ନୂଆଦିଲ୍ଲୀ,୮।୩: ବିଖ୍ୟାତ ଶିଳ୍ପପତି ତଥା କିଙ୍ଗ ଅଫ୍ ମିଡିଆ ରୁପର୍ଟ ମୁର୍ଡୋକ ପୁଣି ବିବାହ କରିବାକୁ ଯାଉଛନ୍ତି। ୯୨ ବର୍ଷ ବୟସରେ ସେ ଏଲିନା ଜୁକୋଭାଙ୍କୁ ୫ମ ବିବାହ ପରିବେ। ନିର୍ବନ୍ଧ ଦୃଷ୍ଟିରୁ ଦେଖାଗଲେ ଏଲିନାଙ୍କ ସହ ସେ ୬ଷ୍ଠ ନିର୍ବନ୍ଧ କରିଛନ୍ତି। ଏନେଇ ତାଙ୍କ କାର୍ଯ୍ୟାଳୟ ପକ୍ଷରୁ ସୂଚନା ଦିଆଯାଇଛି।
ନ୍ୟୁଜ୍ କର୍ପ ଚେୟାରମ୍ୟାନ୍ ଏମିରେଟ୍ସ ରୁପର୍ଟ ମୁର୍ଡୋକଙ୍କ କାର୍ଯ୍ୟାଳୟ ପକ୍ଷରୁ ଦିଆଯାଇଥିବା ସୂଚନାନୁଯାୟୀ ଏଲିନାଙ୍କୁ ସେ ବିବାହ କରିବାକୁ ଯାଉଛନ୍ତି। ଗୁରୁବାର ଦୁହିଁଙ୍କ ନିର୍ବନ୍ଧ ଶେଷ ହୋଇଛି। ଏବେ ଏଲିନାଙ୍କୁ ୬୭ ବର୍ଷ। ସେ ଜଣେ ଅବସରପ୍ରାପ୍ତ ମଲିକୁଲାର ବାୟୋଲୋଜିଷ୍ଟ।
୩ୟ ସ୍ତ୍ରୀ ଓ୍ବେଣ୍ଡି ଡେଙ୍ଗଙ୍କ ଯୋଗୁ ରୁପର୍ଟଙ୍କର ଏଲିନାଙ୍କ ସହ ସାକ୍ଷାତ ହୋଇଥିଲା। ଗତ ବର୍ଷ ଗ୍ରୀଷ୍ମଋତୁରେ ଉଭୟ ପରସ୍ପର ସହ ସମୟ ବିତାଇଥିଲେ। ଏହାପରଠାରୁ ଡେଟିଂ ଚାଲିଥିବା ବେଳେ ସେ ଦୁହେଁ କାଲିଫର୍ଣ୍ଣିଆରେ ବିବାହ କରିବେ। ଚଳିତ ବର୍ଷ ଜୁନ୍ରେ ଏହି ବିବାହ ହେବ। ଏଥିଲାଗି ନିମନ୍ତ୍ରଣପତ୍ର ପଠାଯାଇସାରିଛି।
ଦୁଇ ବର୍ଷ ପୂର୍ବେ ରୁପର୍ଟ ତାଙ୍କର ଚତୁର୍ଥ ପତ୍ନୀ ଜେରି ହଲ୍ଙ୍କଠାରୁ ଛାଡ଼ପତ୍ର ନେଇଥିଲେ। ଏହି ବିବାହ ୬ ବର୍ଷ ଯାଏ ଚାଲିଥିଲା। ଏହାର କିଛି ଦିନ ପରେ ସେ ମାର୍ଚ୍ଚ ୨୦୨୩ରେ ଆନ୍ ଲେସଲି ସ୍ମିଥଙ୍କ ସହ ନିବନ୍ଧ କରିଥିଲେ। ହେଲେ ଦୁଇ ସପ୍ତାହ ପରେ ତାଙ୍କର ବ୍ରେକ୍ଅପ୍ ହୋଇଥିଲା।
