ନୂଆଦିଲ୍ଲୀ,୨୯।୧୦: ଭାରତୀୟ ପରମ୍ପରା ଓ ସଂସ୍କୃତିରେ ପର୍ବପର୍ବାଣିର ମହତ୍ତ୍ୱ ଅନେକ ରହିଛି। ଏପର ିକି ସବୁ ବର୍ଗର ଲୋକ ପର୍ବରେ ସାମିଲ ହୋଇ ଉତ୍ସାହିତ ହେବାକୁ ପସନ୍ଦ କରୁଥିବାବେଳେ ପର୍ବରେ ମଧ୍ୟ କିଣାକିଣି ଓ ସ୍ବତନ୍ତ୍ର ବସ୍ତୁର କ୍ରୟ ମଧ୍ୟ କରିଥାନ୍ତି। ଚଳିତ ଧନତେରସରେ ମଧ୍ୟ କାରବାର ବେଶ୍ ଉତ୍ସାହଜନକ ରହିବ ବୋଲି ଆଶା କରାଯାଉଛି। ସେହିଭଳି ଚଳିତ ଧନତେରସ ଉପଲକ୍ଷେ ଦେଶର ଅଳଙ୍କାର ବ୍ୟବସାୟୀମାନେ ଭଲ ବ୍ୟବସାୟ ଆଶାରେ ନୂତନ କଲେକ୍ସନ ସାଙ୍ଗକୁ ଅଫର ଓ ରିହାତିର ବ୍ୟାପକ ବ୍ୟବସ୍ଥା କରିଥିବାବେଳେ ଗତବର୍ଷ ଅପେକ୍ଷା ସୁନା କାରବାର ପ୍ରାୟ ୧୨ରୁ ୧୫% ବୃଦ୍ଧି ପାଇ ୧୦୦୦ କୋଟି ଛୁଇଁବ ବୋଲି ଇଣ୍ଡିଆନ ବୁଲିଅନ ଆଣ୍ଡ ଜୁଏଲର୍ସ ଆସୋସିଏଶନ ପକ୍ଷରୁ ଆକଳନ କରାଯାଇଛି। ଏପରି କି ଧନତେରସ ପାଇଁ ଅଳଙ୍କାର ପ୍ରତିଷ୍ଠାନଗୁଡ଼ିକ ପକ୍ଷରୁ ଆକର୍ଷଣୀୟ ଅଫର ଓ ରିହାତି ଦିଆଯାଉଥିବାବେଳେ ଆଗାମୀ ବିବାହ ଋତୁକୁ ମିଶାଇ ଗ୍ରାହକ କିଣାକିଣି କରିବା ସହିତ ଦରବୃଦ୍ଧି ଆଶଙ୍କାରୁ ମଧ୍ୟ ରକ୍ଷା ପାଇବାକୁ ଏକ ସଙ୍ଗରେ କାରବାର କରିବେ ବୋଲି ଆସୋସିଏଶନ ପକ୍ଷରୁ ଆଶଙ୍କା କରାଯାଉଛି। ସେହିପରି କ୍ରମାଗତ ଭାବେ ଦରବୃଦ୍ଧିକୁ ନେଇ ଉଭୟ ଗ୍ରାହକ ଓ ବ୍ୟବସାୟୀଙ୍କ ମଧ୍ୟରେ ଆଶଙ୍କା ଦେଖାଦେଇଥିଲା ବେଳେ କାରବାରରେ ଉତ୍ସାହ ଭରିବା ପାଇଁ ବ୍ୟବସାୟ ପ୍ରତିଷ୍ଠାନଗୁଡ଼ିକ ବ୍ୟାପକ ବ୍ୟବସ୍ଥା ଓ ସୁବିଧା ଗ୍ରାହକଙ୍କୁ ଯୋଗାଇଦେବାକୁ ପ୍ରସ୍ତୁତ ହେଉଛନ୍ତି। ଅପରପକ୍ଷରେ ଚଳିତବର୍ଷ ୨ ଦିନ ଧରି ଧନତେରସ ପାଳନ ହେବାକୁ ଥିଲାବେଳେ କାରବାର ବେଶ୍ ଭଲ ରହିବ ବୋଲି ଉଭୟ ଆସୋସିଏଶନ ଓ ବ୍ୟବସାୟ ପ୍ରତିଷ୍ଠାନଗୁଡ଼ିକ ଆଶା ପ୍ରକଟ କରିଛନ୍ତି। ଉଲ୍ଲେଖଯୋଗ୍ୟ, ସୋମବାର ନୂଆଦିଲ୍ଲୀରେ ୨୪ କ୍ୟାରେଟ ସୁନା ଦର ପ୍ରତି ୧୦ ଗ୍ରାମ୍ ପିଛା ପ୍ରାୟ ୮୦, ୫୦୦ ଟଙ୍କା ଥିଲାବେଳେ ୨୨କ୍ୟାରେଟ ସୁନା ଦର ପ୍ରତି ୧୦ ଗ୍ରାମ ପିଛା ପ୍ରାୟ ୭୪,୦୦୦ଟଙ୍କାରେ କାରବାର ହେଉଛି। ସେହିଭଳି ରୁପା ପ୍ରତି କେଜି ପିଛା ୧,୧୦,୦୦୦ ଟଙ୍କାରେ କାରବାର ହେଉଥିଲାବେଳେ ହୀରା ଓ ଅନ୍ୟାନ୍ୟ ମୂଲ୍ୟବାନ ଧାତୁର ଦର ଉଚ୍ଚ ରହିଛି। ସେହିପରି ଭୁବନେଶ୍ୱରରେ ମଧ୍ୟ ୨୪ କ୍ୟାରେଟ ସୁନା ଦର ପ୍ରତି ୧୦ ଗ୍ରାମ ପିଛା ୮୦, ୫୦୦ ଟଙ୍କା ଥିଲାବେଳେ ୨୨ କ୍ୟାରେଟ ସୁନା ଦର ପ୍ରତି ୧୦ ଗ୍ରାମ ପିଛା ପ୍ରାୟ ୭୩,୦୦୦ଟଙ୍କାରେ କାରବାର ହେଉଛି। ଏପରି କି ରୁପା ଦର ପ୍ରତି କେଜି ପିଛା ୧,୧୦,୦୦୦ ଟଙ୍କାରେ କାରବାର ହେଉଥିଲାବେଳେ ହୀର ଓ ଅନ୍ୟାନ୍ୟ ମୂଲ୍ୟବାନ ଧାତୁର ଦର ୪୦,୦୦୦ରୁ ଅଧିକ ରହିଛି। ଅପରପକ୍ଷରେ ଦରବୃଦ୍ଧି କାରବାରରେ ବାଧକ ସାଜିପାରେ ବୋଲି ବଜାର ବିଶେଷଜ୍ଞ ଆଶଙ୍କା କରୁଥିବାବେଳେ ବ୍ୟବସାୟୀମାନେ କାରବାର ପୂର୍ବାପେକ୍ଷା ଭଲ ହେବ ଏବଂ ସେଥିପାଇଁ ବ୍ୟାପକ ବନ୍ଦୋବସ୍ତ କରାଯାଇଛି ବୋଲି ଅଳଙ୍କାର ପ୍ରତିଷ୍ଠାନଗୁଡ଼ିକ ପକ୍ଷରୁ କୁହାଯାଇଛି।
