ଭୁବନେଶ୍ୱର,୧୭।୨: ମୁଖ୍ୟମନ୍ତ୍ରୀ ମୋହନ ଚରଣ ମାଝୀ ପ୍ରଥମ ଥର ପାଇଁ ପୂର୍ଣ୍ଣାଙ୍ଗ ବଜେଟ୍ ଉପସ୍ଥାପନ କରିଛନ୍ତି। ଚଳିତ ବର୍ଷ ବଜେଟରେ ୨ଲକ୍ଷ ୯୦ହଜାର କୋଟିର ବ୍ୟୟ ଅଟକଳ କରାଯାଇଛି। ମୁଖ୍ୟମନ୍ତ୍ରୀ ଯିଏକି ନିଜ ନିକଟରେ ଅର୍ଥ ବିଭାଗ ରଖିଛନ୍ତି ଅପରାହ୍ନରେ ବିଧାନସଭାରେ ବଜେଟ୍ ପ୍ରସ୍ତାବ ଉପସ୍ଥାପନ କରିଛନ୍ତି।
ରାଜ୍ୟର ଭାଜପା ସରକାରଙ୍କ ଦ୍ୱାରା ଆଗତ ଏହା ଦ୍ୱିତୀୟ ବଜେଟ୍। ମୋହନ ମଧ୍ୟ ଲଗାତାର ଦ୍ୱିତୀୟ ଥର ପାଇଁ ବିଧାନସଭାରେ ବଜେଟ୍ ପ୍ରସ୍ତାବ ଉପସ୍ଥାପନ କରିଛନ୍ତି। ମୁଖ୍ୟମନ୍ତ୍ରୀଙ୍କ କହିବା ଅନୁଯାୟୀ, ସରକାର ୨୦୩୬ ସୁଦ୍ଧା ୫୦୦ ବିଲିୟନ ଡଲାର ଅର୍ଥନୀତି ହେବା ପାଇଁ ଲକ୍ଷ୍ୟ ରଖିଛନ୍ତି। ଏହି ବର୍ଷ ଓଡ଼ିଶା ଏକ ସ୍ୱତନ୍ତ୍ର ରାଜ୍ୟ ଭାବରେ ଗଠନ ହେବାର ଶତବାର୍ଷିକୀ ପାଳନ କରୁଥିବ ।
ଓଡ଼ିଶାରେ ପ୍ରାୟ ୪୮ ପ୍ରତିଶତ ଶ୍ରମଶକ୍ତି କୃଷି ଉପରେ ନିର୍ଭର କରନ୍ତି ଏବଂ ୮୦ ପ୍ରତିଶତ ଲୋକ ଗ୍ରାମାଞ୍ଚଳରେ ବାସ କରନ୍ତି। ସରକାର ୨୦୨୫-୨୬ ବଜେଟ୍ ରେ କୃଷି କ୍ଷେତ୍ର ପାଇଁ ୩୭,୮୩୮ କୋଟି ଟଙ୍କା ବ୍ୟୟବରାଦ କରିଛନ୍ତି।
୨୦୨୫-୨୬ ଆର୍ଥିକ ବର୍ଷ ପାଇଁ ବଜେଟ୍ ପ୍ରସ୍ତାବ ପ୍ରସ୍ତୁତ କରିବା ପୂର୍ବରୁ ମୁଖ୍ୟମନ୍ତ୍ରୀ ଅର୍ଥନୀତିଜ୍ଞ ଏବଂ ପୂର୍ବତନ ଅର୍ଥମନ୍ତ୍ରୀମାନଙ୍କ ସହିତ ପରାମର୍ଶ କରିଥିଲେ। ବୈଠକରେ ମୁଖ୍ୟମନ୍ତ୍ରୀ ପ୍ରତିଶ୍ରୁତି ଦେଇଥିଲେ ଯେ ସେ ୨୦୨୫-୨୬ ଆର୍ଥିକ ବର୍ଷ ପାଇଁ ଏକ ଗରିବ ଏବଂ ଜନସାଧାରଣଙ୍କ ପାଇଁ ବଜେଟ୍ ଉପସ୍ଥାପନ କରିବେ।
