ପୁରୀ ଅଫିସ,୨।୧୦: ଶ୍ରୀମନ୍ଦିର ପରିକ୍ରମା ପ୍ରକଳ୍ପକୁ ନେଇ ପୁଣି ବିବାଦ ମୁଣ୍ଡ ଟେକିଛି। ପ୍ରକଳ୍ପର ନିଷିଦ୍ଧାଞ୍ଚଳରେ କ୍ଲକ୍ ରୁମ୍, ମିନି କ୍ଲକ୍ ରୁମ୍, ଜନତା ଓ ସେବାୟତଙ୍କ ଶୌଚାଳୟ ସମେତ ଅନ୍ୟ ନିର୍ମାଣ କାର୍ଯ୍ୟ ଚାଲିଛି। ତେବେ ଏହି ନିଷିଦ୍ଧାଞ୍ଚଳ ପରିସରରେ ନିର୍ମାଣାଧୀନ ପ୍ରାଚୀରକୁ ନେଇ ସାନି ବିବାଦ ଦେଖାଦେଇଛି। ପ୍ରକଳ୍ପ ବିରୋଧୀମାନେ ଏହାକୁ ବେଆଇନ ବୋଲି ଦର୍ଶାଇବା ସହ ଏନେଇ ରାଜ୍ୟ ସରକାର ଅନୁମତି ପାଇ ନ ଥିବା ଅଭିଯୋଗ କରୁଛନ୍ତି।
ସୂଚନା ଅଧିକାର କର୍ମୀ ଦିଲୀପ ବରାଳ କହିଛନ୍ତି, ପ୍ରକଳ୍ପ କାର୍ଯ୍ୟ ପାଇଁ ଅନୁମତି ରହିଥିବାବେଳେ କ’ଣ ସବୁ ନିର୍ମାଣ କରାଯିବ ତାହା ଜାତୀୟ ସ୍ମାରକୀ ପ୍ରାଧିକରଣ (ଏନ୍ଏମ୍ଏ) ସ୍ପଷ୍ଟ ଭାବେ ଉଲ୍ଲେଖ କରିଛି। ସମ୍ପୃକ୍ତ ତାଲିକାରେ ପ୍ରାଚୀର ନିର୍ମାଣ କରିବା ନେଇ ଉଲ୍ଲେଖ ନାହିଁ। ପ୍ରଶାସନ ମନଇଚ୍ଛା ବେଆଇନ ଭାବେ ପ୍ରାଚୀର ନିର୍ମାଣ କରୁଛି। ପ୍ରଶାସନ ପ୍ରଥମେ ଏଥିଲାଗି ଅନୁମତି ଆଣିବା ଆବଶ୍ୟକ ବୋଲି ସେ ମତ ଦେଇଛନ୍ତି। ବରାଳ ଆହୁରି କହିଛନ୍ତି, ପ୍ରଶାସନ ପ୍ରାଚୀରକୁ ଲୋକଙ୍କ ଆଢ଼ୁଆଳରେ ରଖିବାକୁ ଚାହୁଁଛି। ଏଥିପାଇଁ ଯେତିକି ପ୍ରାଚୀର ନିର୍ମାଣ ହେଉଛି ତାହାକୁ ପୋତି ଦିଆଯାଉଛି। ତଳୁ ବର୍ତ୍ତମାନ ସୁଦ୍ଧା ୫ ଫୁଟର ପ୍ରାଚୀର ନିର୍ମାଣ ହୋଇସାରିଲାଣି। କିଛି ସ୍ଥାନରେ ନିର୍ମାଣ ସରିଯାଇଥିବା ବେଳେ ପରିକ୍ରମା ପ୍ରକଳ୍ପ ଚାରି ପାଖରେ ଏହି ପ୍ରାଚୀର ବୁଲାଯାଉଛି। ଅନ୍ୟପକ୍ଷରେ ଏ ସମ୍ପର୍କରେ ଭାରତୀୟ ପ୍ରତ୍ନତତ୍ତ୍ୱ ସର୍ବେକ୍ଷଣ (ଏଏସ୍ଆଇ) ପୁରୀ ସର୍କଲ କାର୍ଯ୍ୟାଳୟ ପକ୍ଷରୁ କୁହାଯାଇଛି ଯେ, ଅନୁମତି ଥିବା ପ୍ରକଳ୍ପ କାର୍ଯ୍ୟ ସଂଲଗ୍ନ ଏକ ପ୍ରାଚୀର ନିର୍ମାଣ ହେଉଛି। ମାତ୍ର