କବିସୂର୍ଯ୍ୟନଗର,୩୦ା୮: ଗଞ୍ଜାମ ଜିଲା କବିସୂର୍ଯ୍ୟନଗର ମେଡିକାଲରେ ସୋମବାର ପ୍ରଥମ, ଦ୍ୱିତୀୟ ଡୋଜ୍ ଟିକା ନେବା ଲାଗି ପ୍ରବଳ ଭିଡ ହୋଇଥିଲା। ଟିକାକରଣ ସକାଳ ୯ଟାରୁ ଆରମ୍ଭ ହୋଇଥିଲା। ଏଥିଲାଗି ୨ ହଜାରରୁ ଊର୍ଦ୍ଧ୍ୱ ଲୋକ ଆଗୁଆ ଭିଡ ଜମାଇଥିଲେ। ଆବଶ୍ୟକ ପରିମାଣ ସିରିଞ୍ଜ ନ ଥିବା ନେଇ ମେଡିକାଲ କର୍ତ୍ତୃପକ୍ଷ କହିିଥିଲେ ସୁଦ୍ଧା ଲୋକେ ଫେରି ନ ଥିଲେ। ଟିକା ନେବା ପାଇଁ ପରସ୍ପର ମଧ୍ୟରେ ଏକପ୍ରକାର ପ୍ରତିଯୋଗିତା ଆରମ୍ଭ ହୋଇଥିଲା।
ମାତ୍ର ଗୋଟିଏ କେନ୍ଦ୍ରରେ ୫ ଡାଟା ଏଣ୍ଟ୍ରି ଅପରେଟର, ୩ ଭ୍ୟାକ୍ସିନେଟର, ଏଏନ୍ଏମ୍, ସୁପରଭାଇଜର, ୩ ସିକ୍ୟୁରିଟି ଗାର୍ଡ, ସୁଇପର ଓ ୫ ପୋଲିସ କର୍ମଚାରୀ ଥିଲେ। ପୋଲିସ କର୍ମଚାରୀଙ୍କୁ ଲୋକେ ଠେଲି ଗୋଟିଏ ଘର ଭିତରେ ରଖିଦେଇଥିଲେ। ସେମାନେ ବାହାରକୁ ଆସି ନ ପାରି ଶିଡ଼ି ସହାଯ୍ୟରେ ପଦାକୁ ଆସିଥିଲେ। ପ୍ରବଳ ଠେଲାପେଲା ମଧ୍ୟରେ ତିନିଜଣ ମହିଳା ଆହତ ଓ ଜଣେ ଗୁରୁତର ହୋଇପଡ଼ିଥିଲେ। ଗୁରୁତର ମହିଳାକୁ ଶିଡ଼ି ସାହାଯ୍ୟରେ ଭିତରକୁ ନିଆଯାଇ ସାଲାଇନ ଓ ଔଷଧ ଦିଆଯାଇଥିଲା। ଲୋକଙ୍କ ଠେଲାପେଲାରେ ମେଡିକାଲର କବାଟ, ରେଲିଂ ଭାଙ୍ଗି ଯାଇଥିବା ସ୍ବାସ୍ଥ୍ୟ ଅଧିକାରୀ ଡା. ସୁଶାନ୍ତ କୁମାର ମୁଖି କହିଛନ୍ତି। ଶେଷରେ ଭିଡ ନିୟନ୍ତ୍ରଣ ବାହାରକୁ ଚାଲିଯିବା ଦେଖି ସ୍ବାସ୍ଥ୍ୟ ଅଧିକାରୀ ଅପରାହ୍ନରେ ଟିକାକରଣ ବନ୍ଦ କରିଥିଲେ। ସେହିପରି ଭିଡ଼ ବୁଢ଼ାମ୍ବ ଓ ଆଠଗଡର଼େ ହେବାରୁ ଟିକାକରଣ ବନ୍ଦ ରଖାଯାଇଥିଲା। କବିସୂର୍ଯ୍ୟନଗରରେ ୭ ଶହ, ବୁଢ଼ାମ୍ବରେ ୩ଶହ ଓ ଆଠଗଡ଼ରେ ୩ ଶହ ଲୋକ ଟିକାନେବା ସମ୍ଭବ ହୋଇଥିଲା। ପ୍ରବଳ ଭିଡ ଯୋଗୁ ଗର୍ଭବତୀ, ଅନ୍ଲାଇନ୍ ପଞ୍ଜୀକରଣକାରୀ, ବୃଦ୍ଧାବୃଦ୍ଧ ଟିକାକରଣରୁ ବଞ୍ଚିତ ହୋଇଥିଲେ। ପୂର୍ବପରି ମଙ୍ଗଳବାର ଟିକାକରଣ କରାଯିବ ବୋଲି ମେଡିକାଲ ସୂତ୍ରରୁ ଜଣାପଡିଛି।
