ଭୁବନେଶ୍ୱର,୩ା୮(ରବିନାରାୟଣ ଜେନା): ମଧ୍ୟପ୍ରାଚ୍ୟରେ ସୃଷ୍ଟି ହୋଇଥିବା ଯୁଦ୍ଧ ପରିସ୍ଥିତିକୁ ନେଇ କେନ୍ଦ୍ର ନଗର ଉନ୍ନୟନ ବ୍ୟାପାର ମନ୍ତ୍ରଣାଳୟ ପକ୍ଷରୁ ରିଅଲ ଇଷ୍ଟେଟ୍ ଓ ବିଲ୍ଡର୍ସ(କୋଠାବାଡ଼ି ନିର୍ମାତା)ଙ୍କୁ ୪ମାସର ରିହାତି ଅନୁକମ୍ପା ପ୍ରଦାନ କରାଯାଇଛି। ମନ୍ତ୍ରଣାଳୟ ପକ୍ଷରୁ ଏ ସଂକ୍ରାନ୍ତରେ ଏକ ନିର୍ଦ୍ଦେଶନାମା ଜୁଲାଇ ୩୧ରେ ଜାରି ହୋଇଛି। ନିର୍ଦ୍ଦେଶନାମାରେ ଅନୁସଚିବ ସଞ୍ଜୟ କୁମାର ଦର୍ଶାଇଛନ୍ତି, ମଧ୍ୟପ୍ରାଚ୍ୟରେ ଉପୁଜିଥିବା ଯୁଦ୍ଧ ସଙ୍କଟକୁ ନେଇ ବିଶ୍ୱସ୍ତରୀୟ ଯୋଗାଣ ବ୍ୟବସ୍ଥା ବାଧାପ୍ରାପ୍ତ ହୋଇଛି। ଫଳରେ ନିର୍ମାଣ ସାମଗ୍ରୀର ଅଭାବ ଦେଖାଦେଇଥିବାରୁ ରିଅଲ୍ ଇଷ୍ଟେଟ୍ ପ୍ରକଳ୍ପଗୁଡ଼ିକର ନିର୍ମାଣ କାର୍ଯ୍ୟ ସମୟସୀମା ପ୍ରଭାବିତ ହୋଇଛି। ଏହାକୁ ନେଇ ମନ୍ତ୍ରଣାଳୟ ନିକଟକୁ ବିଭିନ୍ନ ହିତାଧିକାରୀଙ୍କ ପକ୍ଷରୁ ଅଭିଯୋଗ ଆସୁଛି। ଏହି କ୍ରମରେ ଅର୍ଥ ମନ୍ତ୍ରଣାଳୟର ବ୍ୟୟ ବିଭାଗ ପକ୍ଷରୁ ୨୯ ଏପ୍ରିଲରେ ପଶ୍ଚିମ ଏସିଆର ସ୍ଥିତିକୁ ‘ଯୁଦ୍ଧ’ ଭାବେ ଗଣାଯାଇଛି, ଯାହା ‘ଫୋର୍ସ ମାଜ୍ୟୁର’ ପ୍ରୟୋଗ ପାଇଁ ପ୍ରଯୁଜ୍ୟ। ଉଲ୍ଲେଖ କରାଯାଇପାରେ, ଫୋର୍ସ ମାଜ୍ୟୁର ହେଉଛି ଏକ ଫରାସୀ ଶବ୍ଦ ଯାହାର ଅର୍ଥ ହେଉଛି ‘ଉଚ୍ଚତର ଶକ୍ତି’। ଏହା ଏକ ଅପ୍ରତ୍ୟାଶିତ, ଅନିୟନ୍ତ୍ରିତ ଘଟଣା ଯେପରିକି ଯୁଦ୍ଧ, ପ୍ରାକୃତିକ ବିପର୍ଯ୍ୟୟ କିମ୍ବା ଧର୍ମଘଟକୁ ବୁଝାଏ, ଯାହା ପକ୍ଷମାନଙ୍କୁ ଏକ ଆଇନଗତ ଚୁକ୍ତିରୁ ମୁକ୍ତ କରିଥାଏ।
ରିଅଲ୍ ଇଷ୍ଟେଟ୍ ନିୟାମକ ପ୍ରାଧିକରଣ (ରେରା)ଆଇନର ଧାରା-୬ ଅନୁଯାୟୀ, ‘ଫୋର୍ସ ମାଜ୍ୟୁର’ କାରଣରୁ ରିଅଲ୍ ଇଷ୍ଟେଟ୍ ପ୍ରକଳ୍ପର ପଞ୍ଜୀକରଣ ଅବଧି ବଢ଼ାଯାଇପାରିବ। ସେହିପରି ଧାରା-୭(୩) ଅନୁଯାୟୀ, ପଞ୍ଜୀକରଣ ବାତିଲ ନ କରି କ୍ରେତାଙ୍କ ସ୍ବାର୍ଥ ଦୃଷ୍ଟିରୁ ଉପଯୁକ୍ତ ସର୍ତ୍ତ ସହ ପଞ୍ଜୀକରଣ ବଳବତ୍ତର ରଖାଯିବ। ମିଳିଥିବା ପ୍ରସ୍ତାବ ଆଧାରରେ, ମନ୍ତ୍ରଣାଳୟ ସମସ୍ତ ରାଜ୍ୟ ରିଅଲ୍ ଇଷ୍ଟେଟ୍ ନିୟାମକ ପ୍ରାଧିକରଣକୁ ପରାମର୍ଶ ଦେଇଛି ଯେ, ସେମାନେ ‘ରେରା’ ଆଇନର କ୍ଷମତା ବ୍ୟବହାର କରି ୨୮ ଫେବୃଆରୀ ୨୦୨୬ କିମ୍ବା ତା’ପରେ ସମାପ୍ତ ହେବାକୁ ଥିବା ପଞ୍ଜୀକୃତ ରିଅଲ୍ ଇଷ୍ଟେଟ୍ ପ୍ରକଳ୍ପଗୁଡ଼ିକର ପଞ୍ଜୀକରଣ ଏବଂ ସମାପ୍ତି ସମୟସୀମାକୁ ୪ ମାସ ପର୍ଯ୍ୟନ୍ତ ବୃଦ୍ଧି କରିପାରିବେ। ପ୍ରତ୍ୟେକ ପ୍ରକଳ୍ପ ପାଇଁ ଅଲଗା ଆବେଦନ ଓ ଆଦେଶ ଜାରି କରିବାର ଆବଶ୍ୟକତା ଏଡ଼ାଇବା ପାଇଁ ‘ରେରା’ ପ୍ରାଧିକରଣ ଏକ ସାଧାରଣ ନିର୍ଦ୍ଦେଶ ଜାରି କରିପାରିବ ବୋଲି ଅନୁସଚିବ ଦର୍ଶାଇଛନ୍ତି।