ରାଜ୍ୟରେ ଭାଜପା ସରକାର ୨୫ ଜୁଲାଇ, ୨୦୨୪ରେ ବିଧାନସଭାରେ ୨୦୨୪-୨୫ ଆର୍ଥିକ ବର୍ଷ ପାଇଁ ୨.୬୫ ଲକ୍ଷ କୋଟି ଟଙ୍କାର ବାର୍ଷିକ ବଜେଟ୍ ଉପସ୍ଥାପନ କରିଥିଲେ। ଉନ୍ନୟନମୂଳକ କାର୍ଯ୍ୟକଳାପକୁ ବୃଦ୍ଧି କରିବା ଏବଂ ଜନ କଲ୍ୟାଣ ପାଇଁ ପାଣ୍ଠିର ଆବଶ୍ୟକତା ପୂରଣ କରିବା ପାଇଁ ମୁଖ୍ୟମନ୍ତ୍ରୀ ନଭେମ୍ବର ୨୬ ତାରିଖରେ ଗୃହରେ ୧୨,୧୫୬ କୋଟି ଟଙ୍କାର ଅତିରିକ୍ତ ବଜେଟ୍ ଉପସ୍ଥାପନ କରିଥିଲେ।
ପର୍ଯ୍ୟଟନ ବିକାଶ ପାଇଁ ବଜେଟରେ ୮୨୦ କୋଟିର ବ୍ୟୟ ବରାଦ କରାଯାଇଛି। ଏଥିରେ ପର୍ଯ୍ୟଟକ ରହଣି ସୁବିଧା ପାଇଁ ୩୫୯ କୋଟି, ପର୍ଯ୍ୟଟନର ପ୍ରଚାର ପ୍ରସାର ପାଇଁ ୩୩୨ କୋଟି, ଘଟଗାଁ ମାଆ ତାରିଣୀ ମନ୍ଦିର ପାଇଁ ୫୦ କୋଟି ବ୍ୟୟ ବରାଦ କରାଯାଇଛି।
ସେହିଭଳି ୨୦୨୫-୨୬ ପାଇଁ ଶିଳ୍ପ ବିଭାଗକୁ ୮୦୮ କୋଟି ପ୍ରଦାନ କରାଯାଇଛି। ଶିଳ୍ପ ପାଇଁ ଜମି ବ୍ୟାଙ୍କ ଗଠନ ପାଇଁ ୧୦୬ କୋଟି, ମଧ୍ୟମ ଓ ବୃହତ ଶିଳ୍ପକୁ ସବ୍ସିଡି ପାଇଁ ୧୯୪ କୋଟି, ମୁଖ୍ୟମନ୍ତ୍ରୀ MSME ସୁଧ ରିହାତି ଯୋଜନା ପାଇଁ ୩୦ କୋଟି ଏବଂ MSMEକୁ ସହାୟତା ପାଇଁ ୨୮୪ କୋଟି ବ୍ୟୟ ବରାଦ କରାଯାଇଛି।
ଶିଳ୍ପ ସହିତ ଜଙ୍ଗଲ, ପରିବେଶ ଓ ଜଳବାୟୁ ପରିବର୍ତ୍ତନ ପାଇଁ ମଧ୍ୟ ବଜେଟରେ ବ୍ୟବସ୍ଥା କରାଯାଇଛି। ଏଥିରେ ୧୪୯୧ କୋଟି ଟଙ୍କାର ବଜେଟ ଉପସ୍ଥାପନ କରିଛନ୍ତି ମୁଖ୍ୟମନ୍ତ୍ରୀ। କାମ୍ପା ପାଣ୍ଠିକୁ ୧୦୨୧ କୋଟି, କେନ୍ଦୁପତ୍ର ତୋଳାଳୀଙ୍କ କଲ୍ୟାଣ ପାଇଁ ୧୨୦ କୋଟି ଏବଂ ବନାଞ୍ଚଳ ବୃଦ୍ଧି ଓ ବୃକ୍ଷରୋପଣ ପାଇଁ ୭୫ କୋଟି ବରାଦ କରାଯାଇଛି।
ଏଥିରେ ମୁଖ୍ୟମନ୍ତ୍ରୀ ପୋଷଣ ଶକ୍ତି ବୃଦ୍ଧି ପାଇଁ ୬୪୬ କୋଟି ବରାଦ କରାଯାଇଛି। ଏହାରି ମାଧ୍ୟମରେ ମଧ୍ୟାହ୍ନ ଭୋଜନରେ ଏଣିକି ପିଲାଙ୍କୁ ଲଡୁ ମିଳିବ। ଏହାବ୍ୟତୀତ ନବମ ଓ ଦଶମ ଶ୍ରେଣୀ ପିଲା ବି ଖାଇବେ ମଧ୍ୟାହ୍ନ ଭୋଜନ। ସପ୍ତାହକୁ ଗୋଟିଏ ଅତିରିକ୍ତ ଅଣ୍ଡା ଓ ୩ଟି ଲଡୁ ମିଳିବ। ଚାତ୍ରଛତରୀ ମାନଙ୍କୁ ପ୍ରୋଟିନ୍ ଓ ଆଇରନ ମିଶ୍ରିତ ଲଡୁ ଯୋଗାଇବେ ସରକାର।
