ବଲାଙ୍ଗୀର,୧୬ା୮(ସୁନିଲ କୁମାର ମହାନ୍ତି): ବଲାଙ୍ଗୀରର ଜଣାଶୁଣା ବ୍ୟବସାୟୀ ନରେନ୍ଦ୍ର ସାହୁ ଓରଫ ଗୁଣ୍ଡା ଅପହରଣ ମାମଲାରେ ବୌଦ୍ଧ ଜିଲା କଣ୍ଟାମାଳ ଅଞ୍ଚଳର କ୍ଷୀତିଶ ସାହୁଙ୍କୁ ଭୁବନେଶ୍ବରରୁ ଗିରଫ କରାଯାଇଛି। ନରେନ୍ଦ୍ରଙ୍କୁ ଅପହରଣ କଲା ପରେ ଅଭିଯୁକ୍ତ ୫୦ ଲକ୍ଷ ଟଙ୍କା ଦାବି କରୁଥିଲେ। ଶନିବାର ସନ୍ଧ୍ୟାରେ ବଲାଙ୍ଗୀର ଓ ଭୁବନେଶ୍ବରର ସ୍ବତନ୍ତ୍ର ପୋଲିସ ସ୍କ୍ବାଡ୍ ଭୁବନେଶ୍ୱର ଖଣ୍ଡଗିରି ଥାନା ଅନ୍ତର୍ଗତ ଏକ ହୋଟେଲରୁ ଅପହୃତ ବ୍ୟବସାୟୀ ସାହୁଙ୍କୁ ସୁରକ୍ଷିତ ଉଦ୍ଧାର କରିଥିଲେ। ଶୁକ୍ରବାର ବ୍ୟବସାୟୀ ନରେନ୍ଦ୍ରଙ୍କୁ ମୁଖ୍ୟ ଅଭିଯୁକ୍ତଙ୍କ ସମେତ ୬ ଜଣ ଅପହରଣ କରି ଭୁବନେଶ୍ବର ନେଇଯାଇଥିଲେ। ସେଠାରେ ତାଙ୍କୁ ବନ୍ଦୀ କରି ରଖି ୫୦ ଲକ୍ଷ ଟଙ୍କା ଦେବାକୁ ଦାବି କରୁଥିଲେ ବୋଲି ଏସ୍ପି ଅଭିଳାଷ ଖବରଦାତା ସମ୍ମିଳନୀରେ ସୂଚନା ଦେଇଛନ୍ତି। ଅନ୍ୟପଟେ ଅଭିଯୁକ୍ତ କ୍ଷୀତିଶ ହନୁମାନ ଟଙ୍କା ଦେବାକୁ କହି ତାଙ୍କଠାରୁ ନରେନ୍ଦ୍ର ସାହୁ ୨ କୋଟି ୭୦ ଲକ୍ଷ ଟଙ୍କା ନେଇଛନ୍ତି ଓ ଫେରାଇ ନ ଥିବାରୁ ତାଙ୍କୁ ଏଠାରୁ ଉଠାଇ ନେଇଥିବା କହିଛନ୍ତି। ଅଭିଯୁକ୍ତ ଓ ଅପହୃତଙ୍କ ବୟାନକୁ ତନାଘନା କରାଯାଉଛି। ଅଭିଯୁକ୍ତଙ୍କୁ ଗିରଫ କରାଯାଇ କୋର୍ଟ ଚାଲାଣ କରାଯିବ। ଅଧିକ ତଦନ୍ତ ପାଇଁ ତାଙ୍କୁ ପରେ ରିମାଣ୍ଡରେ ଅଣାଯିବ ବୋଲି ଏସ୍ପି ଅଭିଳାଷ କହିଛନ୍ତି। ଅପହୃତ ବ୍ୟବସାୟୀ ନରେନ୍ଦ୍ରଙ୍କ ସ୍ବାସ୍ଥ୍ୟ ପରୀକ୍ଷା କରାଯିବା ପରେ ତାଙ୍କୁ ଛଡ଼ାଯିବ ବୋଲି ଏସ୍ପି କହିଛନ୍ତି।