ବନ୍ତଳା,୧୮ା୭(ଡି.ଏନ.ଏ.) – ଅନୁଗୋଳ ଜିଲା ସାତକୋଶିଆ ଅଭୟାରଣ୍ୟରେ ନିୟମିତ ଚାଲିଛି ଶିକାର। କେତେବେଳେ ହରିଣ ମରାଯାଉଛି ତ କେବେ ପୁଣି ଠେକୁଆ ଓ କୁଟୁରା ମାରି ମାଂସ ବିକ୍ରି କରାଯାଉଛି। ବନ ବିଭାଗ ପାଟ୍ରୋଲିଂ କରୁଥିବା କହୁଥିଲେ ବି ଶିକାରୀଙ୍କ ବନ୍ଧୁକ ମୁହଁରୁ ଜୀବଜନ୍ତୀଙ୍କୁ ସୁରକ୍ଷା ଦେଇପାରୁ ନାହିଁ। ଗୁରୁବାର କମ୍ପାର୍ଟମେଣ୍ଟ ୧୦ରେ ଶିକାର ପ୍ରସ୍ତୁତି ବେଳେ ଏକକାଳୀନ ୮ ଶିକାରୀଙ୍କୁ ଗିରଫ କରାଯିବା ବନ ବିଭାଗର କାର୍ଯ୍ୟ ଉପରେ ପ୍ରଶ୍ନବାଚୀ ସୃଷ୍ଟି କରିଛି।
ବିଭାଗ ସୂତ୍ରରୁ ପ୍ରକାଶ ଯେ, ଟାଇଁସି ରିଜର୍ଭ ଜଙ୍ଗଲ କମ୍ପାର୍ଟମେଣ୍ଟ ୧୦ରେ ଗୁରୁବାର କେତେଜଣ ଶିକାରୀ ବନ୍ଧୁକ ଧରି ଲୁଚିଥିବା ଖବର ମିଳିଥିଲା। ପମ୍ପାସର ଓ ପୁରୁଣାକୋଟ ରେଞ୍ଜରଙ୍କ ସହ ବନ କର୍ମଚାରୀମାନେ ତୁରନ୍ତ ସେଠାରେ ଚଢ଼ାଉ କରି ୮ ଜଣଙ୍କୁ ଗିରଫ କରିଥିଲେ। ସେମାନେ ହେଲେ ଠାକୁରଗଡ଼ ଥାନା ବରହ୍ମ ଗ୍ରାମର ସୁଶାନ୍ତ ଭୋଇ, ସୁଶାନ୍ତ ପ୍ରଧାନ, ପୁରୁଣାକୋଟ ଥାନା ତରଭା ଗ୍ରାମର ଜୟନ୍ତ ଭୋଇ, ଅଜୟ ଭୋଇ, ବଡ଼ଖେତା ଗ୍ରାମର ରଞ୍ଜନ ଭୋଇ, ଯୋଗେଶ୍ୱର ଭୋଇ, ସିଦ୍ଧେଶ୍ୱର ଭୋଇ ଓ ସାଲର ଗ୍ରାମର ନୀଳକଣ୍ଠ ବର୍ଗିଆ। ଚଢ଼ାଉ ବେଳେ ୪ ଜଣ ଫେରାର ହୋଇଯାଇଛନ୍ତି। ଅଭିଯୁକ୍ତଙ୍କ ନିକଟରୁ ଏକ ଦେଶୀ ବନ୍ଧୁକ, ହେଡ୍ଲାଇଟ, ଟାଙ୍ଗିଆ, ଏକ ବାଇକ୍ (ନଂ. ଓଡି ୧୯-୧୫୪୫) ଜବତ କରାଯାଇଛି। ସୁଶାନ୍ତ ଭୋଇ ଦେଶୀ ବନ୍ଧୁକ ରଖି ଯୋଗେଶ୍ୱରଙ୍କ ଘରେ ରହି ଶିକାର କରନ୍ତି। ପୂର୍ବରୁ ଛୁଟାମୁଣ୍ଡା ରିଜର୍ଭ ଜଙ୍ଗଲ କମ୍ପାର୍ଟମେଣ୍ଟ ୩ ଓ ୫ରେ କୁଟୁରା, ଠେକୁଆ ଶିକାର କରି ସାଲର ଗ୍ରାମର ନୀଳକଣ୍ଠଙ୍କ ଘରେ ମାଂସ କାଟିଥିଲେ। ଗତ ୧୨ ତାରିଖରେ ମଧ୍ୟ ଏମାନେ କେତେକ ବନ୍ୟପ୍ରାଣୀ ଶିକାର କରିଥିଲେ। କିନ୍ତୁ ଗୁରୁବାର ଶିକାର ପାଇଁ ପ୍ରସ୍ତୁତି ବେଳେ ବିଭାଗ ସମ୍ପୃକ୍ତ ଶିକାରୀମାନଙ୍କୁ ଗିରଫ କରିଥିଲା।
