ପଟାଙ୍ଗି,୧୦ା୮(ଶରତ କୁମାର ଧଳ): କୋରାପୁଟ ଜିଲା ପଟ୍ଟାଙ୍ଗି ଥାନା ଅନ୍ତର୍ଗତ ଗିର୍ଲିଗୁଡ଼ା ଛକ ନିକଟରେ ମାରୁତି କାର୍ ସହ ମୋଟରସାଇକେଲ ମୁହାଁମୁହିଁ ଧକ୍କା ହେବା ଫଳରେ କାର୍ରେ ଥିବା ଜଣେ ଏବଂ ମୋଟରସାଇକେଲର ଦୁଇ ଜଣ ଆହତ ହୋଇଛନ୍ତି। ୨ ଗୁରୁତରଙ୍କ ମଧ୍ୟରୁ ଜଣଙ୍କୁ ଜିଲା ମେଡିକାଲ କଲେଜକୁ ସ୍ଥାନାନ୍ତର କରାଯାଇଛି।
ସୂଚନା ମୁତାବକ, ଉକ୍ତ ଥାନା ଅନ୍ତର୍ଗତ ମାଳିପୁଟ ଗ୍ରାମର ଦ୍ରୋଣ ଝାଡୁ ଦୋରା, ସୁଶୀଲ ଝାଡୁ ଦୋରା ( ଦୁଇ ଭାଇ ) ଦୁହେଁ ଏକ ମୋଟରସାଇକେଲ ନମ୍ବର ଓଡି ୧୦ AB ୬୧୦୨ ଯୋଗେ ନିଜ ଗ୍ରାମ ଅଭିମୁଖେ ଯାଉଥିବା ସମୟରେ ବିପରୀତ ଦିଗରୁ ଆସୁଥିବା ସମ୍ବାଇ ପଞ୍ଚାୟତର ପଣ୍ଡେଇ ଗ୍ରାମର ମାରୁତି କାର୍ ନଂ ଓଆର୍ ୧୪ ସି ୧୪୦୦ ସହ ମୁହାଁମୁହିଁ ଧକ୍କା ହୋଇଥିଲା। ଯାହା ଫଳରେ କି ମୋଟର ସାଇକେଲଟି ଛିଟିକି ପଡ଼ିବା ସହ ମୋଟରସାଇକେଲରେ ଥିବା ଦୁଇଭାଇ ଦ୍ରୋଣ ଏବଂ ସୁଶୀଲ ଦୋରା ଗୁରୁତର ହୋଇ ରାସ୍ତାରେ ପଡ଼ି ରହିଥିବା ବେଳେ ନିଜ କୁନ୍ଦୁଲି ଗ୍ରାମ ନିଜ ଘରକୁ ଫେରୁଥିବା ପୂର୍ବତନ ବ୍ଲକ ଅଧ୍ୟକ୍ଷ ଜଗତ ଜ୍ୟୋତି ପାଙ୍ଗ ଘଟଣାସ୍ଥଳରେ ଅଟକି ଦୁଇ ଆହତଙ୍କୁ ନିଜ କାର୍ରେ ବସାଇ ସ୍ଥାନୀୟ ସ୍ବାସ୍ଥ୍ୟକେନ୍ଦ୍ରକୁ ନେଇ ପ୍ରାଥମିକ ଚିକିତ୍ସା କରାଇଥିଲେ କିନ୍ତୁ ଦୁଇ ଆହତଙ୍କ ମଧ୍ୟରୁ ଦ୍ରୋଣଙ୍କ ଅବସ୍ଥା ଠିକ ନ ଥିବାରୁ ତାଙ୍କୁ ମେଡିକାଲ କଲେଜ ସ୍ଥାନାନ୍ତର କରାଯାଇଛି। ଅନ୍ୟପକ୍ଷରେ କାର୍ରେ ଥିବା ୪ ଜଣଙ୍କ ମଧ୍ୟରୁ ଜଣଙ୍କ ମୁଣ୍ଡ ଫାଟି ଆହତ ହୋଇଥିବା ଜଣାପଡ଼ିଛି । ସେପଟେ ଖବର ପାଇ ଥାନା ଅଧିକାରୀ ପ୍ରଭାତ କୁମାର ବେହେରା , ଏସ୍ଆଇ ଏସ୍ଏସ୍ଆରାର୍ବି ବେନିଆ ଏବଂ ଅନ୍ୟ ପୋଲିସ କର୍ମଚାରୀ ଦୁର୍ଘଟଣାଳରେ ପହଞ୍ଚି ଦୁର୍ଘଟଣା ଗ୍ରସ୍ତ କାର୍ ଓ ମୋଟରସାଇକେଲ ଜବତ କରି ତଦନ୍ତ ଆରମ୍ଭ କରିଥିବା ଜଣାପଡ଼ିଛି।