ଭୁବନେଶ୍ୱର, ୨୦।୨ (ବନ୍ଦନା ସେଠୀ):ପୁଣି ଥରେ ବନ୍ଦ ହେଲା ‘କାର୍ଖାନା’। ଆଇଜି ପାର୍କ ରାସ୍ତାକଡ଼ରେ କାର୍ରେ ଖାଦ୍ୟ ଆଣି ବିକ୍ରି କରି ଚର୍ଚ୍ଚାକୁ ଆସିଥିଲେ ଦୁଇ ଯାଆ ରଶ୍ମିତା ଓ ନେହା ପାଣିଗ୍ରାହୀ। କମ୍ ଦାମ୍ରେ ଘରୋଇ ତଥା ଭଲ ଖାଦ୍ୟ ହୋଇଥିବାରୁ ଲୋକେ ଏହାକୁ ପସନ୍ଦ କରୁଥିଲେ। କାର୍ ଯୋଗେ ଖାଦ୍ୟ ଆଣି ପାର୍କ କଡ଼ରେ ବିକ୍ରି କରିବାରୁ ଏହାର ନାଁ ‘କାର୍ଖାନା’ ରଖାଯାଇଥିଲା। ତେବେ ବିନା ଟ୍ରେଡ୍ ଲାଇସେନ୍ସରେ ବେପାର କରୁଥିବାରୁ ଭୁବନେଶ୍ବର ମହାନଗର ନିଗମ (ବିଏମସି) ସେମାନଙ୍କୁ ୫ ହଜାର ଫାଇନ କାଟି ବେପାର ବନ୍ଦ କରାଇଥିଲା। ତେବେ କିଛିଦିନ ତଳେ ସ୍ମାର୍ଟ ଜନପଥ କଡ଼ରେ ଥିବା ଭେଣ୍ଡିଂ ଜୋନ୍ ନଂ. ୮୯ ଓ ୯୦କୁ ଭଡ଼ାରେ ନେଇ ବେପାର ଆରମ୍ଭ କରିଥିଲେ ଦୁଇ ଯାଆ। ମାତ୍ର ପୁଣିଥରେ ବିଏମସି ଉକ୍ତ ‘କାର୍ଖାନା’ ପୋଷ୍ଟର ଲାଗିଥିବା ୨ ଭେଣ୍ଡିଂଜୋନ୍କୁ ସିଲ୍ କରିଛି। କାର୍ଖାନା ନାଁରେ ୨ ଯାଆ ଚଳାଉଥିବା ଦୋକାନକୁ ବନ୍ଦ କରାଯିବା ସହ ଏହି ୨ ଭେଣ୍ଡିଂ ଜୋନର ମୂଳ ମାଲିକଙ୍କୁ ନୋଟିସ ଜାରି ହୋଇଥିବା ବିଏମ୍ସି ବିଭାଗୀୟ ଅଧିକାରୀ ସୂଚନା ଦେଇଛନ୍ତି। ଜନପଥ କଡ଼ରେ ଥିବା ଭେଣ୍ଡିଂ ଜୋନ୍ ପଲିସି ଅନୁଯାୟୀ, ବିଏମସି ଦ୍ବାରା ହସ୍ତଗତ ଭେଣ୍ଡିଂ ଜୋନକୁ ବିନା ଅନୁମତିରେ କେହି ଭଡ଼ାରେ ଲଗାଇପାରିବେ ନାହିଁ। ପୂର୍ବରୁ ବହୁ ଲୋକ ଜନପଥ କଡ଼ରେ ଥିବା ଭେଣ୍ଡିଂଜୋନ ହାତେଇବା ସହ ଭଡ଼ା ସୂତ୍ରରେ ନେବା ପାଇଁ ଚେଷ୍ଟା କରୁଥିଲେ ମଧ୍ୟ ନିୟମ ନ ଥିବାରୁ ତାଙ୍କୁ ଏନେଇ ଅନୁମତି ମିଳୁନାହିଁ। ଏଭଳି କ୍ଷେତ୍ରରେ ବିଏମସି ପକ୍ଷରୁ କାରଖାନାକୁ କୌଣସି ଭେଣ୍ଡିଂଜୋନ ଆବଣ୍ଟନ କରାଯାଇ ନଥିବାବେଳେ ଏହାକୁ ବେଆଇନ ଭାବେ ଭଡ଼ା ସୂତ୍ରରେ ନେଇ ବ୍ୟବସାୟ କରୁଥିଲେ। ଅଭିଯୋଗ ପାଇବା ପରେ ଉକ୍ତ ୨ଭେଣ୍ଡିଂ ଜୋନକୁ ସିଲ୍ କରାଯାଇଛି। ଏଥିସହ ଭେଣ୍ଡିଂଜୋନ୍ର ମୂଳ ମାଲିକ ଯଥାକ୍ରମେ ଧଳରେନ୍ଦ୍ର ଓଝା ଓ ଅଜୟ ଦାସଙ୍କୁ ବିଏମସି ସୋ-କଜ୍ ନୋଟିସ ଜାରି କରିଥିବା ବିଏମସି ମାର୍କେଟ ବିଭାଗ ଅଧିକାରୀ ସୂଚନା ଦେଇଛନ୍ତି। ଉଭୟ ଭେଣ୍ଡିଂଜୋନ ମାଲିକ ବିଏମସି ପକ୍ଷରୁ ରଖାଯାଇଥିବା ସର୍ତ୍ତ ଖିଲାପ କରିଛନ୍ତି। ତେଣୁ ବିଏମସି କାହିଁକି ସେମାନଙ୍କ ଉପରେ କାର୍ଯ୍ୟାନୁଷ୍ଠାନ ନେବ ନାହିଁ ବୋଲି ଉତ୍ତର ରଖିବାକୁ କୁହାଯାଇଛି। ନିର୍ଦ୍ଧାରିତ ସମୟ ମଧ୍ୟରେ ଉତ୍ତର ନ ରଖିଲେ ଉକ୍ତ ଭେଣ୍ଡିଂଜୋନ୍ ମାଲିକଙ୍କ ବିରୋଧରେ କାର୍ଯ୍ୟାନୁଷ୍ଠାନ ନିଆଯାଇ, ସମ୍ପୃକ୍ତ ଭେଣ୍ଡିଂଜୋନ୍କୁ ବିଏମସି ପୁନର୍ବାର ନିଜ ଅଧୀନକୁ ଆଣିବ। ଏଥିସହ ଉଚ୍ଛେଦ ହୋଇଥିବା ବ୍ୟବସାୟୀଙ୍କୁ ଏଠାରେ ଥଇଥାନ କରାଯିବ। ତେବେ ଶନିବାରଠାରୁ କାର୍ ଖାନାକୁ ସିଲ୍ କରାଯାଇଥିବାବେଳେ ଏଯାବତ୍ ଏନେଇ କୌଣସି ଉତ୍ତର ହସ୍ତଗତ ହୋଇ ନ ଥିବା ସୂଚନା ମିଳିଛି। ସେହିପରି ଘଟଣା ନେଇ ସମ୍ପୃକ୍ତ ୨ଯାଆଙ୍କର ମଧ୍ୟ ପ୍ରତିକ୍ରିୟା ମିଳିପାରିନାହିଁ।
