ନନ୍ଦପୁର, ୧୬।୫ (ତୁଷାର କାନ୍ତ ମହାନ୍ତି): ନନ୍ଦପୁର ବ୍ଲକ ସଦର ମହକୁମାର ମୁଖ୍ୟ ରାସ୍ତା ଓ ରାଜଦାଣ୍ଡ ଉପରେ ବିଭିନ୍ନ ଦୋକାନୀମାନେ ସାମଗ୍ରୀ ରଖି ରାସ୍ତାକୁ ଅବୈଧ ଭାବେ ଦଖଲ କରିବା ସହ ଟ୍ରାଫିକ ସମସ୍ୟା ସୃଷ୍ଟି କରୁଥିବାରୁ ନନ୍ଦପୁର ପୋଲିସ ଶନିବାର ଚଢ଼ାଉ କରିଛି।
ଥାନାଧିକାରୀ ତ୍ରିନାଥ ତୋଟାପାଡିଆଙ୍କ ନେତୃତ୍ୱରେ ପୋଲିସ ଦଳ ରାସ୍ତା ଉପରେ ବିକ୍ରି ପାଇଁ ରଖାଯାଇଥିବା ଦୁଇଟି ଦୋକାନର ସାମଗ୍ରୀ ଜବତ କରି ଥାନାକୁ ଆଣିଛନ୍ତି।
ସାଧାରଣ ଲୋକଙ୍କ ଅଭିଯୋଗ ଓ ବୃଦ୍ଧି ପାଉଥିବା ଟ୍ରାଫିକ ସମସ୍ୟାକୁ ଦୃଷ୍ଟିରେ ରଖି ପୂର୍ବରୁ ବହୁବାର ବ୍ଲକ ସଦର ଅଞ୍ଚଳର ଦୋକାନୀମାନଙ୍କୁ ରାସ୍ତା ଉପରେ ସାମଗ୍ରୀ ନ ରଖିବାକୁ ସଚେତନ କରାଯାଇଥିଲା। କିନ୍ତୁ ପୋଲିସର ସତର୍କବାଣୀକୁ ଅଣଦେଖା କରାଯାଇଥିବାରୁ ଏହି କାର୍ଯ୍ୟନୁଷ୍ଠାନ ଗ୍ରହଣ କରାଯାଇଛି। ଏହି ଘଟଣାରେ ଦୁଇ ଦୋକାନୀଙ୍କ ବିରୋଧରେ ମାମଲା ରୁଜୁ କରାଯାଇଛି। ରାସ୍ତା ଦଖଲ କରି ବ୍ୟବସାୟ କରୁଥିବା ଅନ୍ୟ ବ୍ୟବସାୟୀମାନଙ୍କ ପାଇଁ ଏହା ଦୃଷ୍ଟାନ୍ତ ସୃଷ୍ଟି କରିବ ବୋଲି ଥାନାଧିକାରୀ ତ୍ରିନାଥ ତୋଟାପାଡିଆ ଗଣମାଧ୍ୟମକୁ ସୂଚନା ଦେଇଛନ୍ତି।