ନୂଆଦିଲ୍ଲୀ,୧୪।୧୨ : ଭାରତରେ ବଢ଼ିଥିବା ପେଟ୍ରୋଲ ଡିଜେଲ ଦାମ କମିବାର ନା ଧରୁନି। ସରକାର ରୁଷିଆଠାରୁ ବ୍ୟାରେଲ ପିଛା ୪୯ ଡଲାରରେ ଅଶୋଧିତ ତୈଳ କିଣୁଛନ୍ତି। ଏକ ବ୍ୟାରେଲରେ ୧୫୯ ଲିଟର ଅଶୋଧିତ ତୈଳ ରହିଥାଏ। ଏକ ହିସାବ ଅନୁସାରେ ଭାରତ କିଣୁଥିବା ଅଶୋଧିତ ଏକ ବ୍ୟାରେଲର ଦାମ ୧୫୯ ଲିଟର ପିଛା ୪,୦୪୩.୧୬ ଟଙ୍କା ରହିଛି। ଅର୍ଥାତ୍ ଲିଟର ପିଛା ଏହା ୨୫.୪୩ ଟଙ୍କା ହେଉଛି। ଅଶୋଧିତ ତୈଳ ଦାମ ଲଟର ପିଛା ୨୫.୪୩ ଟଙ୍କା ହେଲେ ମଧ୍ୟ ଦେଶରେ ପେଟ୍ରୋଲ ଦାମ ହାରାହାରି ୧୦୩ ଟଙ୍କା ରହିଛି। ଅପର ପକ୍ଷରେ ଡିଜେଲ ଦାମ ହାରାହାରି ୯୪ ଟଙ୍କା ରହିଛି। ଫଳରେ ଅନ୍ତର୍ଜାତୀୟ ବଜାରରେ ଅଶୋଧିତ ତୈଳ କିଣା ୨୫ ଟଙ୍କା ପଡୁଥିବାବେଳେ ଶୋଧନ ପରେ ବିକ୍ରି ୧୦୦ ଟଙ୍କାରୁ ଅଧିକ ରହୁଛି।
ସରକାରଙ୍କ ପକ୍ଷରୁ ପେଟ୍ରୋଲ ଉପରେ ଲିଟର ପିଛା ହାରାହାରି ୩୨.୯୮ ଟଙ୍କାର ଟିକସ ଲାଗୁ ହେଉଥିବାବେଳେ ଡିଜେଲ ଉପରେ ହାରାହାରି ୩୧.୮୩ ଟଙ୍କା ଏକ୍ସାଇଜ ଡ୍ୟୁଟି ଲାଗୁ ହେଉଛି। ଜିଏସ୍ଟିର ସର୍ବାଧିକ ଟିକସ ୨୮ ପ୍ରତିଶତ ଥିଲେ ମଧ୍ୟ ପେଟ୍ରୋଲ ଡିଜେଲ ଉପରେ ଏହା ୧୦୦ ପ୍ରତିଶତ ଲାଗୁ ହେଉଛି। ଅଶୋଧିତ ତୈଳ ଉପରେ ୧୩.୭୫ ପ୍ରତିଶତ ଆମଦାନୀ ଶୁଳ୍କ ଲାଗୁ କରାଯାଇଥାଏ। ଏହା ସହିତ ଅଶୋଧିତ ତୈଳ ଉପରେ ପରିବହନ ତଥା ବୀମା ଚାର୍ଜ, ରିଫାଇନିଂ ମାର୍ଜିନ, ଡିଲର କମିଶନ, ଏକ୍ସଚେଞ୍ଜ ରେଟ ଆଦି ଲାଗୁ ହୋଇଥାଏ।
ଅର୍ନ୍ତଜାତୀୟ ବଜାରରୁ ଲିଟର ପିଛା ହାରାହାରି ୨୫ ଟଙ୍କାରେ କିଣାଯାଉଥିବା ଅଶୋଧିତ ତୈଳର ଦାମ ଶୋଧନ ପରେ ୧୦୦ ଟଙ୍କାରୁ ଅଧିକ ହେଉଛି। ପେଟ୍ରୋଲ ଡିଜେଲ ଦାମ ବଢ଼ିବା ଦ୍ୱାରା ପରିବହନ ଉପରେ ନିର୍ଭର କରୁଥିବା ସମସ୍ତ ସାମଗ୍ରୀର ଦାମ ଆପଣା ଛାଏଁ ବଢ଼ିବାରେ ଲାଗିଛି। ଦେଶରେ ମହଙ୍ଗା ସ୍ଥିତି ସଙ୍କଟ ଜନକ ସ୍ଥିତିରେ ରହିଛି।
ବ୍ୟାରେଲ ପିଛା ଅଶୋଧିତ ତୈଳ ଦାମ ମାର୍ଚ୍ଚରେ ୧୪୦ ଡଲାର ଅର୍ଥାତ ୧୧,୫୩୮ ଟଙ୍କାଥିଲା। ତେବେ ଏହା ଲିଟର ପିଛା ୭୨.୫୭ ଟଙ୍କା ଥିଲା। ମାତ୍ର ଏବେ ରୁଷିଆ ତୈଳର ଦାମ ଲିଟର ପିଛା ୨୫.୪୩ ଟଙ୍କାରେ ପହଞ୍ଚିଛି। ଗତ ୧୦ ମାସରେ ବ୍ରେଣ୍ଟ ଲିଟର ପିଛା ୪୭.୧୪ ଟଙ୍କା ଶସ୍ତା ହୋଇଛି। ତେଣୁ ପେଟ୍ରୋଲ-ଡିଜେଲ ଦାମ ଘରୋଇ ବଜାରରେ ହାରାହାରି ୪୭ ଟଙ୍କାରୁ ଅଧିକ ଶସ୍ତା ହେବା ଜରୁରୀ ବୋଲି ଅର୍ଥଶାସ୍ତ୍ରୀମାନେ ମତପୋଷଣ କରିଛନ୍ତି।
