ବରଗଡ଼,୧୭।୨(ପ୍ରେମାନନ୍ଦ ଖମାରୀ)-ବରଗଡ଼ ସହରର ବ୍ୟବସାୟୀଙ୍କ ସଞ୍ଜୟ ଅଗ୍ରୱାଲଙ୍କ ବାସଭବନରେ ସିଜିଏସ୍ଟି ଏବଂ ଏସ୍ଜିଏସ୍ଟିର ଏକ ଟିମ୍ ଅତର୍କିତ ଚଢ଼ାଉ କରି ଦୁର୍ବ୍ୟବହାର ପ୍ରଦର୍ଶନ କରିଥିବା ଅଭିଯୋଗ ହୋଇଛି। ଏ ନେଇ ସୋମବାର କନଫେଡେରେଶନ ଅଫ୍ ଅଲ୍ ଇଣ୍ଟିଆ ଟ୍ରେଡର୍ସ(ସିଏଆଇଟି) ପକ୍ଷରୁ କେନ୍ଦ୍ର ଅର୍ଥମନ୍ତ୍ରୀ ନିର୍ମଳା ସୀତାରମଣଙ୍କ ଉଦ୍ଦେଶ୍ୟରେ ବରଗଡ଼ ଜିଲାପାଳ, ଏସ୍ପି ଏବଂ ଜିଏସ୍ଟି ଅଧିକାରୀଙ୍କୁ ସ୍ମାରକପତ୍ର ପ୍ରଦାନ କରାଯାଇଛି। ବ୍ୟବସାୟୀଙ୍କ ଦୁର୍ବ୍ୟବହାର ପ୍ରଦର୍ଶନ କରିଥିବା ଅଧିକାରୀଙ୍କ ବିରୋଧରେ କାର୍ଯ୍ୟାନୁଷ୍ଠାନ ନେବାକୁ ସ୍ମାରକପତ୍ରରେ ନିବେଦନ କରାଯାଇଛି।
ସ୍ମାରକପତ୍ରରେ ଉଲ୍ଲେଖ ରହିଛି, ଗତ ଫେବୃୟାରୀ ମାସ ୧୪ତାରିଖ ପୁଲୱାମା ଆକ୍ରମକୁ ନେଇ ଦେଶରେ କଳା ଦିବସ ପାଳନ କରାଯାଉଥିବା ବେଳେ ବରଗଡ଼ ସହରର ବ୍ୟବସାୟୀ ସଞ୍ଜୟଙ୍କ ଘରକୁ ସିଜିଏସ୍ଟି ଏବଂ ଏସ୍ଜିଏସ୍ଟିର ଏକ ଟିମ୍ ପହଞ୍ଚିଥିଲେ। ସଞ୍ଜୟ ଏବଂ ତାଙ୍କ ବୃଦ୍ଧା ମା’ ଶଯ୍ୟାଶାୟୀ ଥିବାବେଳେ ସେମାନେ ଉଭୟ ମା’, ପୁଅଙ୍କୁ ଦୁର୍ବ୍ୟବହାର ପ୍ରଦର୍ଶନ କରିଥିବା ଅଭିଯୋଗ ହୋଇଛି। ଏପରିକି ସେମାନେ ବର୍ତ୍ତମାନ ଆଇସିୟୁରେ ଚିକିତ୍ସାଧୀନ ରହିଥିବା ସୂଚନା ଦିଆଯାଇଛି। ଏହା ପୂର୍ବରୁ ମଧ୍ୟ ଏଭଳି ଚଢ଼ାଉ ବେଳେ ୨୦୨୪ ଅକ୍ଟୋବର ୨୮ତାରିଖ ଜଣେ ଗହଣା ବ୍ୟବସାୟୀଙ୍କୁ ଆକ୍ରମଣ ହୋଇଥିବା ଅଭିଯୋଗ ହୋଇଛି।
ଟିକସ ସଂଗ୍ରହ ଏବଂ ଦେଶର ଅର୍ଥନୈତିକ ବିକାଶରେ ବ୍ୟବସାୟୀଙ୍କ ପ୍ରମୁଖ ଭୂମିକା ରହିଥିବାବେଳେ ଅଧିକାରୀମାନଙ୍କ ଦ୍ୱାରା ସେମାନଙ୍କୁ ଦୁର୍ବ୍ୟବହାର ଏବଂ ଭୟ ପ୍ରଦର୍ଶନ ଆଦୌ ଗ୍ରହଣୀୟ ନୁହେଁ। ଏହି ଦୃଷ୍ଟିରୁ ଭବିଷ୍ୟତରେ ଯେଭଳି ସେଭଳି ଘଟଣାର ପୁନରାବୃତ୍ତି ନ ଘଟେ ଏବଂ ଦୁର୍ବ୍ୟହାର ପ୍ରଦର୍ଶନ କରିଥିବା ଅଧିକାରୀଙ୍କ ବିରୋଧରେ କାର୍ଯ୍ୟାନୁଷ୍ଠାନ ନେବାକୁ ସିଏଆଇଟି ସ୍ମାରକପତ୍ରରେ ଦାବି କରିଛି। ସିଏଆଇଟିର ଜାତୀୟ ଉପସଭାପତି ଆର.କେ ଶୁକ୍ଲାଙ୍କ ନେତୃତ୍ୱରେ ଅନେକ ବ୍ୟବସାୟୀ ସ୍ମାରକପତ୍ର ପ୍ରଦାନ ପାଇଁ ଜିଲାପାଳ, ଏସ୍ପି ଏବଂ ଜିଏସ୍ଟି ଅଧିକାରୀଙ୍କ କାର୍ଯ୍ୟାଳୟକୁ ଯାଇଥିଲେ।
