ଢେଙ୍କାନାଳ ଅଫିସ, ୨୬।୭ ଢେଙ୍କାନାଳ ଜିଲା ଆଞ୍ଚଳିକ ପରିବହନ ଅଧିକାରୀ (ଆର୍ଟିଓ)ଙ୍କ କାର୍ଯ୍ୟାଳୟରେ ଗାଡ଼ି ପଞ୍ଜୀକରଣରେ ବଡ଼ ଧରଣର ତ୍ରୁଟି ହୋଇଛି। ଭଲ୍ୟୁମ୍ ବୁକରେ ଏକ ବୋଲେରୋକୁ ଯାତ୍ରୀବାହୀ ଗାଡ଼ି ଦର୍ଶାଯାଇଥିବାବେଳେ ପ୍ରଦାନ କରାଯାଇଥିବା ରେଜିଷ୍ଟ୍ରେଶନ ସାର୍ଟିଫିକେଟ୍ ସ୍ମାର୍ଟକାର୍ଡରେ ଏହାକୁ କ୍ୟାମ୍ପର (ଡାଲାଯୁକ୍ତ ପିକ୍ଅପ୍ ଭ୍ୟାନ) ବୋଲି ଦର୍ଶାଯାଇଛି। ଏଭଳି ବିଭାଗୀୟ ତ୍ରୁଟିକୁ ସୁଧାରିବା ପରିବର୍ତ୍ତେ ଫିଟ୍ନେସ୍ ସାର୍ଟିଫିକେଟ୍ ଦିଆଯାଉ ନ ଥିବାରୁ ଦୀର୍ଘ ୯ବର୍ଷ ହେଲା ଗାଡ଼ି ଅବ୍ୟବହୃତ ହୋଇ ପଡ଼ିରହିଛି। ଗୋଟିଏ ପଟେ ଗାଡ଼ିଟି ବ୍ୟବସାୟରେ ଲାଗି ପାରୁ ନ ଥିବାବେଳେ ଅନ୍ୟପଟେ ମାଲିକଙ୍କ ଉପରେ ଋଣ ଭାର ବଢ଼ିଚାଲିଥିବା ଅଭିଯୋଗ ହୋଇଛି।
ଢେଙ୍କାନାଳ ସହର ଅମଲାପଡ଼ା ଅଞ୍ଚଳର ଗାଡ଼ି ମାଲିକ ଅକ୍ଷୟ କୁମାର ପ୍ରଧାନଙ୍କ କହିବା କଥା, ସେ ଉକ୍ତ ବୋଲେରୋ (ନଂ. ଓଆର୍ ୦୬-ଏଫ୍-୬୯୭୯)କୁ ୨୦୦୫ରେ କିଣିଥିଲେ। ୨୦୦୫ ନଭେମ୍ବର ୩୦ରେ ଆର୍ଟିଓ ଅଫିସରେ ଏହାର ରେଜିଷ୍ଟ୍ରେଶନ ହୋଇଥିଲା। ରାଜ୍ୟ ସରକାରଙ୍କ ଆଞ୍ଚଳିକ ପରିବହନରେ ଥିବା ଭେହିକିଲ ପର୍ଟିକୁଲାରରେ ଗାଡ଼ିକୁ ୮ସିଟ୍ ବିଶିଷ୍ଟ ବୋଲେରୋ ବୋଲି ଉଲ୍ଲେଖ କରାଯାଇଥିଲା। ଆର୍ଟିଓ ଅଫିସରେ ଥିବା ଭଲ୍ୟୁମ ଅନୁଯାୟୀ ରେଜିଷ୍ଟ୍ରେଶନ ସାର୍ଟିଫିକେଟ ପ୍ରସ୍ତୁତ କରାଯିବା କଥା। ହେଲେ ଏଥିରେ ବ୍ୟତିକ୍ରମ ହୋଇଛି। ସବୁଠାରୁ ବଡ଼କଥା, ୨୦୦୫ରୁ ୨୦୧୩ ଯାଏ ଏକ ଯାତ୍ରାବାହୀ ଗାଡ଼ିକୁ କ୍ୟାମ୍ପର ଦର୍ଶାଇ ନିୟମିତ ଭାବେ ଟିକସ୍ ଆଦାୟ କରି ଫିଟ୍ନେସ୍ ଦିଆଯାଇଛି। ୨୦୧୩ ପରେ ହଠାତ୍ ଆର୍ଟିଓରୁ ଉକ୍ତ ଗାଡ଼ିର ଫିଟ୍ନେସ ସାର୍ଟିଫିକେଟ ପ୍ରଦାନ କରିବା ବନ୍ଦ କରିଦିଆଯାଇଛି। ଫଳରେ ଗାଡ଼ି ଘରେ ପଡ଼ିରହିଛି। ଋଣ କିପରି ପରିଶୋଧ ହେବ ସେହି ଚିନ୍ତାରେ ଦିନ କଟୁଛି। ବାରମ୍ବାର ଅଭିଯୋଗ ସତ୍ତ୍ୱେ ଅଧିକାରୀ କୌଣସି ପଦକ୍ଷେପ ନେଉନାହାନ୍ତି। ତେଣୁ ବାଧ୍ୟ ହୋଇ ଆଇନରେ ଆଶ୍ରୟ ନେବେ ବୋଲି ଅକ୍ଷୟ କହିଛନ୍ତି। ଜିଲା ସଦର ମହକୁମାରେ ଥିବା ଆଞ୍ଚଳିକ ପରିବହନ ଅଧିକାରୀଙ୍କ କାର୍ଯ୍ୟାଳୟରେ ଏଭଳି ତ୍ରୁଟି ଯୋଗୁ ଜଣେ ଗାଡ଼ି ମାଲିକ ଦୀର୍ଘ ୯ବର୍ଷ ହେଲା ମାନସିକ ଚାପରେ ଅଛନ୍ତି। ଏହାର ବିଧିବଦ୍ଧ ତଦନ୍ତ କରିବାକୁ ସେ ଦାବି କରିଛନ୍ତି।
ଏ ସଂକ୍ରାନ୍ତରେ ମୋଟରଯାନ ନିରୀକ୍ଷକ ଦେବାଶିଷ ସ୍ବାଇଁ କୁହନ୍ତି, ଗାଡ଼ି ରେଜିଷ୍ଟ୍ରେଶନ ସମୟରେ ଦାୟିତ୍ୱରେ ଥିବା ଅଧିକାରୀଙ୍କ ଦ୍ୱାରା ଏଭଳି ତ୍ରୁଟି ହୋଇଛି। ଗାଡିର ଭଲ୍ୟୁମ୍ ବହି ଅନୁସାରେ ରେଜିଷ୍ଟ୍ରେଶନ ସ୍ମାର୍ଟ ସାର୍ଟିଫିକେଟ୍ ପ୍ରଦାନ କରିବା କଥା। ତାହା ହୋଇନାହିଁ। କିଛି ଦିନ ତଳେ ଗାଡି ମାଲିକ ଆସି ଏ ସଂକ୍ରାନ୍ତରେ ଅଭିଯୋଗ କରିଥିଲେ। ଆବେଦନ କଲେ ସଂଶୋଧନ କରିଦିଆଯିବ ବୋଲି ତାଙ୍କୁ କୁହାଯାଇଥିବା ମୋଟରଯାନ ନିରୀକ୍ଷକ ସ୍ବାଇଁ ସୂଚନା ଦେଇଛନ୍ତି।
