ଦେଓଗାଁ,୪ା୩(ଡି.ଏନ୍.ଏ): ବଲାଙ୍ଗୀର ଜିଲା ଦେଓଗାଁ ବ୍ଲକ ଉପରଝର ପଞ୍ଚାୟତର ଜଣେ ପରାଜିତ ସରପଞ୍ଚ ପ୍ରାର୍ଥୀଙ୍କ ସ୍ବାମୀ ଲୋକଙ୍କୁ ଦେଇଥିବା ଟଙ୍କା ମାଗିବାର ଭିଡିଓ ଭାଇରାଲ ହୋଇଛି। ସ୍ତ୍ରୀ ପରାଜିତ ହେବା ପରେ ସ୍ବାମୀ କିଛି ସମର୍ଥକଙ୍କୁ ଧରି ପଞ୍ଚାୟତ ଅଧୀନ ନୁଆପାଲି ଗାଁକୁ ଯାଇଥିଲେ। ସେଠାରେ ଘର ଘର ବୁଲି ଲୋକଙ୍କୁ ଟଙ୍କା ମାଗିଥିଲେ। ଏହାର ଭିଡିଓ ଏବେ ମୋବାଇଲରୁ ମୋବାଇଲ ଘୁରି ବୁଲୁଛି।
ଏପରିକି ଭିଡିଓରୁ ଏକ କ୍ରିକେଟ ଟୁର୍ନାମେଣ୍ଟକୁ ମୁଖ୍ୟ ଅତିଥି ହୋଇ ଯାଇଥିବା ସମୟରେ ଦେଇଥିବା ୫ ହଜାର ଟଙ୍କା ଫେରସ୍ତ ମାଗିଥିଲେ। ଉକ୍ତ ଟିମ୍ର ସଦସ୍ୟମାନେ ୫ ହଜାର ସହ ତେଲ ଖର୍ଚ୍ଚ ବାବଦକୁ ୫ ହଜାର ଏକ ଶହ ଟଙ୍କା ପ୍ରାର୍ଥିନୀଙ୍କ ସ୍ବାମୀଙ୍କୁ ଫେରାଇଥିବା ଭିଡିଓରୁ ଜଣାପଡୁଛି। ଅନୁରୂପ ଭାବେ ବଡବାହାଲ ପଞ୍ଚାୟତରେ ମଧ୍ୟ ଜନୈକ ପରାଜିତ ସମିତି ସଭ୍ୟ ପ୍ରାର୍ଥୀ ସମର୍ଥକଙ୍କ ସହ ଟଙ୍କା ମାଗିିବା ଘଟଣା ଚର୍ଚ୍ଚାର ବିଷୟ ହୋଇଛି।
