କାଳିଆପାଣି,୨୧ା୪(ଡି.ଏନ.ଏ.): ଯାଜପୁର ଜିଲାର ଜଙ୍ଗଲ ଉପତ୍ୟକାରେ ଚାରିଆଡ଼େ ନିଆଁଲାଗିଛି। ଫଳରେ ଜଙ୍ଗଲର ବହୁ ମୂଲ୍ୟବାନ ଗଛ ସହିତ ଔଷଧୀୟ ଗୁଳ୍ମ, ସରୀସୃପ ଓ କୀଟ, ପତଙ୍ଗ ପୋଡ଼ି ପାଉଁଶ ହୋଇଯାଉଛନ୍ତି। ମାତ୍ର ଏହା ଜନ୍ତୁ ଶିକାରୀଙ୍କ ପାଇଁ ଭୂସ୍ବର୍ଗ ପାଲଟିଛି। ସେହିପରି କାଠ ବେପାରୀ ଦିନ ଦ୍ବିପ୍ରହରରେ ଜଙ୍ଗଲ ଲୁଟ୍ କରୁଥିବାବେଳେ ବନ ବିଭାଗର ନିଷ୍କ୍ରିୟତା ସେମାନଙ୍କୁ ବରଦାନ ସଦୃଶ ହୋଇଛି। ବନ ବିଭାଗ ଏହାକୁ ରୋକିବା ତ ଦୂରର କଥା ସମର୍ଥନ ଦେଉ ନ ଥିଲେ ବି ଅସମର୍ଥ ହୋଇ ହାତ ଟେକି ଦେଇଥିବା ଅଞ୍ଚଳରେ ଆଲୋଚନା ହେଉଛି। ଏହାର କାରଣ ପାଲଟିଛି ମୋଟା ଅଙ୍କର ଅର୍ଥ ଉପାର୍ଜନ କରିବାର ଠିକାଦାରି ବ୍ୟବସ୍ଥା। କେତେଜଣ ବନ କର୍ମଚାରୀ କିଛି ବର୍ଷ ହେଲା ଠିକାଦାରିରେ ବୁଡ଼ି ରହିଛନ୍ତି। ଜିଲାର ଯଖପୁରା, କାଳିଆପାଣି, ନିମପଲ୍ଲୀ, ଡୁବୁରୀ ଓ ଟମକା ଆଦି ସ୍ଥାନରେ ଆନୁମାନିକ ୧୦୦ କୋଟି ଟଙ୍କା ଅର୍ଥ ବିନିମୟରେ ପାର୍କ ନିର୍ମାଣ କାର୍ଯ୍ୟ ଚାଲିଛି। ଏହା କଟକ ବନ ଖଣ୍ଡ(ଡିଏଫଓ)ଙ୍କ ନିର୍ଦ୍ଦେଶରେ ଓ ବନାଞ୍ଚଳ ଅଧିକାରୀଙ୍କ ତତ୍ତ୍ୱବଧାନରେ ଚାଲୁ ରହିଛି। ତା’ ସହ ଟେଣ୍ଡର ପ୍ରକ୍ରିୟାରେ ମଧ୍ୟ ଅନେକ କାର୍ଯ୍ୟ ଚାଲୁ ରହିଛି। ଏହି କାର୍ଯ୍ୟ ପ୍ରକ୍ରିୟାକୁ ସମ୍ପାଦନ ପାଇଁ ସ୍ବତନ୍ତ୍ର ଭାବେ ନିର୍ମାଣ ବିଭାଗ ରହିଥିବାବେଳେ ବିନା ଅଭିଜ୍ଞତାରେ ନିଜେ ବନ ବିଭାଗ କାମକୁ ଆବୋରି ନିଜମୂଳ କାର୍ଯ୍ୟରୁ ଦୂରେଇ ଠିକାଦାରିରେ ମାତିଥିବାରୁ ବନାଞ୍ଚଳ ଛାରଖାର ହେବାରେ ଲାଗିଛି। ଏଥିପାଇଁ ପରିବେଶବିତ୍ଙ୍କ ମହଲରେ ଅସନ୍ତୋଷ ପ୍ରକାଶ ପାଇଛି।
