦେଶରେ ମୋଟ ଖୁଚୁରା ଗାଡ଼ି ବିକ୍ରି ବୃଦ୍ଧି ପାଇଛି। ଏପରିକି ପାସେଞ୍ଜର ଗାଡ଼ି ସର୍ବାଧିକ ୩.୪୩ ନିୟୁତ ୟୁନିଟ୍ ଗାଡ଼ି ବିକ୍ରି ହୋଇଥିବା ଜଣାପଡ଼ିଛି। ସେହିପରି ପାସେଞ୍ଜର ଗାଡ଼ି ବ୍ୟତୀତ ଟ୍ରାକ୍ଟର ସେଗମେଣ୍ଟ ହେଉଛି ଅନ୍ୟ ଏକ ବିଭାଗ ଯେଉଁଥିରେ ୨୦୨୧, ୨୦୨୦ ଏବଂ ୨୦୧୯ ଠାରୁ ଅଧିକ ବିକ୍ରି ହୋଇଛି ବୋଲି ସେ ମତପ୍ରକାଶ କରିଛନ୍ତି। ଅପରପକ୍ଷରେ ୨୦୨୨ ଡିସେମ୍ବର ମାସରେ ଓଭରଅଲ୍ କ୍ଷେତ୍ରରେ ୫% ଗାଡ଼ି ବିକ୍ରି ହ୍ରାସ ଘଟିଥିବାବେଳେ ୨ଚକିଆ କ୍ଷେତ୍ରରେ ୧୧% କମିଥିବା ସୂଚନା ମିଳିଛି। ସେହିଭଳି ୩ ଚକିଆ କ୍ଷେତ୍ରରେ ୪୨%, ପିଭି କ୍ଷେତ୍ରରେ ୮%, ଟ୍ରାକ୍ଟର ୫% ଏବଂ ସିଭି କ୍ଷେତ୍ରରେ ୧୧% ବୃଦ୍ଧି ଘଟିଥିବା ରେର୍କଟ କରାଯାଇଛି। ସୂଚନାଯୋଗ୍ୟ, ୨୦୨୨ ଡିସେମ୍ବରରେ ୧୬ ଲକ୍ଷ ୨୨ ହଜାର ୩୧୭ ଗାଡ଼ି ବିକ୍ରି ହୋଇଥିଲାବେଳେ ୨୦୨୧ ଡିସେମ୍ବରରେ ୧୭ ଲକ୍ଷ ୧୪ ହଜାର ୯୪୨ ଗାଡି ବିକ୍ରି ରେକର୍ଡ କରାଯାଇଛି ବୋଲି ଫାଡା ପକ୍ଷରୁ କୁହାଯାଇଛି।
