କାଏମା,୧୫ା୫(ଡି.ଏନ.ଏ.): ଯାଜପୁର ଜିଲା ଧର୍ମଶାଳା ବ୍ଲକ ଅଧୀନ ମିର୍ଜାପୁର ପଞ୍ଚାୟତ କଣ୍ଟାବଣିଆ ଗାଁର ବେତ କାରିଗର ଏବେ ସମସ୍ୟାଘେରରେ। ଏହି ଗାଁରେ ପାଖାପାଖି ୪୦ରୁ ଊର୍ଦ୍ଧ୍ୱ ପରିବାର ବେତରେ ବିଭିନ୍ନ ସାମଗ୍ରୀ ପ୍ରସ୍ତୁତ କରି ତାହାକୁ ବିକ୍ରି କରି ପରିବାର ଗୁଜରାଣ ମେଣ୍ଟାଇଥାନ୍ତି। କିନ୍ତୁ ଏବେ କଞ୍ଚାମାଲ୍ ଅଭାବ ସେମାନଙ୍କ ପାଇଁ ସମସ୍ୟା ସୃଷ୍ଟି କରିଛି। ଦୀର୍ଘବର୍ଷ ଧରି ଚଳିଆସୁଥିବା ବୃତ୍ତି ଏବେ କଞ୍ଚାମାଲ ଓ ପ୍ରଶାସନିକ ଦୃଷ୍ଟି ଅଭାବରୁ ବାଧାପ୍ରାପ୍ତ ହୋଇଛି। ଜଙ୍ଗଲରେ ଆଉ ବେତ ମିଳୁନାହିଁ। ଯଦି ବି ମିଳୁଛି ତାହାକୁ କାରିଗରମାନେ ଆଣିପାରୁନାହାନ୍ତି। ଏହାକୁ ବନ ବିଭାଗ କର୍ମଚାରୀ ବିରୋଧ କରୁଥିବା କେତେଜଣ ବେତ କାରିଗର କହିଛନ୍ତି। ବାହାରୁ ବେତ ଆଣିଲେ ପରିବହନ ଖର୍ଚ୍ଚ ତୁଲାଇବା ମୁସ୍କିଲ ହୋଇପଡୁଛି। ଫଳରେ ଅନେକ କାରିଗର ଏହି ବୃତ୍ତିରୁ ମୁହଁ ଫେରାଇ ନେଉଛନ୍ତି। ବେତ ତିଆରି ଆସବାବପତ୍ର ଯେମିତି ହାଲୁକା, ସେମିତି ସୁନ୍ଦର। ଏହାସହ ଦୀର୍ଘଦିନ ଧରି ବ୍ୟବହାର ହୋଇପାରୁଥିବାରୁ ବଜାରରେ ଭଲ ଚାହିଦା ରହିଥାଏ। ଏମାନଙ୍କ ହାତତିଆରି ସାମଗ୍ରୀ ଯଥା; ଗଉଣି, କୁଞ୍ଚ, ମାଣ, ସେର, ଟୋକେଇ, ସୋଫା ଓ ଘରସଜ୍ଜା ଉପକରଣକୁ ଦେଖିଲେ ଲୋକେ କ୍ରୟ କରିବାକୁ ଆଗ୍ରହ ପ୍ରକାଶ କରିଥାନ୍ତି।
ଓଡ଼ିଶାର ବାଲେଶ୍ୱର, ବାରିପଦା, କେନ୍ଦ୍ରାପଡ଼ା, କଟକ, ଜଗତ୍ସିଂହପୁର ଓ ପୁରୀ ଆଦି ୩୦ ଜିଲାରେ ବେତ ସାମଗ୍ରୀର ଚାହିଦା ରହିଛି। ଜିଲା ଶିଳ୍ପକେନ୍ଦ୍ର ପକ୍ଷରୁ ଏହି କାରିଗରଙ୍କୁ ଅଧିକ ପ୍ରଶିକ୍ଷିତ କରି ବ୍ୟବସାୟ ବଢ଼ାଇବା ପାଇଁ ଉଦ୍ୟମ ଆରମ୍ଭ ହୋଇଥିଲା। ମାତ୍ର କଞ୍ଚାମାଲ ଅଭାବରୁ ଏହା ବନ୍ଦ ହୋଇଯାଇଛି। କାରିଗରମାନେ ଏବେ ଘୋର ଆର୍ଥିକ ସମସ୍ୟାରେ ଦିନ କାଟୁଛନ୍ତି। କେତେଜଣ ଦୂର ଜଙ୍ଗଲରୁ ବେତ ସଂଗ୍ରହ କରି ନିଜ ବୃତ୍ତିକୁ ବଞ୍ଚାଇ ରଖିବା ପାଇଁ ସଂଘର୍ଷ ଜାରି ରଖିଛନ୍ତି। ତେବେ ପ୍ରଶାସନ କଞ୍ଚାମାଲ ସହ ଆବଶ୍ୟକ ସହାୟତା ଯୋଗାଇଦେଲେ ସେମାନେ ନିଜ ବୃତ୍ତି ବଞ୍ଚାଇ ରଖିବା ସହ ଅର୍ଥ ରୋଜଗାର କରିପାରନ୍ତେ। ତେଣୁ ଜିଲା ପ୍ରଶାସନ ଏଥିପ୍ରତି ଦୃଷ୍ଟିଦେବାକୁ ସେମାନେ ଦାବି କରିଛନ୍ତି।
