ନୂଆଦିଲ୍ଲୀ,୨୮।୪: କେନ୍ଦ୍ର କ୍ୟାବିନେଟ୍ ପକ୍ଷରୁ ବୁଧବାର ଫସ୍ଫେଟିକ୍ ଆଣ୍ଡ ପୋଟାସିକ୍ (ପି ଆଣ୍ଡ କେ) ସାର ପାଇଁ ସବ୍ସିଡିରେ ପ୍ରାୟ ୫୦% ବୃଦ୍ଧିକୁ ମଞ୍ଜୁରୀ ପ୍ରଦାନ କରାଯାଇଛି। ଏଥିସହିତ ଖରିଫ ଋତୁରେ ସାର ଦାମ୍ ବୃଦ୍ଧି ହେବ ନାହିଁ। ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ଅଧ୍ୟକ୍ଷତାରେ ମନ୍ତ୍ରିମଣ୍ଡଳ ସବ୍ସିଡିକୁ ୧,୬୫୦ ଟଙ୍କାରୁ ବୃଦ୍ଧି କରି ବ୍ୟାଗ୍ ପିଛା ୨୫୦୦ ଟଙ୍କା ପ୍ରସ୍ତାବରେ ସମ୍ମତି ପ୍ରଦାନ କରିଛନ୍ତି। ଫଳରେ ପି ଆଣ୍ଡ କେ ସାର ସବ୍ସିଡିକୁ ୨୧,୦୦୦ କୋଟି ଟଙ୍କାରୁ ୬୦,୯୩୯.୨୩ କୋଟି ଟଙ୍କାକୁ ବୃଦ୍ଧି ପାଇଁ ନିଷ୍ପତ୍ତି ନିଆଯାଇଛି। କେନ୍ଦ୍ର ମନ୍ତ୍ରିମଣ୍ଡଳ ପକ୍ଷରୁ ଏପ୍ରିଲ୍ରୁ ସେପ୍ଟେମ୍ବର ୩୦ ପର୍ଯ୍ୟନ୍ତ ଚାଲୁଥିବା ଖରିଫ ଋତୁ ପାଇଁ ପି ଆଣ୍ଡ କେ ସାର ଲାଗି ପୋଷକ ଏବଂ ତତ୍ତ୍ୱ ଆଧାରିତ ସବ୍ସିଡି ଦର ପାଇଁ ଏହି ମଞ୍ଜୁରୀ ପ୍ରଦାନ କରାଯାଇଛି। ଏହାଦ୍ୱାରା ଦେଶର ୧୪ କୋଟି ଚାଷୀ ଲାଭବାନ୍ ହେବେ। ତେବେ ଏହାଦ୍ୱାରା ଚଳିତ ଆର୍ଥିକ ବର୍ଷ ଅର୍ଥାତ୍ ୨୦୨୨-୨୩ରେ ସାର ସବ୍ସିଡି ଉପରେ କେନ୍ଦ୍ରର ବ୍ୟୟ ୨.୧୦ ଲକ୍ଷ କୋଟିରୁ ୨.୩୦ ଲକ୍ଷ କୋଟି ମଧ୍ୟରେ ରହିବ ବୋଲି ଅନୁମାନ କରାଯାଉଛି। ରିପୋର୍ଟ ଅନୁସାରେ ଏହା ଅନ୍ୟ ଆର୍ଥିକ ବର୍ଷ ତୁଳନାରେ ଏକ ବର୍ଷର ସାର ସବ୍ସିଡି ପାଇଁ ସର୍ବାଧିକ ବ୍ୟୟ। ପୂର୍ବରୁ ଆର୍ଥିକ ବର୍ଷ ୨୦୨୨-୨୩ ପାଇଁ ବଜେଟରେ ସାର ସବ୍ସିଡି ପାଇଁ ୧.୦୫ଲକ୍ଷ କୋଟି ଟଙ୍କାର ଅନୁମାନ କରାଯାଇଥିଲା। ବୈଶ୍ୱିକ ଅଶୋଧିତ ତୈଳ ବୃଦ୍ଧି ପ୍ରଭାବକୁ କମ୍ କରିବା ପାଇଁ ସରକାର ଏଭଳି ପଦକ୍ଷେପ ନେଇଥିବା ଅନୁମାନ କରାଯାଉଛି। ଏହାଛଡ଼ା ସରକାର ସବ୍ସିଡି ବୃଦ୍ଧି ନ କଲେ ଚାଷୀଙ୍କୁ ଅଧିକ ଦାମ୍ରେ ସାର କ୍ରୟ କରିବାକୁ ପଡ଼ିବ। ତେବେ ସରକାର ଚାଷୀଙ୍କୁ ବୋଝ ଦେଇ ନିଜେ କୌଣସି ରାଜନୈତିକ ରିସ୍କ ନେବାକୁ ଚାହୁଁ ନ ଥିବା ଆଶା କରାଯାଉଛି। ସୂଚନାଯୋଗ୍ୟ, ରୁଷିଆ-ୟୁକ୍ରେନ୍ ଯୁଦ୍ଧ କାରଣରୁ ସାର ତିଆରି ଖର୍ଚ୍ଚ ବୃଦ୍ଧି ପାଇଛି। ଯୁଦ୍ଧ ଦ୍ୱାରା ଫସ୍ଫେଟିକ୍ ଆଣ୍ଡ ପୋଟାସିୟମ୍ ସାରର ଯୋଗାଣ ପ୍ରଭାବିତ ହୋଇଛି। ସାର କମ୍ପାନୀଗୁଡ଼ିକ ଅନୁସାରେ କାନାଡା, ଚାଇନା, ଜୋର୍ଡନ, ମାଲେସିଆ, ଇଣ୍ଡୋନେସିଆ ଏବଂ ଆମେରିକାରୁ ସାର ତିଆରି କଞ୍ଚାମାଲ ଆସୁଥିବାରୁ ଦର ବୃଦ୍ଧି ପାଇଛି।
