ଖୋର୍ଦ୍ଧା ଅଫିସ,୧୨।୭: ଖୋର୍ଦ୍ଧା ୧୬ ନମ୍ବର ଜାତୀୟ ରାଜପଥରେ ଏକ ମର୍ମନ୍ତୁଦ ସଡ଼କ ଦୃର୍ଘଟଣା ଘଟିଛି। ଟ୍ରକକୁ ପଛପଟୁ ଧକ୍କା ଦେଇ ଏକ ଯାତ୍ରୀବାହୀ ବସ୍ ଦୁର୍ଘଟଣାଗ୍ରସ୍ତ ହୋଇଛି। ବରୁଣେଇ ଓଭର ବ୍ରିଜ ନିକଟରେ ମଙ୍ଗଳବାର ସକାଳ ପ୍ରାୟ ୮ଟାରେ ଏହି ଘଟଣା ଘଟିଛି। ଘଟଣାସ୍ଥଳରେ ବସ୍ ହେଲପରଙ୍କ ମୁତ୍ୟୁ ଘଟିଥିବା ବେଳେ ୧୫ଜଣ ଆହତ ହୋଇଛନ୍ତି।
ମୃତକ ହେଲେ ଭଗବାନ ନାୟକ। ଆହତମାନେ ହେଲେ ରଞ୍ଜିତା ରାୟ, ମୋନାଲିସା ପ୍ରଧାନ, ତିଳ ଜେନା, ସତ୍ୟଭାମା ବିଶୋଇ, ସୁନିଲ ପ୍ରଧାନ, ରୋହିତ ନାୟକ, ମହନ୍ତି ବେହେରା, ସାଗରିକା ମହାରଣା, ଭାନୁମତି ପାଇକରାୟ, କାହ୍ନୁ, ବୈକୁଣ୍ଠନାଥ ବିହାରୀ ରହିଥିବା ବେଳେ ଅନ୍ୟମାନଙ୍କ ପରିଚୟ ମିଳିପାରିନାହିଁ। ଖବର ପାଇ ଶିଳ୍ପାଞ୍ଚଳ ଫାଣ୍ଡି ଓ ହାଇୱେ ପାଟ୍ରୋଲିଂ ପୋଲିସ ପହଞ୍ଚି ଆହତମାନଙ୍କୁ ଉଦ୍ଧାର କରି ଖୋର୍ଦ୍ଧା ମେଡିକାଲରେ ଭର୍ତ୍ତି କରିଛି। ତେବେ ବସ୍ ଡ୍ରାଇଭର ଘଟଣାସ୍ଥଳରୁ ଫେରାର ହୋଇଯାଇଥିବା ଜଣାପଡ଼ିଛି।
ମିଳିଥିବା ସୂଚନା ମୁତାବକ, ଭୁବନେଶ୍ବରରୁ ଭଞ୍ଜନଗର ଅଭିମୁଖେ ଓମ୍ ଶାନ୍ତି ଟ୍ରାଭେଲ୍ସ ନାମକ ଏକ ଘରୋଇ ବସ୍ ସକାଳ ପ୍ରାୟ ସାଢେ ୬ଟା ସମୟରେ ବରମୁଣ୍ଡା ବସଷ୍ଟାଣ୍ଡରୁ ବାହାରିଥିଲା। ବସ୍ଟି ଦ୍ରୁତଗତିରେ ଯାଉଥିବା ବେଳେ ବରୁଣେଇ ଓଭରବ୍ରିଜ ନିକଟରେ ଡ୍ରାଇଭର ନିୟନ୍ତ୍ରଣ ହରାଇ ଆଗରେ ଯାଉଥିବା ଏକ ଟ୍ରକକୁ ପଛପଟୁ ଧକ୍କା ଦେଇ ରାସ୍ତା ପାର୍ଶ୍ୱରେ ଥିବା ବାଲି ଗଦା ଉପରକୁ ମାଡ଼ିଯାଇଥିଲା। ବସ୍ର ସମ୍ମୁଖ ଭାଗ ଭାଙ୍ଗି ଚୁର୍ମାର୍ ହୋଇଯାଇଛି। ବସ୍ ହେଲପର ବନେଟ ଉପରେ ବସିଥିବା ବେଳେ ଛିଟିକି ତଳେ ପଡି ଯାଇଥିଲେ। ଫଳରେ ବସ୍ ତାଙ୍କ ଉପରେ ଚଢି ଯାଇଥିଲା। ଘଟଣାସ୍ଥଳରେ ତାଙ୍କର ମୃତ୍ୟୁ ଘଟିଛି। ବସ୍ରେ ପ୍ରାୟ ୫୦ରୁ ଊର୍ଦ୍ଧ୍ୱ ଯାତ୍ରୀ ଥିବା ଜଣାପଡିଛି। ଡ୍ରାଇଭରଙ୍କ ବେପାରୁଆ ଗାଡି ଚଳାଇବା ଓ ଦ୍ରୁତ ଗତି ଯୋଗୁ ଏହି ଦୃର୍ଘଟଣା ଘଟିଥିବା କିଛି ଯାତ୍ରୀ ପ୍ରକାଶ କରିଛନ୍ତି।