ଏନେଇ ଅନୁମତି ରହିଛି କି ନାହିଁ ତାହା ଯାଞ୍ଚ ଚାଲିଛି। ସୁପ୍ରିମକୋର୍ଟଙ୍କ ନିର୍ଦ୍ଦେଶ ପରେ ପ୍ରକଳ୍ପ କାର୍ଯ୍ୟକୁ ସୁରୁଖୁରୁରେ ଚଳାଇବା ଲାଗି କୁହାଯାଇଛି। ତେବେ ପ୍ରାଚୀର ନିର୍ମାଣରେ ଆଇନ ଉଲ୍ଲଂଘନ ହୋଇଛି କି ନାହିଁ ଏବଂ ଏଭଳି ନିର୍ମାଣ ହୋଇପାରିବ କି ନାହିଁ ତାହାର ବୈଷୟିକ ଦିଗ ଉପରେ ଆଲୋଚନା କରାଯିବ। ଘଟଣାସ୍ଥଳକୁ ଯାଇ ଯାଞ୍ଚ ଶେଷ କରିବା ସହ ଉପରିସ୍ଥ ଅଧିକାରୀଙ୍କୁ ଏ ସଂକ୍ରାନ୍ତରେ ସୂଚନା ଦେଇ ପରାମର୍ଶ ମାଗିଛୁ ବୋଲି ସେ ପ୍ରକାଶ କରିଛନ୍ତି। ସେହିଭଳି ପ୍ରକଳ୍ପ କାର୍ଯ୍ୟ ଦାୟିତ୍ୱରେ ଥିବା ଓଡ଼ିଶା ସେତୁ ନିର୍ମାଣ ନିଗମ (ଓବିସିସି)ର ଅଧିକାରୀ ପ୍ରଭାତ ପାଣିଗ୍ରାହୀ କହିଛନ୍ତି, ପରିକ୍ରମା ପ୍ରକଳ୍ପରେ ନିର୍ମାଣ କରାଯାଉଥିବା କୋଠା ଓ ବାହାର ରାସ୍ତାକୁ ବିଭକ୍ତ କରିବା ସହ ଗମନାଗମନ ଏବଂ ଯୋଗାଯୋଗର ସୁବିଧା ନିମନ୍ତେ ଏହି ପ୍ରାଚୀର ତିଆରି ହେଉଛି। ମୁଖ୍ୟତଃ ପ୍ରାଚୀର ସେପଟେ ଯାନବାହନ ଚଳାଚଳ ସହ ଲୋକେ ଯାତାୟାତ କରିବେ। ପାର୍କିଂ ଓ ଯାନବାହନ ଚଳାଚଳ ପ୍ରାଚୀର ସେପଟେ ହେବ। ଫଳରେ ଟ୍ରାଫିକ ଜାମ୍ ଭଳି ସ୍ଥିତି ଉପୁଜିବ ନାହିଁ। ଯାତ୍ରୀଙ୍କ ମୌଳିକ ସୁବିଧା ପାଇଁ ହୋଇଥିବା ଶୌଚାଳୟ ଓ କ୍ଳକ ରୁମ୍ ଇତ୍ୟାଦିକୁ ଅନାୟାସରେ ଯାଇଆସି ହେବ। ପ୍ରାଚୀର ବାହାରେ ପାର୍କିଂ ସୁବିଧା ରହିବ। ତେବେ ଗୋଟିଏ ପଟେ ପ୍ରଶାସନ ଏଭଳି ନିର୍ମାଣକୁ ଆଇନ ଦୃଷ୍ଟିକୋଣରୁ ଠିକ୍ ଦର୍ଶାଉଥିବାବେଳେ ଅନ୍ୟପଟେ ପ୍ରକଳ୍ପ ବିରୋଧୀମାନେ କାର୍ଯ୍ୟକୁ ବେଆଇନ ବୋଲି କହିଛନ୍ତି। ପ୍ରକଳ୍ପ କାର୍ଯ୍ୟ ପାଇଁ ମିଳୁଥିବା ନୋ ଅବ୍ଜେକ୍ସନ ସାର୍ଟିଫିକେଟ୍ (ଏନ୍ଓସି)ରେ ପ୍ରାଚୀର ସମ୍ପର୍କରେ ଉଲ୍ଲେଖ ନ ଥିବାରୁ ବିରୋଧୀମାନେ ପ୍ରଶାସନକୁ ଟାର୍ଗେଟ କରିଛନ୍ତି।
