କୋଲକାତା,୨୮।୨ : ଆଇପିଏଲ-୨୦୨୩ ଆରମ୍ଭ ହେବାକୁ ଆଉ ଏକ ମାସରୁ ଅଧିକ ସମୟ ବାକି ଅଛି। ଏହା ପୂର୍ବରୁ ମୁମ୍ବାଇ ଇଣ୍ଡିଆନ୍ସକୁ ଏକ ବଡ଼ ଝଟ୍କା ଲାଗିଛି। ଗଣମାଧ୍ୟମ ରିପୋର୍ଟ ଅନୁଯାୟୀ, ଭାରତର ତାରକା ଫାଷ୍ଟ ବୋଲର ଜଶପ୍ରୀତ ବୁମରାଙ୍କୁ ଆଇପିଏଲ ୨୦୨୩ ରୁ ବାଦ ଦିଆଯାଇଛି। ତାଙ୍କ ପିଠିରେ ଆଘାତ ଲାଗିଥିବା କୁହାଯାଉଛି। ଏହି କାରଣରୁ ସେ ଆଇପିଏଲ ବାହାରେ ଅଛନ୍ତି।
ଏହା ମୁମ୍ବାଇ ଇଣ୍ଡିଆନ୍ସର ବୋଲିଂ ଲାଇନକୁ ଆଇପିଏଲ ସିଜିନ୍ ୧୬ରେ ଟିକିଏ ଦୁର୍ବଳ କରିଦେବ ବୋଲି ଚର୍ଚ୍ଚା ହେଉଛି।
ପିଠି ସମସ୍ୟା ଯୋଗୁ ବୁମରା ଗତ ପାଞ୍ଚ ମାସ ଧରି ଦଳ ବାହାରେ ଅଛନ୍ତି। ଖବର ଅନୁଯାୟୀ, ବୁମରା ଶୀଘ୍ର ବ୍ୟାକ ସର୍ଜରୀ କରିପାରନ୍ତି। ଆଘାତରୁ ବୁମରା ଏପର୍ଯ୍ୟନ୍ତ ସୁସ୍ଥ ହୋଇନାହାଁନ୍ତି। ଏହି ଆଘାତ ଯୋଗୁ ବୁମରା ଗତ ବର୍ଷ ଏସିଆ କପ ଏବଂ ଟି-୨୦ ବିଶ୍ୱକପ ଖେଳିପାରି ନ ଥିଲେ। ଏଥି ସହିତ ଭାରତ ବିଶ୍ୱ ଟେଷ୍ଟ ଚାମ୍ପିଅନସିପର ଫାଇନାଲରେ ପହଞ୍ଚିବା ପ୍ରାୟ ନିଶ୍ଚିତ। ଏଭଳି ପରିସ୍ଥିତିରେ ବୁମରା ଜୁନ ୭ରୁ ଓଭାଲରେ ଅନୁଷ୍ଠିତ ହେବାକୁ ଥିବା ବିଶ୍ୱ ଟେଷ୍ଟ ଚାମ୍ପିଅନସିପ ଫାଇନାଲରେ ମଧ୍ୟ ଖେଳି ପାରିବେ ନାହିଁ ।
ବେଙ୍ଗାଲୁରୁର ନ୍ୟାଶନାଲ କ୍ରିକେଟ ଏକାଡେମୀ (ଏନସିଏ)ରେ ବିସିସିଆଇର ମେଡିକାଲ ଟିମ୍ ବୁମରାଙ୍କ ମାମଲାକୁ ଗୁରୁତର ସହ ନେଇ ଏ ଦିଗରେ ତାଙ୍କୁ ସାହାଯ୍ୟ କରୁଛନ୍ତି। ଏହା ସହିତ ସମ୍ପୂର୍ଣ୍ଣ ଚିକିତ୍ସା ମଧ୍ୟ କରାଯାଉଛି। ଏଭଳି ପରିସ୍ଥିତିରେ ଏନସିଏ କର୍ମଚାରୀ ବୁମରାଙ୍କୁ ତାଙ୍କ ତଳ ପିଠିରେ ଅସ୍ତ୍ରୋପଚାର କରିବାକୁ ପରାମର୍ଶ ଦେଇଥିଲେ। ଅକ୍ଟୋବର-ନଭେମ୍ବରରେ ଭାରତରେ ଅନୁଷ୍ଠିତ ହେବାକୁ ଥିବା ଏକଦିବସୀୟ ବିଶ୍ୱକପକୁ ଧ୍ୟାନରେ ରଖି ବିସିସିଆଇ ଖୁବ ଶୀଘ୍ର ଏନସିଏ ଏବଂ ବୁମରାଙ୍କ ସହ ଆଲୋଚନା ପରେ ଅସ୍ତ୍ରୋପଚାର ଏବଂ ଅନ୍ୟାନ୍ୟ ବିକଳ୍ପ ଉପରେ ନିଷ୍ପତ୍ତି ନେଇପାରେ ବୋଲି କୁହାଯାଉଛି।