ଜିଲାର ବିଭିନ୍ନ ଅଞ୍ଚଳ ପାଇଁ ବହୁ ପ୍ରକଳ୍ପ ଆସୁଛି। ଏସବୁ ନିର୍ମାଣ କରିବାକୁ ସରକାରୀ ଜମି ମିଳୁ ନ ଥିବାରୁ ଜଙ୍ଗଲ ଜମିରେ ପ୍ରକଳ୍ପଗୁଡ଼ିକ କରାଯାଉଛି। ତେଣୁ ବନ ବିଭାଗ କର୍ମଚାରୀ ଭଲ ଦି ପଇସା କମେଇବାର ଏହା ଏକ ରାସ୍ତା ପାଲଟିଛି। ବନ୍ୟଜନ୍ତୁମାନେ ବିଚରଣ କରୁଥିବା ବନାଞ୍ଚଳରେ ଶିକାରୀମାନେ ନିଆଁ ଲଗାଇ ସେମାନଙ୍କୁ ଶିକାର କରୁଥିବାବେଳେ କାଠ ଚୋରି ଆଶାତୀତ ଭାବେ ବୃଦ୍ଧି ପାଉଛି। ସାନରୁ ବଡ଼ କୌଣସି ବନ କର୍ମଚାରୀଙ୍କ ଜଙ୍ଗଲରେ ଦେଖା ମିଳୁ ନ ଥିବା ଅଞ୍ଚଳବାସୀ ଅଭିଯୋଗ କରିଛନ୍ତି। ବନ କର୍ମଚାରୀ ସଂଖ୍ୟା କମ୍ ଥିବା ଅଧିକାରୀମାନେ ସଫେଇ ଦେଇ ନିଜ ମୂଳଲକ୍ଷ୍ୟରୁ ବିଚ୍ୟୁତ ହେଉଛନ୍ତି। ଏବେ ପୁଣି ପ୍ରତି ପଞ୍ଚାୟତରେ ପାର୍କ ନିର୍ମାଣ ନେଇ ଅନୁଦାନ ମଞ୍ଜୁରୀ ଲାଭ କରିବା ସହ ଶିଳାନ୍ୟାସ ପର୍ବ ଅନୁଷ୍ଠିତ ହୋଇଚାଲିଛି। ଏପରି ବହୁ ଉଦାହରଣ ରହିଛି ରାଁସୋଳ ଫରେଷ୍ଟ ରେଞ୍ଜ ଅଧୀନରେ। ଏଠାରେ ଏକ ଜଙ୍ଗଲରେ ଜଣେ ଲୋକ ରାତିରେ ଜେସିବି ମେଶିନ ଲଗାଇ ବହୁ ଗଛ କାଟି ସମତଳ କରିଛନ୍ତି। ଏନେଇ ବନ ସୁରକ୍ଷା ସମିତି ଓ ମହିଳାମାନେ ଅଭିଯୋଗ କରିବା ପରେ ବି ଫରେଷ୍ଟର ବିଭିନ୍ନ କାମର ବାହାନା କରି ସଂପୃକ୍ତ ସ୍ଥାନକୁ ଯାଇନାହାନ୍ତି। ସେହିପରି କୋଳିପଶୀ ଜଙ୍ଗଲରେ ପ୍ରତିଦିନ କୌଣସି ନା କୌଣସି ବନ୍ୟଜନ୍ତୁଙ୍କୁ ଶିକାର କରି ଶିକାରୀ ବେଧଡ଼କ ଭାବେ ବିକ୍ରି କରୁଛନ୍ତି। ତେଣୁ ବନ ବିଭାଗ ନିଜ ବିଭାଗ ଦାୟିତ୍ୱ ପ୍ରତି କେବେ ଆନ୍ତରିକତା ଦେଖାଦେଉଛି ତାହା ଦେଖିବାକୁ ବାକି ରହିଛି ବୋଲି ପରିବେଶବିତ୍ମାନେ ପ୍ରକାଶ କରିଛନ୍ତି। ଏ ସମ୍ପର୍କରେ ପ୍ରତିକ୍ରିୟା ପାଇଁ ସୁକିନ୍ଦା ରେଞ୍ଜର ବିପିନ ବିହାରୀ ରାଉତରାୟଙ୍କୁ ଫୋନ୍ ଦ୍ୱାରା ଯୋଗାଯୋଗ କରାଯାଇଥିଲେ ମଧ୍ୟ ସେ ଫୋନ୍ ରିସିଭ୍ କରି ନ ଥିଲେ।
