ରାଇରଙ୍ଗପୁର,୧୦ା୧୨(ଡି.ଏନ୍.ଏ.): ମୟୂରଭଞ୍ଜ ଜିଲା ରାଇରଙ୍ଗପୁର ଗ୍ରାମାଞ୍ଚଳ ଥାନା ଅଧୀନ ହାତୀବାରି ଜଙ୍ଗଲ ପାର୍ଶ୍ୱ ରାଜ୍ୟ ରାଜପଥରେ ଗୁରୁବାର ଏକ ଯାତ୍ରୀବାହି ବସ୍ ଓଲଟି ୨୦ରୁ ଊର୍ଦ୍ଧ୍ୱ ଆହତ ହୋଇଛନ୍ତି। ଆହତଙ୍କ ମଧ୍ୟରୁ ୬ ଜଣଙ୍କ ଅବସ୍ଥା ଗୁରୁତର ଥିବାରୁ ଚିକିତ୍ସା ପାଇଁ ସେମାନଙ୍କୁ ବାରିପଦାସ୍ଥିତ ପିଆର୍ଏମ୍ ମେଡିକାଲରେ ଭର୍ତ୍ତି କରାଯାଇଛି। ଅପରାହ୍ନ ୧ଟା ବେଳେ ରାଇରଙ୍ଗପୁର ସହରାଞ୍ଚଳରୁ ଉଦଳା ଅଞ୍ଚଳକୁ ଯାଉଥିବା ‘ଆପୁ’ ବସ୍୍ ଭାରସାମ୍ୟ ହରାଇ ରାସ୍ତା ପାର୍ଶ୍ୱ ବିଲ ମଧ୍ୟକୁ ଓଲଟି ପଡ଼ିଥିଲା। ଖବରପାଇ ଗ୍ରାମାଞ୍ଚଳ ଥାନା ଅଧିକାରୀ ପଦ୍ମଲୋଚନ ପାଣିଗ୍ରାହୀଙ୍କ ସମେତ ଦମକଳ ବାହିନୀ କର୍ମଚାରୀ ପହଞ୍ଚି ଆହତ ଯାତ୍ରୀମାନଙ୍କୁ ଉଦ୍ଧାର କରିଥିଲେ। ଗୁରୁତର ଆହତମାନେ ହେଲେ ଖୁଣ୍ଟା ଥାନା ଅଞ୍ଚଳର ଦିପ୍ତିମୟୀ ବୈଠା, ରାଇରଙ୍ଗପୁର ଗ୍ରାମାଞ୍ଚଳ ଥାନା ଅଧୀନ ବିଜାତଳା ଗ୍ରାମର ଚନ୍ଦନ ମହାରଣା, ବାଗଡ଼େଗା ଗ୍ରାମର ସୁକୁଲାଲ ସୋରେନ, ବିଶୋଇ ଥାନା ଅନ୍ତର୍ଗତ କଟାସ ଗ୍ରାମର ତ୍ରିଲୋଚନ ମହାକୁଡ଼, ବାଙ୍ଗିରିପୋଷି ଥାନା ଉପରବାଙ୍କଶୋଳ ଗ୍ରାମର ବିରେଇ ସିଂ, ବାଦାମପାହାଡ଼ ଥାନା ଅନ୍ତର୍ଗତ ବଣକାଟି ଗ୍ରାମର ମଦନାବତୀ ମହାନ୍ତ। ଏନେଇ ପୋଲିସ ଏକ ମାମଲା ରୁଜୁ କରି ତଦନ୍ତ ଚଳାଇଛି। ରାଇରଙ୍ଗପୁର ଅତିରିକ୍ତ ଆଞ୍ଚଳିକ ପରିବହନ ଅଧିକାରୀ ମନୋଜ କୁମାର ଟପ୍ପୋ ଏବଂ ଜୁନିୟର ଏମ୍ଭିଆଇ କାନ୍ଦା ନାଏକ ପ୍ରମୁଖ ଘଟଣାସ୍ଥଳରେ ପହଞ୍ଚି ଦୁର୍ଘଟଣାଗ୍ରସ୍ତ ବସ୍ର କାଗଜପତ୍ର ଯାଞ୍ଚ କରିଛନ୍ତି।
